Last updated on March 25th, 2025 at 06:47 am
ಬೆಳಗಾಂವ್‌ದ ಅಂಬಡಗಟ್ಟಿ ಗ್ರಾಮೊಡು ಪೆದ್ದಿ ಬಾಲೆನೇ ಕೆರ್ತಿನ ಪ್ರಕರಣೊನು ಪತ್ತಿನ ಪೊಲೀಸೆರ್, ಪ್ರೇಮಿಲೆನ್ ಕೈದ್ ಮಲ್ದೆರ್.
ಅಂಬಡಗಟ್ಟಿದ ಮಹಾಬಲೇಶ್ವರ ರುದ್ರಪ್ಪ ಕಾಮೋಜಿ (31) ಬೊಕ್ಕ ಸಿಮ್ರನ್ ಮೌಲಾಸಾಬ್ ಮಾಣಿಕಬಾಯಿ (22) ಕೈದಾತಿನಕುಲು.
ಮಾರ್ಚ್ 5 ತಾನಿ ಅಂಬಡಗಟ್ಟಿದ ಒಂಜಿ ಇಲ್ಲದ ಬಿತ್ತ್‌ಲ್‌ದ ಕಜವುದ ಗುಂಡಿಡ್ ಪುರುಬಾಲೆದ ಪುನ ತಿಕ್ಕ್‌ದಿತ್ತ್ಂಡ್. ಬಾಲೆದ ತರೆಕ್ ಪೆಟ್ಟ್ ಬೂರ್ದಿತ್ತಿನೆರ್ದಾವರ ಅನುಮಾನ ಬತ್ತಿನ ಪೊಲೀಸೆರ್ ಪ್ರಕರಣೊದ ಆರೋಪಿಲೆನ್ ಎಂಚಾಂಡಲ ಪತ್ತ್‌ದೆರ್.
‘ಮಹಾಬಲೇಶ್ವರೆ ಬೊಕ್ಕ ಸಿಮ್ರನ್ ಮೂಜಿ ವರ್ಸೊರ್ದಿಂಚಿ ಮೋಕೆ ಮಲ್ತೊಂದಿತ್ತೆರ್. ದೈಹಿಕ ಸಂಪರ್ಕೊರ್ದು ಸಿಮ್ರನ್‌ಗ್ ಬಂಜಿ ಬೈದಿತ್ತ್ಂಡ್. ಆಂಡ, ಇರ್ವೆರ್ಲಾ ಇಲ್ಲಡ್ ಈ ವಿಷಯ ತೆರಿಪಾದಿಜೆರ್. ಸಿಮ್ರನ್ ಸರ್ರೊಡು ಗುಂಡು ಗುಂಡು ಇತ್ತಿನೆರ್ದಾವರ ಬಂಜಿನಾಲ್ ಆತಿನ ವಿಷಯ ಇಲ್ಲಡ್ ತೆರಿದಿಜ್ಜಂಡ್. 9 ತಿಂಗೊಲು ಕರಿದ್ ಮಾರ್ಚ್ 5ತಾನಿ ಪೆದ್ದುನ ಬೇನೆ ತೋಜಿದ್ ಬತ್ತಿತ್ತ್ಂಡ್. ಬಾತ್‌ರೂಮ್‌ಗ್ ಪೋದು ಸಿಮ್ರನ್ ತಾನೇ ಪೆದ್ಪಾವೊಂದು ಪೊಣ್ಣು ಬಾಲೆನ್ ಪೆದ್ದ್‌ದಲ್’ ಪನ್ದ್ ಜಿಲ್ಲಾ ಪೊಲೀಸ್ ವರಿಷ್ಠಾಧಿಕಾರಿ ಡಾ.ಭೀಮಾಶಂಕರ ಗುಳೇದ ತೆರಿಪಾಯೆರ್.
ಪೆದ್ದುನ ಎಂಚ ಪನ್ದ್ ಸಿಮ್ರನ್ ಯುಟ್ಯೂಬ್ ವೀಡಿಯೋ ತೂದಿತ್ತಲ್. ಪೆದ್ದುನ ಪೊರ್ತುಡು ಪ್ರಿಯಕರೆ ಮಹಾಬಲೇಶ್ವರೆಲಾ ವಿಡಿಯೊ ಕಾಲ್‌‌ಡ್ ಮಾರ್ಗದರ್ಶನ ಕೊರೊಂದಿತ್ತೆ. ಪೆದ್ದಿನೆರ್ದ್ ಬೊಕ್ಕ ಸಿಮ್ರನ್ ಬಾಲೆ ಬುಲ್ಪಂದಿ ಲೆಕ್ಕ ಬಾಯಿಗ್ ಕುಂಟು ದಿಂಜಾದ್, ಪೆಟ್ಯೆಡ್ ದಿಂಜಿದಲ್. ಅಪಗ ಬಾಲೆದ ತರೆಕ್ ಪೆಟ್ಟಾದುಪ್ಪೊಡು. ಅವೆರ್ದ್ ಬೊಕ್ಕ ಅವೆನ್ ಕಜವುದ ಗುರಿಕ್ ದಕ್ಕ್‌ದೆರ್. ಪುರುಬಾಲೆದ ಪುನೊನು ನಾಯಿಲು ಒಯ್ತೊನ್ನಗ ಪ್ರಕರಣ ಬೊಲ್ಪುಗು ಬೈದ್ಂಡ್.
ಪೊಲೀಸೆರ್ ಪಾಕ ಜಡ್ತೆ ಮಲ್ತ್‌ದ್ ಪ್ರಕರಣೊದ ಆರೋಪಿಲೆನ್ ಪತ್ತ್‌ದೆರ್. ಆಕ್ಲೆನ್ ನ್ಯಾಯಾಂಗ ಬಂಧನೊಗು ಒಪ್ಯಾದೆರ್.