Last updated on November 1st, 2024 at 06:52 am
ತುಳುನಾಡ್ ಪನ್ಪಿನವು ಇತ್ತೆದಲೆಕ ಒಂಜಿ ಸಾಂಸ್ಕೃತಿಕ ಆಯೊದ ಜಾಗೆ ಅತ್ತ್, ಒಂಜಿ ಕಾಲೊಡು ತುಳುನಾಡ್ ಗ್ ರಾಜಕೀಯ ಶಕ್ತಿ ಇತ್ತ್ಂಡ್, ಸ್ವಾಯತ್ತದ ಆಡೊಲ್ತ ಇತ್ತ್ಂಡ್. ತುಳುನಾಡ್ದ ಉಲ್ಲೇಖ ಸಂಗಂ ಕಾಲೊರ್ದು ಬತ್ತ್ಂಡಲಾ, ಶಾಸನೋಕ್ತವಾದ್ ತುಳುನಾಡ್/ತುಳುದೇಶ ಪನ್ಪಿನ ಜಾಗೆ ಇತ್ತ್ಂಡ್ ಪನ್ಪಿನೆಕ್ಕ್ ನಮಕ್ 8ನೇ ಶತಮಾನೊರ್ದು ದಾಖಲೆಲು ತಿಕ್ಕುವ. ತುಳುನಾಡ್ದ ಮಿತ್ತ್ ಏತೋ ಸವ ಪಿದಯಿದಕುಲು ಆಕ್ರಮಣ ಮಲ್ತ್ ವಶ ಮಲ್ತೊಂದಿತ್ತೆರ್ಡಲಾ ಅಕುಳು ತುಳುನಾಡ್ದ ಆಡಳಿತೊಗು ಕೈ ಪಾಡ್ದಿತ್ತಿಜೆರ್. ಮುಲ್ಪದ ಆಡಳಿತದ ಸ್ವಾಯತ್ತತೆ ಮಲ್ಪದಕಲೆನ ಕೈಟೇ ಇತ್ತ್ಂಡ್. ಇಂಚಿತ್ತಿನ ತುಳುನಾಡ್ ಡ್ ಸುರುತ ಸಲ ಆಡಳಿತೊಡು ತನ್ನಾಲ್ಮೆ ತತ್ತ್ ಪೋಯಿನಿ ವಿಜಯನಗರ ಅರಸೆರ್ನ ಕಾಲೊಡು.
ಪ್ರಾಯಶಃ ತುಳುನಾಡ್ ಡ್ ಆಡಳಿತ ಕ್ರಾಂತಿ ಆಯಿನಿ ವಿಜಯನಗರದ ಅರಸೆರ್ನ ಕಾಲೊರ್ದು. ಈ ಪೊರ್ತುಡು ಆಡಳಿತ ಕ್ರಾಂತಿ ಮಾತ್ರ ಅತ್ತಂದೆ ಸಾಹಿತ್ಯ ಕ್ರಾಂತಿಲಾ ಆಂಡ್, ತುಳುವೆರ್ ಅರಸೆರ್ನಕುಲು ವಿಜಯನಗರ ಅರಸೆರ್ನ ಸಾಮಂತೆರಾದ್ ಇತ್ತ್ ತುಳುಟು ಸಾಹಿತ್ಯ ಬುಲೆಯರೆ ಬೆರಿಬಲ ಕೊರ್ರೆ ಪತ್ತಿನಿಲಾ ಉಂದೇ ಕಾಲೊಡು. 14ರ್ದ್ 17ನೇ ಶತಮಾನೊದ ಕಾಲ ತುಳುತ ಮಟ್ಟ್ ಡ್ ಬಾರೀ ಎಡ್ಡೆ ಕಾಲ. ಮಹಾಭಾರತ, ರಾಮಾಯಣ, ಭಾಗವತ, ಕಾವೇರಿ, ದೇವಿಮಹಾತ್ಮೆ ಇಂಚಿನ ಕೃತಿಕುಲು ತುಳುಟು ಬತ್ತಿನಿ ಉಂದೇ ಕಾಲೊಡು.
