Last updated on January 13th, 2025 at 10:59 am
ಕುಡ್ಲ ಜನವರಿ 13: ರಾಕ್ ಸ್ಟಾರ್ ರೂಪೇಶ್ ಶೆಟ್ರೆನ ನಿರ್ದೇಶನೊಡು ಬಣ್ಣ ಪಾಡೆರೆ ಬಾಲಿವುಡ್ ನಟೆ ಸುನೀಲ್ ಶೆಟ್ಟಿ ಜನವರಿ 14 ಕ್ ತುಳುನಾಡ್‌ಗ್ ಬರೊಂದುಲ್ಲೆರ್.
ಪಾಕ ವರ್ಸೊರ್ದಿಂಚಿ ತುಳು ಸಿನಿಮಾಡ್ ಬೇಲೆ ಮನ್ಪುನ ಅಂಗಲ್ಪು ಆರೆಗ್ ಇತ್ತ್ಂಡ್. ಆಂಡ ಈತ್‌ನೇಟ ಅವು ಆದಿಜ್ಜಂಡ್. ಇತ್ತೆ ರೂಪೇಶ್ ಶೆಟ್ಟಿ ನಿರ್ದೇಶನೊದ ಜೈ ತುಳು ಸಿನಿಮಾಡ್ ಸುನೀಲ್ ಶೆಟ್ಟಿ ಪ್ರಮುಖ ಪಾತ್ರೊಡು ನಟನೆ ಮನ್ಪೆರ ಉಲ್ಲೆರ್. ಜನವರಿ 15 ರ್ದ್ ಸುನೀಲ್ ಶೆಟ್ರೆನ ಶೂಟಿಂಗ್ ನಡಪುಂಡು. ಉಂದು ಜೈ ಸಿನಿಮಾದ ಅಕೇರಿದ ಹಂತೊದ ಶೂಟಿಂಗ್ ಆದುಂಡು
“ಜೈ” ಸಿನಿಮಾ ತುಳುಟ್ ಬಿಗ್ ಬಜೆಟ್ ಸಿನಿಮಾ ಆದಿತ್ತ್‌ದ್, ಕುತ್ತಾರ್, ದಂಬೇಲ್, ಮರಕಡ, ಶೂಲಿನ್ ಪ್ಯಾಲೇಸ್ ಮರವೂರು, ಬೊಂದೇಲ್ ಪಣಂಬೂರು, ಬೈಕಂಪಾಡಿಡ್ ಶೂಟಿಂಗ್ ನಡತ್‌ದ್ಂಡ್. ತುಳುತ ಪುಗರ್ತೆದ ಕಲಾವಿದೆರ್ ಸಿನಿಮಾಡ್ ಉಲ್ಲೆರ್. ಗಿರಿಗಿಟ್, ಗಮ್ಜಾಲ್, ಸರ್ಕಸ್ ಚಿತ್ರೊಲೆರ್ದ್ ಬೊಕ್ಕ ರೂಪೇಶ್ ಶೆಟ್ಟಿ ಮೇರ್ ಕುಡೊಂಜಿ ಬಿಗ್ ಬಜೆಟ್ ಸಿನಿಮಾಗ್ ಕೈ ಪಾಡ್ದೆರ್. ಜೈ ಸಿನಿಮಾ ಆರ್ ಎಸ್ ಸಿನಿಮಾಸ್, ಶೂಲಿನ್ ಫಿಲಂಸ್, ಮುಗ್ರೋಡಿ ಪ್ರೊಡಕ್ಷನ್ ಲಾಂಛನೊಡು ನಿರ್ಮಾಣ ಆವೊಂದುಂಡು.
ರೂಪೇಶ್ ಶೆಟ್ಟಿ ಸಿನಿಮಾದ ನಿರ್ದೇಶಕೆರಾದಿತ್ತ್‌ದ್, ಕತೆ ಬೊಕ್ಕ ಸಂಭಾಷಣೆನ್ ಪ್ರಸನ್ನ ಶೆಟ್ಟಿ ಬೈಲೂರು ಬರೆತೆರ್. ಕ್ಯಾಮರಾ ವಿನುತ್ ಕೆ, ಸಂಗೀತ ಲೊಯ್ ವೆಲೆಂಟಿನ್ ಸಲ್ದಾನ, ಸಂಕಲನ ರಾಹುಲ್ ವಸಿಷ್ಠ, ನಿರ್ಮಾಪಕೆರ್ ಅನಿಲ್ ಶೆಟ್ಟಿ, ಸುಧಾಕರ ಶೆಟ್ಟಿ ಮುಗ್ರೋಡಿ, ಮಂಜುನಾಥ ಅತ್ತಾವರ, ಒತ್ತು ನಿರ್ಮಾಪಕೆರ್ ದೀಕ್ಷಿತ್ ಆಳ್ವ, ನೃತ್ಯ ಬೊಕ್ಕ ಎಕ್ಸಿಕ್ಯೂಟಿವ್ ಪ್ರೊಡ್ಯುಸರ್ ನವೀನ್ ಶೆಟ್ಟಿ ಆರ್ಯನ್ಸ್. ಜೈ ಸಿನಿಮಾಡ್ ದೇವದಾಸ್ ಕಾಪಿಕಾಡ್, ನವೀನ್ ಡಿ ಪಡೀಲ್, ರಾಜ್ ದೀಪಕ್ ಶೆಟ್ಟಿ, ಅರವಿಂದ ಬೋಳಾರ್, ಭೋಜರಾಜ ವಾಮಂಜೂರು, ಪ್ರಸನ್ನ ಶೆಟ್ಟಿ ಬೈಲೂರು, ಸಂದೀಪ್ ಶೆಟ್ಟಿ ಮಾಣಿಬೊಟ್ಟು, ಉಮೇಶ್ ಮಿಜಾರ್, ಇಂಚಿನ ಕಲಾವಿದೆರ್ ಬಣ್ಣ ಪಾಡುವೆರ್. ನಾಯಕಿಯಾದ್ ಅದ್ವಿತಿ ಶೆಟ್ಟಿ ಉಲ್ಲೆರ್.