Last updated on December 3rd, 2024 at 09:57 am
ಕಡಬ: ಕರಿನ ಕೆಲ ದಿನೊರ್ದಿಂಚಿ ನಾಪತ್ತೆಯಾದಿತ್ತಿನ ಕಡಬ ತಾಲೂಕ್‌ದ ಬಿಳಿನೆಲೆ ಗ್ರಾಮೊದ ಮುಂಗ್ಲಿಮಜಲು ನಿವಾಸಿ ದಿ| ಶಾಂತಪ್ಪ ಗೌಡೆರೆನ ಮಗೆ ಸಂದೀಪ್‌ ಗೌಡ (29) ಪನ್ಪಿನಾರೆನ ಮೃತದೇಹ ನೆಟ್ಟಣ ರೈಲ್ ಉಂತಡೆರ್ದ್ ಸುಮಾರ್ 1.5 ಕಿ.ಮೀ. ದೂರ ನಾರಡ್ಕ ಕಾಡ್‌ಡ್ ಕುರಿನ ಸ್ಥಿತಿಟ್ ಸೋಮಾರ ಬಯ್ಯಡ್ ತಿಕ್ಕ್‌ದ್ಂಡ್.
ಆರೆನ್ ಪಾಸಾಡಿ, ನೆಟ್ಟಣ ನಿವಾಸಿ ಪ್ರತೀಕ್‌ ಪನ್ಪಿನಾಯೆ ಕಾಸ್‌ದ ಇಸಯೊಗು ಸಂಬಂಧಿತ್‌ದ್ ನೆಟ್ಟಣ ರೈಲ್ ಉಂತಡೆದಲ್ತ ಗುಡ್ಡೆಡ್ ಕರ್ಬದ ರಾಡ್‌ಡ್ ಆಕ್‌ದ್ ಕೆರ್ದ್ ಪುನೊನು ಕಾಡ್‌ದುಲಯಿ ಕೊನೊದು ಪೊತ್ತಾಯೆರ ತೂತಿನ ಜಡ್ತೆಡ್ ತೆರಿದ್ ಬೈದ್ಂಡ್.
ನಡಕೆದ ಒಲವು
ಸಂದೀಪ್‌ ಮರ್ದಾಳಡ್ ವಿನಯೆ ಪನ್ಪಿನಾರೆನೊಟ್ಟುಗು ಶಾಮಿಯಾನದ ಬೇಲೆ ಮಲ್ತೊಂದಿತ್ತ್‌ದ್, ನ. 27 ತಾನಿ ಕಾಂಡೆ ಬೇಲೆಗ್ ಇಲ್ಲರ್ದ್ ಪೋತಿನಾರ್ ನಾಪತ್ತೆ ಆದಿತ್ತೆರ್. ಆರ್ ಬೇಲೆ ಆದ್ ಪ್ರತೀಕ್‌‌ನ ಒಟ್ಟುಗು ಕಾರ್‌ಡ್ ಪೋತೆ ಪನ್ದ್ ಅಪ್ಪೆ ತೆರಿಪಾದಿತ್ತೆರ್. ಅಂಚೆನೇ ಪ್ರತೀಕ್‌ ಬೊಕ್ಕ ಕುಡೊರ್ಯನ್ ಪೊಲೀಸೆರ್ ಡಿ. 1ತಾನಿ ವಶೊಕು ಗೆತೊಂದು ವಿಚಾರಣೆ ಮಲ್ತಿನಪಗ ಕೊಲೆತ ಗುಟ್ಟು ಪಿದಯಿ ಬೈದ್ಂಡ್.