Last updated on March 20th, 2025 at 12:33 pm
ಕಡಬ, ಮಾ. 20: ಕಡಬದ ಸರ್ಕಾರಿ ಕಾಲೇಜ್‌ದ ಬರಿಟ್ ಇಪ್ಪುನ ಆಣ್ ಜೋಕ್ಲೆನ ಹಾಸ್ಟೆಲ್‌ಗ್ ಲೋಕಾಯುಕ್ತ ಅಧಿಕಾರಿಲು ಬತ್ತ್‌ದ್ ಪರಿಶೀಲನೆ ಮಲ್ತ್‌ದೆರ್. ಈ ಪೊರ್ತುಡು ಹಾಸ್ಟೆಲ್‌ದ ಪರಿಸ್ಥಿತಿ ತೂದು ಲೋಕಾಯುಕ್ತ ಅಧಿಕಾರಿಲೆಗೇ ಶಾಕ್ ಆತ್ಂಡ್.
ಕಡಬದ ಸರ್ಕಾರಿ ಕಾಲೇಜ್‌ದ ಕೈತಲ್ದ ಆಣ್ ಜೋಕ್ಲೆನ ಹಾಸ್ಟೆಲ್‌ಡ್ ಕೊರೊಂದುಪ್ಪುನ ತೆನಸ್‌ದ ಗುಣಮಟ್ಟೊದ ಬಗೆಟ್ ಆರೋಪೊಲು ಕೇನ್ದ್ ಬರೊಂದಿತ್ತ. ಈ ಬಗೆಟ್ ಒಲವು ತಿಕ್ಕಿನ ಕುಡ್ಲ ಜಿಲ್ಲಾ ಲೋಕಾಯುಕ್ತ ಅಧಿಕಾರಿಲು ತಪಾಸಣೆ ಮಲ್ತಿತ್ತ್‌ದ್, ಅವ್ಯವಸ್ಥೆನ್ ನಾಡ್ ಪತ್ತ್‌ದೆರ್.
ಕುಡ್ಲ ಲೋಕಾಯುಕ್ತ ಎಸ್ಪಿ ಕುಮಾರ್‌ಚಂದ್ರ, ಡಿವೈಎಸ್‌ಪಿ ಗಾನಾ ಪಿ. ಕುಮಾರ್ ಬೊಕ್ಕ ಇನ್ಸ್‌ಪೆಕ್ಟರ್ ಚಂದ್ರಶೇಖರ್ ಮುತಾಲಿಕೆಡ್ ಲೋಕಾಯುಕ್ತ ಸಿಬ್ಬಂದಿ ಆಣ್ ಜೋಕ್ಲೆನ ಹಾಸ್ಟೆಲ್ ಡ್ ತಪಾಸಣೆ ಮಲ್ತೆರ್. ಈ ಪೊರ್ತುಡು ಬಜೀ ಕಮ್ಮಿ ಗುಣಮಟ್ಟೊದ ತೆನಸ್ ಕೊರ್ಪುನು, ಸಿಸಿ ಕ್ಯಾಮರಾ ಸಮದಾಂತಿನ ವಿಚಾರ, ಮ್ಯಾಟ್ ಮಾರ್ದಿನ ಆರೋಪ, ಸುರಕ್ಷತಾ ಸಿಬ್ಬಂದಿ, ವಾರ್ಡನ್‌‌ನಕುಲು ಇಜ್ಜಂದಿನ ಸೇರ್ದ್ ಪಾಕ ವಿಚಾರೊಲು ಬೊಲ್ಪುಗು ಬೈದ.