ಯಾಪ ವಿಜಯನಗರದ ಪತನ ಆಂಡಾ ಅಪಗನೇ ತುಳುಟ ಅಧಃಪತನ ಸುರು ಆಂಡ್. ಅವೆರ್ದ್ ಬೊಕ್ಕ ಬತ್ತಿನ ಕೆಳದಿ, ಇಕ್ಕೇರಿದ ಅರಸೆರ್ನ ಕಾಲೊಡು ತುಳುಕು ಒವ್ವೇ ಮಾನಾದಿಗೆ ಆವಡ್, ಬೆರಿಬಲ ಆವಡ್ ತಿಕ್ಕಂದೆ ಪೋಂಡು. ಕನ್ನಡ ತುಳುನಾಡ್ ದ ಆಡಳಿತ ಬಾಸೆ ಆದ್ ಗಟ್ಟಿಯಾದ್ ಉಂತುಂಡು. ತುಳುನಾಡ್ ದ ತುಂಡರಸೆರ್ ತನ್ಕುಲೆನ ನಡುಟು ಕೊಲಲ ಮಲ್ತೊಂದು, ಬಂಗಾರದ ಅರಿವಾನೊಡು ತುಳುನಾಡ್ ಡ್ ಪಿದಯಿದಕಲೆಗ್ ಬುಡ್ದ್ ಕೊರಿಯೆರ್. ಆಡಳಿತ ಬಾಸೆ ಆದಿತ್ತಿನ ತುಳು,ಅಕೇರಿಗ್ ತನ್ನ ಮಾತಾ ಅಸ್ಥಿತ್ವೊನ್ಲಾ ಕಲೆಯೊಂದು ಬತ್ತ್ಂಡ್.
ಇಂಚ ಒಂಜಿ ಕಾಲೊಡು ರಾಜಾಂಗಣೊದು ಬುಲೆಯೊಂದಿತ್ತಿನ ತುಳು ಮದೆಕ್ ಸೇರ್ಂಡ್. ಪೋರ್ಚುಗೀಸೆರ್ ತುಳುನಾಡ್ ನ್ ಆಕ್ರಮಣ ಮಲ್ಪುನ ಪೊರ್ತುಗು ಮುಲ್ಪ ತುಳು ಕಾಲಿ ಇಲ್ಲದುಲಾಯಿದ ಬಾಸೆ ಆದ್ ಪೋಂಡು. ಶೈಕ್ಷಣಿಕ ಸ್ಥರೊಟು ಆವಡ್ ರಾಜಕೀಯೊಡು ಆವಡ್ ತುಳುತ ದುನಿಪೇ ಕೇನಂದಿಲೆಕ್ಕ ಆಂಡ್. ಇಂಚ ಇತಿಹಾಸದ ಒಂಜೊಂಜಿ ಮುಟ್ಟುಡ್ಲಾ ದಿಂಜೆಲ್ ಜಪ್ಪೆಲ್ ಆದ್, ಅಕೇರಿಗ್ ದೇಶೊಗು ಸ್ವಾತಂತ್ರ್ಯ ತಿಕ್ಕ್ ದ್ ಪೊಲ ರಾಜ್ಯೊಲೆನ ಉದಿಪು ಆನಗ ತುಳುಕು ಅಸ್ಥಿತ್ವನೇ ಇಜ್ಜಿ ಪನ್ಪಿಲೆಕ್ಕ ಕರ್ನಾಟಕ ಬೊಕ್ಕ ಕೇರಳೊಗು ತುಳುನಾಡ್ ನ್ ಪಟ್ಟಿಯೆರ್. ಏರೋ ಕೆಲವು ಜನಕುಲು ಮಲ್ತಿನ ತಪ್ಪುಡು ತುಳುವೆರೆಗ್ ತಿಕ್ಕೊಡಾಯಿನ ಸ್ವಾಯತ್ತತೆ ತಿಕ್ಕಂದಿಲೆಕ್ಕ ಆಂಡ್.
