Last updated on January 29th, 2025 at 01:38 pm
ಕುಂಬ್ಳೆ: ನಿಧಿ ನಾಡೆರ ಪುರಾತತ್ವ ಇಲಾಖೆದಡಿಟ್ ಬರ್ಪುನ ಕುಂಬ್ಳೆ ಆರಿಕ್ಕಾಡಿದ ಪಿರಾಕ್‌ದ ಕೋಟೆದ ಉಲಯಿ ಗರಿತಿನೆಕ್ ಮೊಗ್ರಾಲ್ ಪುತ್ತೂರು ಪಂಚಾಯತ್ ಉಪಾಧ್ಯಕ್ಷೆ ಸೇರ್ದ್ ಐವೆರೆನ್ ಕುಂಬ್ಳೆ ಪೊಲೀಸೆರ್ ಕೈದ್ ಮಲ್ದೆರ್.
ಕೈದಾತಿನಕ್ಲೆನ್ ಮೊಗ್ರಾಲ್ ಪುತ್ತೂರು ಪಂಚಾಯತ್ ಉಪಾಧ್ಯಕ್ಷೆ ಮುಜೀಬ್ ರಹ್ಮಾನ್‌ ಯಾನೆ ಮುಜೀಬ್ ಕಂಬಾರ್ (46), ಪೊವ್ವಲ್‌ ನಿವಾಸಿ ಮೊಹಮ್ಮದ್‌ ಫಿರೋಸ್‌ (28), ಮೊಗ್ರಾಲ್ ಪುತ್ತೂರ್‌ದ ಜಾಫರ್‌ (26), ಪಾಲಕುನ್ನ್‌ದ ಅಜಾಸ್‌ (26), ನೀಲೇಶ್ವರ ಬಂಗಳದ ಸಹದುದ್ದೀನ್‌(26) ಪನ್ದ್ ಗುರ್ತ ಪತ್ತ್‌ದೆರ್.
ಕೋಟೆದ ಉಲಯಿ ಕೆಲ ಜವನೆರ್ ಗರ್ತೊಂದುಲ್ಲೆರ್ ಪನ್ಪಿನ ಒಲವು ಆಧರಿತ್‌ದ್ ಪೊಲೀಸೆರ್ ದಾಳಿ ಮಲ್ದೆರ್. ಜವನೆರೆನ್ ವಶೊಕು ಗೆತೊಂದು ವಿಚಾರಣೆ ಮಲ್ಪುನಗ ಮೊಗ್ರಾಲ್ ಪುತ್ತೂರು ಪಂಚಾಯ್ತಿ ಉಪಾಧ್ಯಕ್ಷೆ ಮುಜೀಬ್ ಕಂಬಾರ್ ಪನ್ಪಿನಾಯನ ಸೂಚನೆದ ಲೆಕ ಕೊಪ್ಪರಿಗೆ ನಾಡೊಂದಿತ್ತೆರ್ ಪನ್ದ್ ತೆರಿಪಾದೆರ್. ಜಾಗೆಡ್ ಕೊಟ್ಟು, ಅಂಚೆನೇ ಗರಿಪೆರ ಬೋಡಾಪಿನ ಸೊತ್ತುಲು ತಿಕ್ಕ್‌ದಿತ್ತ್‌ದ್ ಪೋಲೀಸೆರ್ ವಶೊಕು ಗೆತೊಂದೆರ್.
ಕೋಟೆದ ಉಲಯಿ ಜನೊಕುಲು ಇಪ್ಪುನ ಸಬ್ದ ಕೇನೊಂದಿತ್ತ್‌ದ್, ಏರ್ ಪನ್ದ್ ತೂಯೆರ ಮುಟ್ಟದಕುಲು ಪೋದಿತ್ತೆರ್.
ಜನೊಕುಲು ಬರೊಂದುಪ್ಪುನೆನ್ ತೂದು ಜವನೆರ್ ಪದ್ರಾಡಾಯೆರ ತೂದಿತ್ತ್‌ದ್, ಆತೆಟೇ ಒಂಜಿ ರಡ್ಡ್ ಜನನ್ ಪತ್ತ್‌ದ್ ಪೊಲೀಸೆರೆನ್ ಲೆಪ್ಪುಡಾದೆರ್. ಪೊಲೀಸೆರ್ ಜವನೆರೆನ್ ವಶೊಕು ಗೆತೊಂದು ವಿಚಾರಣೆ ಮಲ್ತ್‌ದಾನಗ, ಕಣ್ಣೂರ್‌ದ ಒಂಜಿ ಸಂಘೊದ ಕಾರ್ಯಕರ್ತೆರ್ ಈ ಬಗೆಟ್ ಪಾತೆರೊಂದಿತ್ತ್‌ದ್ ಕೋಟೆದ ಉಲಯಿ ಕೊಪ್ಪರಿಗೆ ಇಪ್ಪುನ ವದಂತಿ ಇತ್ತ್ಂಡ್. ಅಂಚಾದ್ ಗುವೆಲ್‌ದ ಉಲಯಿ ಗರಿತೊಂದಿತ್ತ ಪನ್ದ್ ಪನ್ತೆರ್. ಪೊಲೀಸೆರ್ ಆರೋಪಿಲೆನ್ ಸ್ಟೇಶನ್ ಜಾಮೀನ್‌ಡ್ ಬುಡುಗಡೆ ಮಲ್ತ್‌ದೆರ್.