Last updated on February 19th, 2025 at 08:30 am
ಕುಡ್ಲ ಫೆ. 18: ಕರ್ನಾಟಕ ರಾಜ್ಯೊದ ಬೇತೆ ಬೇತೆ ಕಲೆ-ಸಂಸ್ಕೃತಿಲೆನ್ ಶಾಲೆದ ಜೋಕುಲೆಗ್ ತೋಜಾಯೆರ ಶಾಲೆಲೆಡ್ ರಂಗೋತ್ಸವ ಇನ್ಪಿನ ಮನರಂಜನಾ ಕಾರ್ಯಕ್ರಮೊ ನಡಪಾಯೆರ ರಾಜ್ಯ ಕಾಂಗ್ರೆಸ್ ಸರ್ಕಾರ ಎದುರು ಬತ್ತಿತ್ತ್‌ದ್ ಗೊಂಬೆದಾಟ, ಕೋಲಾಟ ಇಂಚ ಬೇತೆ ಮನೋರಂಜನಾ ಕಲೆಕ್ಲೆನ ಸಾಲ್‌ಗ್ ಭೂತಾರಾಧನೆನ್ ಗೋಡ್ಯಾದಿನ ಖಂಡನೀಯ ಪನ್ದ್ ಶಾಸಕೆ ವೇದವ್ಯಾಸ ಕಾಮತ್ ಮೇರ್ ಆಕ್ರೋಶ ತೋಜಾಯೆರ್.
ದೈವರಾಧನೆ ಪನ್ಪಿನವು ಸಾರಗಟ್ಲೆ ವರ್ಸೊಂರ್ದಿಂಚಿಲಾ ತುಳುನಾಡ್‌ದ ಶ್ರದ್ಧೆ ಭಕ್ತಿದ ಪರತಿರಿ ಇತ್ತಿನ ಧಾರ್ಮಿಕ ಆಚರಣೆ ಅತ್ತಂದೆ ಅವ್ವೊಂಜಿ ಮನೋರಂಜನೆಯ ಕಲೆ ಅತ್ತ್. ಜೋಕುಲೆಡ ಶೈಕ್ಷಣಿಕ ಗುಣಮಟ್ಟ ಎಚ್ಚ ಮನ್ಪೆರ ಗಮ್ಮತ್ ದಿಂಜಿನ ಪ್ರತಿಭಾ ಕಾರಂಜಿ ಲೆಗ್ ಎಂಕ್ಲೆನ ವಿರೋಧ ಇಜ್ಜಿ. ಆಂಡ, ದೈವೊಲು ಸ್ಟೇಜ್‌ದ ಮಿತ್ತ್ ನಲಿತ್‌ದ್ ತೋಜಾವುನ ಸೊತ್ತುಲು ಅತ್ತ್ ಪನ್ಪಿನ ಕನಿಷ್ಠ ಗೇನೋಲಾ ಈ ಕಾಂಗ್ರೆಸ್ ಸರ್ಕಾರೊಗು ಇಜ್ಜಾ? ಉಂದು ಖಂಡಿತವಾದ್ಲಾ ಬೇಜವಾಬ್ದಾರಿ ಆದಿತ್ತ್‌ದ್ ಮಾತಾ ತುಳುನಾಡ್‌ದ ದೈವಭಕ್ತೆರೆ ನಂಬೊಲಿಗೆಗ್ ಪೆಟ್ಟಾತ್ಂಡ್ ಪನ್ದ್ ಪನ್ಡೆರ್.
ಉಂದೆಕ್ ದುಂಬೇ ಪಾಕ ಸುತ್ತೋಲೆಲೆನ್ ಕೊರ್ದು ಭೂತಾರಾಧನೆ ವಿಷಯೊಡು ಭಕ್ತೆರೆ ಧಾರ್ಮಿಕ ಭಾವನೆಲೆಗ್ ತೆಟ್ಟಾಪುಲೆಕ ಮನ್ಪಿನಕಲೆನ ಮಿತ್ತ್ ಕಾನೂನು ಕ್ರಮ ಗೆತೊನುನ ಬಗೆಟ್ ಉಲ್ಲೇಖ ಮಲ್ತಿತ್ತ್ಂಡಲಾ ಸರ್ಕಾರೊನೇ ಇಂಚಿನ ಆದೇಶ ಕೊರ್ಪೆರ್ ಪನ್ಡ ಉಂದು ಉದ್ದೇಶಪೂರ್ವಕ ಅತ್ತಂದೆ ಬೊಕ್ಕ ದಾದ? ತುಳುನಾಡ್‌ದ ಆಚಾರ ವಿಚಾರೊಲೆಗ್ ಎಣ್ಮೆದಾತ್ ತೆಟ್ಟಾಂಡಲಾ ಎಂಕುಲು ಬುಡ್ಪುಜ ಪನ್ದ್ ಎಚ್ಚರ್ಗೆ ಕೊರ್ದು ಇತ್ತೆನೇ ಈ ಆದೇಶೊನು ಪಿರ ಗೆತೊನೊಡು ಪನ್ದ್ ಶಾಸಕೆರ್ ರಾಜ್ಯ ಸರ್ಕಾರೊಗು ಓಲೆ ಬರೆದ್ ಒತ್ತಾಯ ಮಲ್ತೆರ್.