Last updated on March 1st, 2025 at 12:27 pm
ಬಂಟ್ವಾಳ : ಕುಡ್ಲದ ಪ್ರೈವೇಟ್ ಕಾಲೇಜಿಡ್ ಸೆಕೆಂಡ್ ಪಿಯುಸಿ ಕಲ್ತೊಂದಿತ್ತಿನ ದಿಗಂತ್ (19) ಫೆಬ್ರವರಿ 25 ರ್ದ್ ನಾಪತ್ತೆ ಆದಿತ್ತ್‌ದ್, ಈ ಬಗೆಟ್ ಪಾಕ ಅನುಮಾನೊಲು ತೋಜಿದ್ ಬತ್ತಿನೆರ್ದಾವರ ಇನಿ (ಮಾ.1) ಕಾಂಡೆರ್ದೇ ಫರಂಗಿಪೇಟೆಡ್ ಸ್ವಯಂ ಪ್ರೇರಿತ ಬಂದ್ ಮಲ್ತ್‌ದ್ ಪ್ರತಿಭಟನೆ ಮಲ್ತೊಂದುಲ್ಲೆರ್.
ನಾಪತ್ತೆ ಆತಿನ ವಿದ್ಯಾರ್ಥಿ ಫರಂಗಿಪೇಟೆದ ಅಮೆಮಾರ್ ನಿವಾಸಿ ಆದಿತ್ತ್‌ದ್, ದೇಲಂತಡೆಗ್ ಪೋದು ಬರ್ಪೆ ಪನ್ದ್ ಪೋತಿನ ದಿಗಂತ್ ಇಲ್ಲಗ್ ಪಿರ ಬೈದಿಜೆ. ವಿಶ್ವ ಹಿಂದೂ ಪರಿಷತ್ ನಾಯಕೆರ್ ದಿಗಂತ್‌ನ ಇಲ್ಲಗ್ ಬತ್ತ್‌ದ್ ಇಲ್ಲದಕ್ಲೆಗ್ ಸಾಂತ್ವಾನ ಪನ್ಡ್‌ದ್, ಪೊಲೀಸೆರೆ ಮಿತ್ತ್ ಪಿಸಿರ್ ತೋಜಾದೆರ್.
ದಿಗಂತ್ ನಾಪತ್ತೆ ಆತಿನೆತ ಪಿರವು ನೆಟೆದ ಗಾಂಜ ದಂಧೆದ ಜನ ಇತ್ತ್‌ದ್, ಅಕಲೆರ್ದ್ ದಿಗಂತ್‌‌ಗ್ ದಾದನೋ ಆತ್ಂಡ್ ಪನ್ದ್ ಆರೋಪ ಮಲ್ದೆರ್. ಪೊಲೀಸೆರ್ ಪ್ರಕರಣೊದ ಜಡ್ತೆನ್ ಸಮೊಟು ಮಲೊತೊಂದಿಜ್ಜೆರ್ ಪನ್ದ್ ಆರೋಪ ಮಲ್ತ್‌ದ್ ಪೊರ್ಮ್ಬಾಟ ಮಲ್ತೊಂದುಲ್ಲೆರ್. ಇತ್ತೆ ಫರಂಗಿಪೇಟೆ ಬಂದ್ ಮಲ್ತ್‌ದ್ ಸರ್ಕಾರೊದ ವಿರುದ್ಧ ಆಕ್ರೋಶ ತೋಜಾದ್, ಸಮೊಟು ಜಡ್ತೆ ಮನ್ಪೆರ ಒತ್ತಾಯ ಮಲ್ದೆರ್.