Last updated on October 19th, 2024 at 06:47 pm
ಉಬಾರ್: ಮಗನ ಪುಟ್ಟಿನ ದಿನೊಕು ಬೋಡಾದ್ ಕಡಮ್ಮನ್ ಬೆಡಿ ದಕ್ಕ್‌ದ್ ಕೆರ್ದ್ ಮಾಸೊನು ಇಲ್ಲ ಫ್ರಿಡ್ಜ್‌ಡ್ ದೀದಿತ್ತಿನ ಪ್ರಕರಣೊನು ಉಬಾರ್ ವಲಯ ಅರಣ್ಯಾಧಿಕಾರಿಲೆನ ಕೂಟ ನಾಡ್ ಪತ್ತ್‌ದ್ ಬೋಂಟೆಗ್ ಗಲಸ್‌ದಿನ ಬೆಡಿ ಬೊಕ್ಕ ಕಡಮ್ಮದ ಮಾಸೊನು ವಶೊಕು ಗೆತೊಂದೆರ್.
ಶಿರಾಡಿ ಗ್ರಾಮೊದ ಗುಂಡ್ಯ ನಿವಾಸಿ ಸುರೇಶ್‌ ಬೊಕ್ಕ ಪಾಸಾಡಿಲು ಕಾಪುದಕಾನೊದ ಕಡಮ್ಮದ ಬೋಂಟೆ ಮಲ್ತಿತ್ತೆರ್. ಅವೆನ್ ಮಗನ ಪುಟ್ಟಿನ ದಿನೊತಾನಿದ ಲೇಸ್‌ಗ್ ಬೋಡಾದ್ ಮಾಸ ಮಲ್ತ್‌ದ್ ಇಲ್ಲದ ಪ್ರೀಝರ್‌‌ಡ್ ದೀದಿತ್ತೆರ್.
ಈ ಬಗೆಟ್ ಒಲವು ತಿಕ್ಕಿನ ಉಬಾರ್ ವಲಯ ಅರಣ್ಯಾಧಿಕಾರಿಲೆನ ನಿರ್ದೇಶನೊದ ಮಿತ್ತ್ ಉಪ ವಲಯ ಅರಣ್ಯಾಧಿಕಾರಿ ಯತೀಂದ್ರೆರ್, ಇಲಾಖಾ ಸಿಬಂದಿ ಸುನಿಲ್‌, ಶಿವಾನಂದ ಮೊಕಕ್ಲೆನ ಕೂಟ ಸುರೇಶ್‌‌ನ ಇಲ್ಲಗ್ ದಾಳಿ ಮಲ್ತ್‌ದ್ ದೆತ್ತ್‌ದೀದೀತ್ತಿನ ಮಾಸೊನು ಅಂಚೆನೇ ಬೋಂಟೆಗ್ ಗಲಸ್‌ದಿನ ಬೆಡಿನ್ ವಶೊಕು ಗೆತೊಂದು ಪ್ರಕರಣ ದಾಕಲ್ತೊಂದೆರ್. ಕಾರ್ಯಾಚರಣೆದ ಪೊರ್ತುಡು ಆರೋಪಿಲು ಗುಂಡ್ಯ ಸುದೆ ಮೀಂದೊಂದು ಕಡತ್‌ದ್ ಪದ್ರಾಡಾವೆರ ತೂತೆರ್. ಉಬಾರ್ ವಲಯ ಅರಣ್ಯಾಧಿಕಾರಿ ರಾಘವೇಂದ್ರೆರ್ ಪ್ರಕರಣೊದ ಜಡ್ತೆ ಮಲ್ತೊಂದುಲ್ಲೆರ್.