Last updated on February 12th, 2025 at 05:32 pm
ಮುಲ್ಕಿ: ಮುಲ್ಕಿದ ಒಂಜಿ ಇಂಗ್ಲಿಷ್ ಮೀಡಿಯಮ್ ಶಾಲೆದ ಜೋಕುಲೆನ್, ಕಾರ್‌ಡ್ ಬತ್ತಿನಕುಲು ಕಿಡ್ನಾಪ್ ಮನ್ಪೆರೆ ತೂತಿನ ಪ್ರಕರಣ ತೈರ್‌ದ್ ಬೊಲ್ಪುಗು ಬೈದ್ಂಡ್.
ಮುಲ್ಕಿದ ಗ್ರಾಮಾಂತರ ಪ್ರದೇಶೊಡುಪ್ಪುನ ಶಾಲೆದ ಸಾದಿಡ್ ಓಮ್ಮಿ ಕಾರ್‌ಡ್ ಕುಲೊಂದು ಕೆಲವೆರ್ ಜೋಕುಲೆಗ್ ಚಾಕಲೇಟ್ ತೋಜಾದ್ ಮುಟ್ಟ ಬರ್ಯೆರ ಲೆತ್ತೊಂದಿತ್ತೆರ್. ಊರ್‌ಗ್ ಪೊಸಬೆರ್ ಆತಿನೆರ್ದಾವರ ಜೋಕುಲು ಮುಟ್ಟ ಪೋವಂದೆ ಇತ್ತಿನೆರ್ದಾವರ ಈ ಗ್ಯಾಂಗ್‌ದ ಒರಿ, ಜೋಕುಲೆಗ್ ಬೀಸತ್ತಿ ತೋಜಾದ್ ಪೋಡ್ಯಾದಿತ್ತೆ. ಪೋಡಿನ ಜೋಕುಲು ಅಪಗನೆ ಪಿರ ಶಾಲೆಗ್ ಬಲ್ತ್‌ದ್ ಪೋದು ಮುಖ್ಯ ಶಿಕ್ಷಕೆರೆಗ್ ವಿಷಯ ತೆರಿಪಾದೆರ್.
ಮುಖ್ಯಶಿಕ್ಷಕೆರ್ ಬೊಕ್ಕ ಬೇತೆ ಜೋಕುಲು ಜಾಗೆಗ್ ಬತ್ತಿನೇ ಆರೋಪಿಲು ಕಾರ್‌ಡ್ ಪದ್ರಾಡಾತೆರ್. ಶನಿವಾರ ನಡಕೆ ನಡತಿತ್ತ್‌ದ್, ಅಂಗಾರೆ ಬೊಲ್ಪುಗು ಬೈದ್ಂಡ್.
ಶಾಲಾ ಆಡಳಿತ ಮಂಡಳಿ ಅಪಗನೇ ಮುಲ್ಕಿ ಪೊಲೀಸೆರೆಗ್ ಒಲವು ಕೊರ್ದು ಆರೋಪಿಲೆನ್ ಪತ್ತೆರೆ ಬಿನ್ನಪು ಮಲ್ದೆರ್. ಪೊಲೀಸೆರ್ ಸಿಸಿ ಕೆಮರಾ ಪರಿಶೀಲಿತ್‌ದ್ ಆರೋಪಿಲೆನ್ ಪತ್ತೆರೆ ಕಾರ್ಯಾಚರಣೆ ಮಲ್ತೊಂದುಲ್ಲೆರ್. ಶಾಲೆದ ಸಿಸಿಟಿವಿ ಪರಿಶೀಲನೆ ಮಲ್ತಿತ್ತ್‌ದ್, ಅವೆಟ್ ಬೊಲ್ದು ರಂಗ್‌ದ ಮಾರುತಿ ಓಮ್ನಿ ಶಾಲೆದ ಸುತ್ತುಮದೆಲ್‌ದ ಪಿದಯಿ ಸಾದಿಡ್ ಉಂತುದಿನ ತೋಜಿದ್ಂಡ್. ವಿದ್ಯಾರ್ಥಿಲು ಕಾರ್‌ದ ಕೈತಲ್‌ರ್ದ್ ಪೋಡಿದ್ ಪಿರ ಬಲ್ಪುನಲ ತೋಜಿದ್ಂಡ್. ಆಂಡ ಕಾರ್‌ದ ರಿಜಿಸ್ಟ್ರೇಷನ್ ನಂಬ್ರ ತೆರಿದ್ ಬೈದಿಜಿ.
ಪೊಲೀಸ್ ರೌಂದು
ನಡಕೆರ್ದ್ ಬೊಕ್ಕ ಶಾಲಾಡಳಿತ ಪಾಕ ದುಂಬೆಚ್ಚರ್ಗೆದ ಕ್ರಮ ಗೆತೊಂದಿತ್ತ್‌ದ್, ರಡ್ಡ್ ದಿನೊರ್ದು ಪೊಲೀಸೆರ್ ಶಾಲೆದ ಮುಟ್ಟಡ್, ಶಾಲೆ ಸುರು ಆನಗ ಬೊಕ್ಕ ಬುಡ್ಪಿನ ಪೊರ್ತುಡು ರೌಂದ್ ಪಾಡೊಂದುಲ್ಲೆರ್.
ನಡಕೆರ್ದಾವರ ಜೋಕುಲೆ ಅಪ್ಪೆಅಮ್ಮೆಲಾ ಪೋಡಿದೆರ್. ಜೋಕ್ಲೆನ ಬಗೆಟ್ ಅಪ್ಪೆಅಮ್ಮೆಲಾ ಜಾಗೃತೆ ಮನ್ಪೊಡೂಂದು ಪೊಲೀಸೆರ್ ತೆರಿಪಾದೆರ್.
ಜೋಕುಲು ಇಲ್ಲದಕುಲು ಅತ್ತ್ಂಡ ದಿನೋಲ ಶಾಲೆಗ್ ಬರ್ಪಿನ ಗಾಡಿಲೆನ ಡ್ರೈವರ್‌ನಕುಲು ಬರಂದೆ ಗೇಟ್‌‌ರ್ದ್ ಪಿದಯಿ ಪೋವಂದಿಲೆಕ ಶಾಲೆದಕುಲು ಸೂಚನೆ ಕೊರ್ತೆರ್. ಈ ಸುದ್ದಿ ಪಗರೊಂದಿತ್ತಿಲೆಕನೆ ಮುಲ್ಕಿದ ಬೇತೆ ಶಾಲೆಲೆಡ್ಲಾ ಎಚ್ಚರ್ಗೆದ ಕ್ರಮ ಗತೊನೊಂದುಲ್ಲೆರ್.