Last updated on October 28th, 2024 at 06:19 pm
ವೈನ್ಸ್ ಶಾಪ್ ಬೊಕ್ಕ ಮೊಬೈಲ್ ಶಾಪ್ ಕಲ್ವೆದ ಪ್ರಕರಣೊದ ಬೆರಿಪತ್ತಿನ ಬೊಲ್ತೇರ್ ಪೊಲೀಸೆರೆ ಬೇಪುಗು ಅಂತರ್ ರಾಜ್ಯ ಕಲ್ವೆರ್ ತಿಕ್ಕ್‌ದ್ ಬೂರ್ದೆರ್.
ಬೊಲ್ತೇರ್ ಬಸ್ ಉಂತಡೆದ ಬರಿತ ವೈನ್ಸ್ ಶಾಪ್‌ದ ತರ್ಕೋಲು ಪೊಲಿತ್‌ದ್ ಪೊಗ್ಗಿನ ಕಲ್ವೆರ್ ಕಾಸ್ ಅಂಚೆನೇ ಗಂಗಸರದ ಬಾಟ್ಲಿಲೆನ್ ಕಂಡ್‌ದಿನ ನಡಕೆ ಅ.13 ತಾನಿ ಐತಾರ ರಾತ್ರೆ ನಡತಿತ್ತ್ಂಡ್. ಅಂಗಡಿಡ್ ದೀದಿತ್ತಿನ ಸುಮಾರ್ ಒರ್ಮ್ಬ ಸಾರ ಕಾಸ್, ರಡ್ಡ್ ಬಿಯರ್ ಬಾಟ್ಲಿಲೆನ್ ಕಂಡ್‌ದಿತ್ತೆರ್. ಅವ್ವೇ ರಾತ್ರೆ ಉಜಿರೆದ ಮೊಬೈಲ್ ಶಾಪ್‌ಡ್ಲಾ ಕಲ್ವೆ ಆದ್ 600 ರೂಪಾಯಿನ್ ಕಲ್ವೆರ್ ಲಕ್ಕಾದಿತ್ತೆರ್. ಈ ಕಲ್ವೆದ ಪ್ರಕರಣ ಬೊಲ್ತೇರ್ ಪೊಲೀಸ್ ಸ್ಟೇಶನ್‌ಡ್ ದಾಕಲಾದಿತ್ತ್ಂಡ್.
ಪ್ರಕರಣೊದ ಬೆರಿಪತ್ತಿನ ಬೊಲ್ತೇರ್ ಇನ್ಸ್ಪೆಕ್ಟರ್ ಸುಬ್ಬಪುರ್ ಮಠ್ ಬೊಕ್ಕ ಸಬ್ ಇನ್ಸ್ಪೆಕ್ಟರ್ ಮುರುಳಿಧರ್ ನಾಯ್ಕ್ ಮುತಾಲಿಕೆದ ಊಟ ಸಿಸಿಕ್ಯಾಮೆರಾಲೆನ ಮುಕೇನ ಕಲ್ವೆಗ್ ಗಲಸ್‌ದಿನ ಬೈಕ್ ನಾಡ್‌ಪತ್ತ್‌ದೆರ್. ಆ ಪೊರ್ತುಡು ಆರೋಪಿಲು ಕೊಪ್ಪಳ ಪೊಲೀಸ್ ಸ್ಟೇಶನ್ ಸೀಮೆಡ್ ಬೈಕ್ ಕಂಡ್‌ದಿನ ತೆರಿದ್ ಬೈದ್ಂಡ್.
ಅವೆತ ಬೆರಿಯೆ ಪೋತಿನ ಪೊಲೀಸೆರೆಗ್ ಅಪ್ರಾಪ್ತ ಆಣ್ ಬೊಕ್ಕ ಕುಡೊರ್ಯನ ಬಗೆಟ್ ತೆರಿದ್ಂಡ್. ಈ ಇರ್ವೆರ್ ಆರೋಪಿಲು ಒಡಿಪು ಜಿಲ್ಲೆದ ಕುಂದಾಪುರ ಗ್ರಾಮಾಂತರ ಪೊಲೀಸ್ ಸ್ಟೇಶನ್ ಸೀಮೆಡ್ ಅ.16ಕ್ ನಡೀರ್ 2:45 ಕ್ಕ್ ಕರ್ನಾಟಕ ಬ್ಯಾಂಕ್ ಕೋಣಿ ಬ್ರಾಂಚ್‌ದ ಕಲ್ವೆಗ್ ಪುಣೆಯೊಂದುಪ್ಪುನಗ, ಬ್ಯಾಂಕ್‌ದ ಮಾನಿಟರಿಂಗ್ ತೂವೊಂದಿತ್ತಿನ ಹೈದರಾಬಾದ್ ಸಂಸ್ಥೆ, ಲೈವ್ ಸಿಸಿಕ್ಯಾಮರಡ್ ತೂದು ಪೊಲೀಸೆರೆಗ್ ಒಲವು ಕೊರ್ದು ಅಂತರ್ ರಾಜ್ಯ ಕಲ್ವೆರಾಯಿನ ಕೊಪ್ಪಳ ಜಿಲ್ಲೆದ ಇಂದ್ರನಗರ ನಿವಾಸಿ ಮೊಹಮ್ಮದ್ ಹುಸೇನ್(22) ಬೊಕ್ಕ ಅಪ್ರಾಪ್ತ ಆಣನ್ ರೆಡ್ ಹ್ಯಾಂಡ್ ಆದ್ ಪತ್ತ್‌ದೆರ್.
ಅಪ್ರಾಪ್ತ ಆಣನ್ ಬಾಲನ್ಯಾಯಂತಡೆಕ್ ಹಾಜಿರಿ ಮಲ್ತ್‌ದ್, ಬಾಲಮಂದಿರೊಗು ಸೇರಾದ್ ಕುಡೊರ್ಯನ್ ಒಡಿಪು ಜೈಲ್‌ಗ್ ಕಡಪುಡ್ದೆರ್.
ಈ ಆರೋಪಿಲು ಕುಂದಾಪುರ ಸ್ಟೇಶನ್ ಮಾತ್ರ ಅತ್ತಂದೆ, ಬೊಲ್ತೇರ್, ಪಡ್ಡೆದ್ರ, ಬಳ್ಳಾರಿಡ್ ನಡತಿನ ಬ್ಯಾಂಕ್ ಕಲ್ವೆ, ಬೈಕ್ ಕಲ್ವೆ, ಅಂಗಡಿ ಕಲ್ವೆದ ಪ್ರಕರಣೊಲೆಡ್ ಪಾಲ್‌ಪಡೆತಿನ ವಿಚಾರಣೆದ ಪೊರ್ತುಡು ತೆರಿದ್ ಬೈದ್ಂಡ್.