Last updated on November 18th, 2024 at 12:45 pm
ಶಬರಿಮಲೆ : ವರ್ಸೊಲ ನಡಪುನ ಶಬರಿಮಲೆ ಮಂಡಲ ಪೂಜೆದ ಋತು ತೊಡಂಗ್‌ದಿತ್ತ್‌ದ್ ಅ್ಂದೆತ ಬೆರಿಟೇ ಕುಖ್ಯಾತ ಕಲ್ವೆರೆನ ‘ಕುರುವ ಗ್ಯಾಂಗ್’ ಸಕ್ರಿಯ ಆದಿತ್ತ್‌ದ್ ಈ ಬಗೆಟ್ ಎಚ್ಚರ್ಗೆಡ್ ಉಪ್ಪೆರ ಶಬರಿಮಲೆ ಯಾತ್ರಿಕೆರ್ ಅಂಚೆನೇ ಸ್ಥಳಿಯೆರೆಗ್ ಪೊಲೀಸ್ ಇಲಾಖೆ ಸೂಚನೆ ಕೊರ್ತುಂಡು.
ಆಲಪ್ಪುಳಡ್ ಶಂಕಿತ ಕುರುವ ಗ್ಯಾಂಗ್ ಇಪ್ಪುನೆನ್ ಕೇರಳ ಪೊಲೀಸೆರ್ ಖಚಿತ ಮಲ್ತ್‌ದೆರ್. ತಮಿಳುನಾಡ್‌ರ್ದ್ ಬೈದಿನ ಈ ಕುಖ್ಯಾತ ಗ್ಯಾಂಗ್ ದುಂಬುರ್ದಿಂಚಿಲಾ ತೀರ್ಥಯಾತ್ರೆದ ಪೊರ್ತುಡು ಲಕ್ಕೊಂದು ಕಲ್ವೆಗ್ ಜಪ್ಪುಂಡು ಪಂದ್ ಅಲಪ್ಪುಳದ ಉಪ ಪೊಲೀಸ್ ವರಿಷ್ಠಾಧಿಕಾರಿ ಮಧು ಬಾಬು ಎಂಆರ್ ಪನ್ತೆರ್. ಸಾಮಾನ್ಯವಾದ್ ಕಂಡುನ ಜಾಗೆಲೆನ್ ಪಗೆಲ್‌ಡ್ ಬತ್ತ್‌ದ್ ತೂಪೆರ್, ಕಮ್ಮಿ ಭದ್ರತೆ, ಕಮ್ಮಿ ಜನ ಇತ್ತಿನ ಅಂಚೆನೇ ಕ್ಯಾಶುಯಲ್ ಬೀಗ ಇತ್ತಿನ ಇಲ್ಲ್‌ಲೆನೇ ಅಜತ್‌ದ್ ರಾತ್ರೆ ಕಲ್ವೆಗ್ ಜಪ್ಪುವೆರ್.
ಈ ಗ್ಯಾಂಗ್ ಕೂಪೆ ಕೂಪೆ ಆದ್ ಬೇಲೆ ಮನ್ಪುಂಡು. ಅಂಬಲಪ್ಪುಳ ಬೊಕ್ಕ ಕಾಯಂಕುಲಂದಂಚಿನ ರೈಲ್ವೆ ಉಂತಡೆಲೆನ ಬರಿಟ್ ಇತ್ತೊಂದು ಬೊಕ್ಕ ಕಕಡೆರೆ ಎಲ್ಯ ಎಲ್ಯ ಕೂಪೆ ಆದ್ ಪೋಪೆರ್ ಪನ್ದ್ ಪೊಲೀಸರು ತೆರಿಪಾದೆರ್. ಕಂಡೆರೆ ದಂಬು ಕುಡ್ಚಿದ್, ಮೋನೆಗ್ ಕುಂಟು ಅತ್ತ್ಂಡ ಮಾಸ್ಕ್ ಬೊಕ್ಕ ಅರ್ಧ ಚಡ್ಡಿ ಪಾಡೊಂದು ಕಂಡೆರೆ ಪಿದಡುವೆರ್ ಪನ್ದ್ ಪೊಲೀಸೆರ್ ಒಲವು ಕೊರ್ತೆರ್. ಕರಿನ ಮಾಲೆ ಪಾಡ್ದ್ ಪೋಪಿನ ಪೊರ್ತುಲೆಡ್ ಕುರುವ ಗ್ಯಾಂಗ್‌ದ ಪ್ರಕರಣೊಲು ವರದಿಯಾದಿತ್ತ. ವಾರ್ಷಿಕ ಶಬರಿಮಲೆ ಮಂಡಲ ಪೂಜಾ ಋತುಟ್ ಗಾಡಿಲು ಅಂಚೆನೇ ಪ್ರಯಾಣಿಕೆರ್ ಎಚ್ಚಿನ ಪ್ರಮಾಣೊಡು ಇಪ್ಪುನೆಡ್ದಾತ್ರ ರಾತ್ರೆ ಗಸ್ತ್‌ದ ಪೊರ್ತುಡು ಪತ್ತ ತಪಾಸಣೆ ಮನ್ಪೆರ ಬಂಙ ಆಪುಂಡು. ಅಂಚಾದ್ ಸಾರ್ವಜನಿಕೆರ್ ಬೊಕ್ಕ ಯಾತ್ರಿಕೆರ್ ಜಾಗ್‌ರ್ತೆಡ್ ಇಪ್ಪೆರ ಸೂಚನೆ ಕೊರ್ತೆರ್.
ಈ ನಡುಟು ಕುರುವ ಗ್ಯಾಂಗ್‌ದಾಯೆ ಒರಿ ಸನಿಯಾರ ಎರ್ನಾಕುಲಂದ ಕುಂದನ್ನೂರ್‌ಡ್ ಪೊಲೀಸ್ ಕಸ್ಟಡಿರ್ದ್ ತಪ್ಪಾದ್ ಪದ್ರಾಡಾದಿತ್ತೆ. ಆರೋಪಿನ್ ತಮಿಳುನಾಡ್ ಮೂಲೊದ ಸಂತೋಷ್ ಪನ್ದ್ ಗುರ್ತ ಪತ್ತಿತ್ತ್‌ದ್, ಆಯನ್ ಆಲಪ್ಪುಳರ್ದ್ ಕೈದ್ ಮಲ್ತ್ ಪೋನಗ ಎರ್ನಾಕುಲಂದಲ್ಪ ಪೊಲೀಸ್ ಕಸ್ಟಡಿರ್ದ್ ತಪ್ಪಾವೊಂದೆ. ಪ್ರಾಥಮಿಕ ಪುರಾಪುಲೆನ ಆಧಾರೊಡು ಪೊಲೀಸೆರ್ ಪ್ರಸ್ತುತ ಶಂಕಿತನ ರೇಖಾಚಿತ್ರದೊಟ್ಟುಗು ಕಾರ್ಯಾಚರಣೆ ಸುರು ಮಲ್ತ್‌ದ್ ಆಯನ್ ಪತ್ತ್‌ದೆರ್.