ವಾರ್ಡನ್ ಸೇರ್ದ್ ಬೇತೆ ಸಿಬ್ಬಂದಿಲು ಹಾಸ್ಟೆಲ್‌ಗ್ ಸಮ ಬರಂದೆ ಇಪ್ಪುನು ಬೊಕ್ಕ ಜೋಕುಲೆಗ್ ಬತ್ತಿನ ರಬ್ಬರ್ ಸ್ಪೋರ್ಟ್ಸ್ ಮ್ಯಾಟ್‌‌ಲೆಡ್ ಸುಮಾರ್ 110 ಮ್ಯಾಟ್‌ಲೆನ್ ಮಾರ್ದಿನ ಬೊಕ್ಕ ತೆನಸ್‌ದ ಗುಣಮಟ್ಟೊದ ಬಗೆಟ್ ಅಧಿಕಾರಿಲೆಗ್ ಮುಲ್ಪದ ಜೋಕುಲು ತೆರಿಪಾಯೆರ್. ಅಟಿಲ್‌ದ ಸಾಮಾನ್ ದೀಪುನ ಜಾಗೆಡ್ ಪರಿಶೀಲನೆ ಮಲ್ತಿನ ಲೋಕಾಯುಕ್ತ ಅಧಿಕಾರಿಲು, ಅಲ್ಪ ಪುರಿಕುಲು ಇಪ್ಪುನೆನ್ ಕಣ್ಣಾರೆ ತೂತೆರ್. ರೂಮ್‌ಲೆಡ್ ಸಮ ಬೊಲ್ಪು ಇಜ್ಜಿ, ಕೆಲ ಜೋಕುಲು ಅಕ್ವೇರಿಯಂ ಅಂಚೆನೇ ಬೇತೆ ಸೊತ್ತುಲೆನ್ ಕನತ್ ದೀವೊಂದಿನ ಬಗೆಟ್, ಹಾಜರಾತಿ ಪುಸ್ತಕೊಡು ಜೋಕುಲು ಬೊಕ್ಕ ಅಧಿಕಾರಿಲೆನ ಸೈನ್ ಇಜ್ಜಂದಿನ ಬಗೆಟ್ ಜಿಲ್ಲಾ ಲೋಕಾಯುಕ್ತ ಅಧಿಕಾರಿಲು ಪರಿಶೀಲನೆ ಮಲ್ದೆರ್. ಮಾಧ್ಯಮ ಪ್ರತಿನಿಧಿಲೆಡ ಪಾತೆರ್ನ ಲೋಕಾಯುಕ್ತ ಎಸ್ಪಿ ಕುಮಾರಚಂದ್ರೆರ್, ಇತ್ತೆನೇ ವರದಿ ಮಲ್ತ್‌ದ್ ಸರ್ಕಾರೊದ ಗೇನೊಗು ಕನಪ ಪನ್ದ್ ಪನ್ಡೆರ್.
“ಎಂಕ್ಲೆಗ್ ಸರ್ಕಾರೊರ್ದು ಕಾಬ್ ಬದೊಂದಿಜ್ಜಿ. ಮುಲ್ಪ 28 ಜೋಕುಲು ಉಲ್ಲೆರ್. ಆಂಡ ಇಪ್ಪುನು ಇರ್ವೆದ್ ತಾತ್ಕಾಲಿಕ ಸಿಬ್ಬಂದಿ ಮಾತ್ರ. ಜೋಕುಲೆಗ್ ವನಸ್ ತೆನಸ್‌ದ ಕುಂದೆಲ್ ಸೇರ್ದ್ ಪಾಕ ಸಮಸ್ಯೆಲು ಉಲ್ಲ. ಎಂಕ್ಲ ಈ ವಿಚಾರೊನು ಪಾಕ ಸರ್ತಿ ಸರ್ಕಾರೊದ ಗೇನೋಗು ಕನತಾಂಡಲಾ ಪ್ರೇಜನ ಆತಿಜಿ. ಆಹಾರ ಧಾನ್ಯೊಲೆಗ್ ಕಾಸ್ ತಿಕ್ಕೊಂದಿಜ್ಜಿ” ಪನ್ದ್ ಕಡಬ ಸಮಾಜ ಕಲ್ಯಾಣ ಇಲಾಖೆದ ಅಧಿಕಾರಿ ವಿನಯಕುಮಾರಿ ತೆರಿಪಾಯೆರ್.