ಒಡಿಪು : ಡಿಜಿಟಲ್ ಅರೆಸ್ಟ್ ಪುದರ್‌ಡ್ ದಗೆ – ಆರೋಪಿ ಕೈದ್, 7ಲಕ್ಷ ರೂ. ಕಾಸ್ ವಶೊಕು

Last updated on February 3rd, 2025 at 12:08 pm

ಒಡಿಪು : ಡಿಜಿಟಲ್ ಅರೆಸ್ಟ್ ಮಲ್ತ್‌ದ ಪಂದ್ ಪೋಡಿಕಟ್ಟಾದ್ ಒಡಿಪುದ ಒರಿಯಗ್ 89‌ ಲಕ್ಷ ರೂ. ದಗೆ ಮಲ್ದಿನ ಪ್ರಕರಣೊದ ಆರೋಪಿನ್ ಒಡಿಪು ಸೆನ್ ಪೊಲೀಸೆರ್ ಧಾರವಾಡಡ್ ಕೈದ್ ಮಲ್ದೆರ್. ಯಾದಗಿರಿ ಜಿಲ್ಲೆದ ಶಹಾಪುರ್ ನಿವಾಸಿ ಕಿರಣ್ (24) ಕೈದಾತಿನ ಆರೋಪಿ. ಉಂಬ್ಯರ್ದ್ ಒಟ್ಟು ಏಳ್ ಲಕ್ಷ ರೂ. ಕಾಸ್‌ನ್ ಪೊಲೀಸೆರ್ ವಶೊಕು ಗೆತೊಂದೆರ್.

ಒಡಿಪುದ ಬಂಗಾರ್ದ ಕಟ್ಟೆದ ದನಿ ಒರಿಯಗ್ ಸೆ.11ತಾನಿ ಗುರ್ತದಾಂತಿನಕುಲು ಕಾಲ್ ಮಲ್ತ್‌ದ್, ಅಕ್ರಮ ಎಡ್ವರ್ಟೈಸ್‌ಮೆಂಟ್, ಸೊಲ್ಲಂಜ ಕಡಪುಡ್ದಿನೆಕ್ ಈರೆನ ಮಿತ್ತ್ ಒಟ್ಟು 17 ಪ್ರಕರಣೊಲು ದಿಕಲಾದಿತ್ತ್‌ದ್, ಈರೆನ್ ಮಿತ್ತ್ ಅರೆಸ್ಟ್ ವಾರಂಟ್ ಆತ್ಂಡ್ ಪನ್ದ್ ಪೋಡ್ಯಾದೆರ್. ಅವೆರ್ದ್ ಬೊಕ್ಕ ಪೊಲೀಸ್ ಅಧಿಕಾರಿನ ಯೂನಿಫಾರ್ಮ್‌ಡ್ ವಾಟ್ಸಪ್ ವಿಡಿಯೋ ಕಾಲ್ ಮಲ್ತ್‌ದ್, ಮನಿ ಲಾಂಡ್ರಿಂಗ್ ಮಲ್ತ್‌ದರ್ ಪನ್ಡ್‌ದ್ ಆದಾಯೊದ ಮೂಲ ಪರಿಶೀಲನೆ ಮನ್ಪೆರ ಪನ್ಡ್‌ದ್, ವರ್ಚುವಲ್ ಅರೆಸ್ಟ್ ಮನ್ಪುವ ಪನ್ದ್ ಪೋಡ್ಯಾದೆರ್. ಆ ಪ್ರಕಾರ ಸಂತೋಷ್ ಕುಮಾರ್‌ರೆನ್ ಪೋಡ್ಯಾದ್ ಆರೆರ್ದ್ 89,00,000ರೂ. ಕಾಸ್‌ನ್ ತನ್ಕುಲೆ ಅಕೌಂಟ್‌ಗ್ ಪಾಡ್ಪಾವೊಂದು ದಗೆ ಮಲ್ತಿತ್ತೆರ್. ಈ ಬಗೆಟ್ ಸಂತೋಷ ಕುಮಾರ್ ಬರೆಪಾದಿನ ಒಯಿಲ್‌ದ ಪ್ರಕಾರ ಒಡಿಪು ಸೆನ್ ಪೊಲೀಸ್ ಸ್ಟೇಶನ್‌ಡ್ ಪ್ರಕರಣ ದಾಕಲಾದಿತ್ತ್ಂಡ್.

ಈ ಬಗೆಟ್ ಸೆನ್ ಪೊಲೀಸ್ ನಿರೀಕ್ಷಕೆ ರಾಮಚಂದ್ರ ನಾಯಕ್ ಮುತಾಲಿಕೆದ ಕೂಟ ಕೇರಳ ರಾಜ್ಯ ಬೊಕ್ಕ ಮಹಾರಾಷ್ಟ ರಾಜ್ಯೊದ ಪುಣೆಟ್ ಕಾರ್ಯಾಚರಣೆ ಮಲ್ತ್‌ದ್ ಕಿರಣ್‌ನ್ ಧಾರವಾಡಡ್ ಪತ್ತ್‌ದ್, ಒಂಜಿ ಮೊಬೈಲ್ ಫೋನ್ ಬೊಕ್ಕ 5 ಲಕ್ಷ ರೂ. ಕಾಸ್ ವಶ ಮಲ್ತೊಂದೆರ್. ಉಂದೆಕ್ ದುಂಬು ಕೇರಳ ರಾಜ್ಯೊದ ಮೊಹಮ್ಮದ್ ನಿಶಾಮ್ ಸಿ.ಕೆ. ಪನ್ಪಿನಾಯನ ಅಕೌಂಟ್‌ಗ್ ಈ ಪ್ರಕರಣೊಗು ಸಂಬಂಧಿತ್‌ದ್ ಜಮೆ ಆತಿನ 2 ಲಕ್ಷ ರೂ.ನ್ಲಾ ಪೊಲೀಸೆರ್ ವಶೊಕು ಗೆತೊಂದೆರ್ ಪನ್ದ್ ತೆರಿದ್ ಬೈದ್ಂಡ್.

Share
error: Content is protected !!