ಕಾಸ್ರೋಡ್ – ಪಿಸ್ತಾದ ಚೋಲಿ ಕಂಟೆಲ್‌ಡ್ ತಿಕೊಂದು ರಡ್ಡ್ ವರ್ಸೊದ ಬಾಲೆ ತೀರ್ಂಡ್

Last updated on January 13th, 2025 at 03:07 pm

ಕಾಸ್ರೋಡ್ ಜ. 13: ರಡ್ಡ್ ವರ್ಸ ಪ್ರಾಯದ ಬಾಲೆ ಒಂಜಿ ಪಿಸ್ತಾದ ಚೋಲಿನ್ ತನ್ದಿನೆರ್ದಾವರ ಚೋಲಿ ದೊಂಡೆಡ್ ತಿಕೊಂದು ತೀರ್ದಿನ ನಡಕೆ ಕಾಸ್ರೋಡ್ ಜಿಲ್ಲೆದ ಕುಂಬ್ಳೆಡ್ ಐತಾರ ಬಯ್ಯಡ್.

ತೀರ್ದಿನ ಬಾಲೆನ್ ಕುಂಬ್ಳೆ ಭಾಸ್ಕರ ನಗರದ ನಿವಾಸಿ ಅನ್ವರ್- ಮೆಹರೂಫಾ ದಂಪತಿಲೆನ ಮಗೆ ಅನಸ್ ಪನ್ದ್ ಗುರ್ತ ಪತ್ತ್‌ದೆರ್. ಸನಿಯಾರ ಬಯ್ಯಡ್ ಪಿಸ್ತಾ ತಿನ್ನಗ ಚೋಲಿ ಕಂಟೆಲ್‌ಡ್ ತಿಕೊಂದಿತ್ತ್‌ದ್, ಇಲ್ಲದಕುಲು ಚೋಲಿದ ಒಂಜಿ ತುಂಡುನು ಪಿದಯಿ ದೆತ್ತ್‌ದೆರ್. ಅವೆರ್ದ್ ಬೊಕ್ಕ ಬಾಲೆನ್ ಆಸ್ಪತ್ರೆಗ್ ಲೆತೊಂದು ಪೋತೆರ್. ಬೈದ್ಯೆರ್ ತೂದು ದೊಂಡೆಡ್ ಒವ್ವೇ ಸೊತ್ತುಲು ತಿಕೊಂದಿಜಿ ಪನ್ದ್ ಪನ್ಡಿನೆರ್ದಾವರ ಇಲ್ಲಗ್ ಪಿರ ಲೆತೊಂದು ಬತ್ತ್‌ದೆರ್ ಪನ್ದ್ ತೆರಿದ್ ಬೈದ್ಂಡ್.

ಆಂಡ, ಐತಾರ ಕಾಂಡೆ ಬಾಲೆಗ್ ದಮ್ಮು ದೆಪ್ಪೆರೆ ಆವೊಂದಿತ್ತಿಜಿ. ಅಪ್ಪಗನೆ ಆಸ್ಪತ್ರೆಗ್ ಲೆತೊಂದು ಪೋಂಡಲಾ ಜೂವ ಒರಿತೊನೆರೆ ಆತಿಜಿ. ಬಾಕಿಯಾದಿತ್ತಿನ ಪಿಸ್ತಾದ ಚೋಲಿ ಶ್ವಾಸಕೋಶದುಲಯಿ ಒರಿದಿನೆರ್ದಾವರ ಬಾಲೆಗ್ ದಮ್ಮು ದೆಪ್ಪೆರಾವಂದೆ ತೀರ್ದ್ಂಡ್ ಪನ್ದ್ ತೆರಿದ್ ಬೈದ್ಂಡ್. ಪರದೇಸೊಡು ಇಪ್ಪುನ ಬಾಲೆದ ಅಮ್ಮೆ ಅನ್ವರ್ ಕರಿನ ವಾರೊಡಾತೆ ರಜೆಟ್ ಊರ್‌ಗ್ ಬತ್ತಿತ್ತ್‌ದ್, ರಜೆ ಮುಗಿದ್ ಒಂತೆ ದಿನೊಕು ದುಂಬು ಪಿರ ಪರದೇಸೊಗು ಪೋದಿತ್ತೆರ್.