Last updated on February 21st, 2025 at 05:46 pm
ಒಡಿಪು: ಒಡಿಪು ಪೇಂಟೆದ ಅಂಗಡಿ, ಶೋರೂಂ, ಹೊಟೇಲ್‌ಲು ಬೊಕ್ಕ ಶಾಲೆ ಕಾಲೇಜಿಲೆನ ಪುದರ್‌ಪಲವೆಲೆಡ್ ಶೇ.60ದಾತ್ ಕನ್ನಡ ಗಲಸೊಡು. ಒಂಜಿ ತಿಂಗೊಳ್ದ ಗಡು ಕೊರ್ಪ. ಅವೆರ್ದ್ ಬೊಕ್ಕಲಾ ಪಾಡಿಜಿಂಡ ಪೊಲೀಸೆರೆಗ್ ಒಲವು ಕೊರ್ದು ಅಂಚಿನ ಪಲವೆಲೆಗ್ ಮಜ್ಜಿ ಪೂಜುವ ಪನ್ದ್ ಕರ್ನಾಟಕ ಯುವರಕ್ಷಣಾ ವೇದಿಕೆ ಪನ್ತ್ಂಡ್.
ಈ ಬಗೆಟ್ ಸುದ್ದಿಗೋಷ್ಠಿಡ್ ಕರ್ನಾಟಕ ಯುವರಕ್ಷಣಾ ವೇದಿಕೆದ ರಾಜ್ಯ ಪ್ರಚಾರ ಸಮಿತಿ ಕಾರ್ಯದರ್ಶಿ ಸಂದೀಪ್ ಪಾತೆರ್ದ್, ರಾಜ್ಯ ಸರಕಾರ ಕನ್ನಡ ಭಾಷೆ ಪಾಡೆರ ಆದೇಶ ಮಲ್ತಿತ್ತ್ಂಡಲಾ ಜಿಲ್ಲೆದ ಪಾಕ ಕಡೆಟ್ ನನಲಾ ಪಾಡ್ದಿಜೆರ್.
ಅಂಚಾದ್ ಫೆ. 24ತಾನಿ ಕರ್ನಾಟಕ ಯುವರಕ್ಷಣಾ ವೇದಿಕೆದ ರಾಜ್ಯಾಧ್ಯಕ್ಷೆ ಡಾ. ಸುನಿಲ್ ಎಂ.ಎಸ್. ಮುತಾಲಿಕೆಡ್ ಜಿಲ್ಲಾ ಯುವ ಘಟಕೊದ ಕಡೆರ್ದ್ ಪ್ರವಾಸಿ ಮಂದಿರೊರ್ದು ಬ್ರಹ್ಮಗಿರಿ, ಅಜ್ಜೆರೆಕಾಡ್ ಡೆ ಆದ್ ನಡತೊಂದು ಪೋದು ನಗರಸಭೆ ಅಧ್ಯಕ್ಷೆರ್, ಪೌರಾಯುಕ್ತೆರೆಗ್ ಅಂಚೆನೇ ಮಣಿಪಾಲದ ಸಿಂಡಿಕೇಟ್ ಸರ್ಕಲ್‌ರ್ದ್ ಜಿಲ್ಲಾಧಿಕಾರಿ ಕಚೇರಿ ಮುಟ್ಟ ನಡತೊಂದು ಪೋದು ಜಿಲ್ಲಾಧಿಕಾರಿಲೆಗ್ ಬಿನ್ನಪು ಮನ್ಪುಂಡು.
ಒಂಜಿ ತಿಂಗೊಲ್ದುಲಯಿ ಪುದರ್ ಪಲವೆಲೆಡ್ ಶೇ.60ದಾತ್ ಕನ್ನಡ ಗಲಸೊಡು. ಇಜಿಂಡ ಉಪವಾಸ ಸತ್ಯಾಗ್ರಹ, ಪಲವೆಲೆಗ್ ಮಜ್ಜಿ ಪೂಜುನ ಪ್ರತಿಭಟನೆ ಮನ್ಪ ಪನ್ದ್ ಪನ್ಡೆರ್.
ಸುದ್ದಿಗೋಷ್ಠಿಡ್ ಜಿಲ್ಲಾಧ್ಯಕ್ಷೆ ಹೇಮಂತ್ ಕುಮಾರ್, ಪ್ರಮುಖೆರ್ ನಾಗೇಶ್, ಉಮೇಶ್ ಶೆಟ್ಟಿ, ರಾಜು ಇತ್ತೆರ್