ತುಳು ಕರ್ನಾಟಕೊ ಬೊಕ್ಕ ಕೇರಳೆಗು ಪಟ್ಟಿಬೊಕ್ಕ ನನಲಾತ್ ತರೆಯಿನೇ ಅತ್ತಂದೆ ಒವ್ವೇ ರೀತಿದ ಬುಲೆಚ್ಚಿಲ್ ಆತಿಜಿ. ಈತ್ ವರ್ಸ ಪೊರುಂಬುಂಡಲಾ ತುಳುಕು ಕಡೇ ಪಕ್ಷ ಒಂಜಿ ಆಡಳಿತ ಬಾಸೆ ಆವರೆಲಾ ಅಯಿಜಿ. ತುಳುವ ಜೋಕುಲು ತನ್ಕುಲೆನ ಅಪ್ಪೆ ಬಾಸೆನ್ ಸುರುತ ಬಾಸೆಯಾದ್ ಶಾಲೆಲೆಡ್ ಕಲ್ಪುಲೆಕ್ಕ ಇಜ್ಜಿ. ತುಳುವೆರ್ ಪೆರ್ಮೆಡ್ ತುಳುಟು ಒಂಜಿ ಪಂಚಾಯತಿಡ್ಲಾ ಕಲ್ಪುಲೆಕ್ಕ ಇಜ್ಜಿ. ತುಳುಕು ಸ್ವತಂತ್ರ ಇಲಾಖೆ ಆವಡ್ ಅಭಿವೃದ್ದಿ ಪ್ರಾಧಿಕಾರ ಆವಡ್ ಇಜ್ಜಿ. ತುಳುಟು ಒರಿ ಶಾಸಕೆ ಸಂಸದೆ ಪ್ರಮಾಣವಚನ ದೆತೊನುನ ಲೆಕ್ಕ ಇಜ್ಜಿ. ಏತೋ ಮಲ್ಲ ಸಾಹಿತಿಯಾಂಡಲಾ ಆಯೆ ತುಳುಟು ಬರೆಂಡ ಆಯಗ್ ಜ್ಞಾನಪೀಠ ಪ್ರಶಸ್ತಿ ತಿಕ್ಕುಜಿ. ಕೋರ್ಟುಲೆಡ್ ತುಳುಟು ವಾದ ಮಲ್ಪುನಲೆಕ್ಕ ಇಜ್ಜಿ. ಈ ರಾಜ್ಯೊಲೊನ ವಿಶ್ವವಿದ್ಯಾಲಯೊಡು ತುಳುಕು ಒಂಜಿ ಸ್ವತಂತ್ರ ವಿಭಾಗಲಾ ಇಜ್ಜಿ. ತುಳು ಕಲ್ಪಾವುನ ಟೀಚರ್ನಕಲೆಗ್ ಸರಕಾರೊರ್ದು ಒವ್ವೇ ಬೆರಿಬಲ ಇಜ್ಜಿ. ತೂವರೆ ಪೋಂಡ ತುಳುನು ಕರ್ನಾಟಕ ಬೊಕ್ಕ ಕೇರಳ ಕೆರಿಯರೆ ತೂಯಿನಿ ಅತ್ತಂದೆ ಒರಿಪಾವರೆ ತೂಯಿಜೆರ್.
ಅಂಚ ತುಳುಕು ಆಪಿನ ಅಂಚೆನೆ ಆವೊಂದಿಪ್ಪುನ ಅನ್ಯಾಯೊಲೆನ್ ತೂದು ನನದ ಜವನೆರ್ ಉಂದೆನ್ ಒತ್ತೊನರೆ ಸಾಧ್ಯ ಆವಂದೆ ಕರ್ನಾಟಕ ಬೊಕ್ಕ ಕೇರಳ ರಾಜ್ಯ ಆತಿನ ದಿನೊನು ತುಳುನಾಡ್ ಗ್ ಕರಾಳ ದಿನ ಪನ್ದ್ ಆಚರಿಪುವ ಪನ್ದ್ ಪನೊಂದುಲ್ಲೆರ್. ಈ ಅನ್ಯಾಯೊಲು ಇಂಚೆನೇ ದುಂಬರಿಂಡ ತುಳು ಅಳಿದ್ ಪೋವು, ತುಳುಕು ಕನ್ನಡ ಬೊಕ್ಕ ಮಲಯಾಳಂಗ್ ಸಮವಾಯಿನ ಸ್ಥಾನಮಾನ ಬೋಡು ಇಜಿಂಡ ತುಳುನಾಡ್ ಪ್ರತ್ಯೇಕ ರಾಜ್ಯ ಆವೊಡು ಪನ್ದ್ ಪೊರುಂಬಾಟಗಾರೆರ್ ಪನೊಂದುಲ್ಲೆರ್.