Last updated on April 22nd, 2025 at 10:58 am
ಬೆಳಗಾವಿ: ಪರ ಚಙ್ಗಾಯಿ ಬ್ಲಾಕ್ಮೇಲ್ ಮಲ್ತಿನೆರ್ದಾವರ ಮದಿಮೆಗ್ ನನ 8 ದಿನ ಬಾಕಿ ಇಪ್ಪುನಗನೇ ಇಲ್ಲಡ್ ಬಲ್ಲ್ ಪಾಡೊಂದು ದೈಹಿಕ ಶಿಕ್ಷಕಿ ಆತ್ಮಹತ್ಯೆ ಮಲ್ತೊಂದಿನ ನಡಕೆ ಬೆಳಗಾವಿದ ಅಸುಂಡಿ ಗ್ರಾಮೊಡು ನಡತ್‌ದ್ಂಡ್.
ಒಂಜಿ ಕಡೆಟ್ ಇಲ್ಲದಕುಲು ಜೋರುಡು ಮದಿಮೆದ ಅಟ್ಟನೆ ಮಲ್ತೊಂದಿತ್ತೆರ್. ಅಂಚಾದ್ ಮದಿಮೆಗ್ ಬೋಡಾಪಿನ ಸೊತ್ತುಲೆನ್ ಕನಯೆರ ಪೋದಿತ್ತಿನ ಅಪ್ಪೆ ಅಮ್ಮೆ ಪಿರ ಬನ್ನಗ ಡೆತ್ ನೋಟ್ ಬರೆದ್ ದೀದ್ ಆತ್ಮಹತ್ಯೆ ಮಲ್ತೊಂದಲ್. ತೀರ್ದಿನ ಸೈರಾಬಾನು ಪ್ರೈವೇಟ್ ಶಾಲೆಡ್ ದೈಹಿಕ ಶಿಕ್ಷಕಿ ಆದ್ ಬೇಲೆ ಮಲ್ತೊಂದಿತ್ತೆರ್.
ಮೇರ್ ನ್ಯಾಷನಲ್ ಲೆವೆಲ್ ಕುಸ್ತಿಪಟು ಆದ್ ಪುದರ್ ಮಲ್ದಿನಾರ್. ಪಾಕ ಮೆಡಲ್, ಕಪ್ ಗೆಂದ್‌ದ್ ಪುದರ್ ಮಲ್ದಿನಾರ್. ಆತೇ ಅತ್ತಂದೆ ಇಡೀ ಇಲ್ಲದ ಜಬದ್ದಾರಿ ಸೈರಾಬಾನು‌ನ ಪುಗೆಲ್‌ಡ್ ಇತ್ತ್ಂಡ್. ಆಣ್ ಜೋಕುಲು ಇಜ್ಜಂದಿನೆರ್ದಾವರ ತಾನೇ ಇಲ್ಲ್ ತೂವೊಂದಿತ್ತಲ್. ಇತ್ತೆ ಪರ ಲವರ್ ಟಾರ್ಚರ್‌ಗ್ ಬೊಡಿಪೋದ್ ಟೀಚರ್ ಜೂವ ಗೆತ್ತೊಂದೆರ್.
ತೀರ್ದಿನ ಟೀಚರ್ ಕರಿನ ಐನ್ ವರ್ಸೊರ್ದಿಂಚಿ ಮೈಲೇರಿ ಪನ್ಪಿನಾಯನ್ ಮೋಕೆ ಮಲ್ತೊಂದಿತ್ತೆರ್‌ಗೆ. ಆಂಡ ಕೆಲ ದಿನೊಕು ಪೀರವು ಲವ್ ಬ್ರೇಕ್‌ಅಪ್ ಆದಿತ್ತ್ಂಡ್‌ಗೆ. ಲವ್ ಬ್ರೇಕಪ್ ಆಯಿ ಬೊಕ್ಕ ಟೀಚರ್ ಮದಿಮೆಗ್ ಒತ್ತೊಂದೆರ್‌ಗೆ. ಆಂಡ ಟೀಚರ್‌ನ ಮದಿಮೆದ ಅಟ್ಟನೆ ತೂದು ಲವರ್ ಟಾರ್ಚರ್ ಸುರು ಮಲ್ಪೆರ ಪತ್ತ್‌ದೆ. ಇರ್ವೆರೆ ಫೋಟೋ ವಿಡಿಯೋ ವೈರಲ್ ಮಲ್ಪುವೆ ಪನ್ದ್ ಪೋಡಿಕಟ್ಟಾದಿತ್ತೆಗೆ. ಅಂಚಾದ್ ಮರ್ಯಾದಿಗ್ ಪೋಡಿದ್ ಟೇಚರ್ ಆತ್ಮಹತ್ಯೆ ಮಲ್ತೊಂದೆರ್ ಪನ್ದ್ ಪನೊಂದುಲ್ಲೆರ್.