Last updated on April 29th, 2025 at 01:47 pm
ತುಳು ಭಾಷೆನ್ ಒರಿತೊನುನ, ಬುಲೆಪಾವುನ ನಮ ಮಾತೆರ್ನ ಬೇಲೆ, ಎನ್ನ ಈ ಪ್ರಾಯೊಡ್ಲಾ ಯಾನ್ ತುಳು ಭಾಷೆಗಾದ್ ಒವ್ವೇ ಪೊರ್ಮ್ಬಾಟೊಗ್ಲಾ, ತ್ಯಾಗೊಗ್ಲಾ ರೆಡಿ ಉಲ್ಲೆ ಪನ್ದ್ ಪೆರಿಯ ಗಾಂಧಿವಾದಿ, ನಿವೃತ್ತ ಉಪನ್ಯಾಸಕೆ, ತುಳು ಬರವುಗಾರೆ ಕೆ. ತಿಮ್ಮಪ್ಪ ಆಳ್ವೆರ್ ಕರ್ನಾಟಕ ತುಳು ಸಾಹಿತ್ಯ ಅಕಾಡೆಮಿರ್ದ್ ಕೊರ್ತಿನ ‘ಚಾವಡಿ ತಮ್ಮನ’ ನ್ ಸ್ವೀಕರಿತ್‌ದ್ ಪನ್ಡೆರ್.
92 ವರ್ಸ ಪ್ರಾಯೊದ ಕೆ. ಟಿ. ಆಳ್ವೆರೆಗ್ ಪಜೀರ್‌ದ ಆರೆನ ಇಲ್ಲಡ್, ಮುಡಿಪು ಪದವಿ ಪೂರ್ವ ಕಾಲೇಜಿದ ಪರ ವಿದ್ಯಾರ್ಥಿಲೆನ ಸಂಘೊದ ಒಟ್ಟು ಸೇರಿಗೆಡ್ ತುಳು ಅಕಾಡೆಮಿದ ‘ಚಾವಡಿ ತಮ್ಮನ’ ದ ಮಾನಾದಿಗೆ ಮಲ್ತೆರ್.
ತುಳು ಭಾಷೆದ ಬಗೆಟ್ ಜನಸಾಮಾನ್ಯೆರೆಗ್ ಸುಲಬೊಡು ತಿಕ್ಕುನಂಚಿನ ಡಿಕ್ಷನರಿ ಮಲ್ಪೆರ ಅಕಾಡೆಮಿ ದುಂಬು ಬರೊಡು ಪನ್ದ್ ಪನ್ಡೆರ್.
ಪಜೀರ್ ಗ್ರಾಮ ಪಂಚಾಯಿತಿದ ಗುರ್ಕಾರೆ ರಫೀಕ್ ಪಜೀರ್ ಪಾತೆರ್ದ್, ಪಜೀರ್ ಪಂಚಾಯತ್‌ದ ಲೈಬ್ರೆರಿಡ್ ತುಳು ಭಾಷೆದ ಪುಸ್ತಕೊಲೆನ ವಿಭಾಗ ಸುರು ಮಲ್ಪುವ ಪನ್ದ್ ಪನ್ಡೆರ್. ಪಂಚಾಯತ್‌ರ್ದೇ ತುಳುಲೇಸ್‌ದ ಅಟ್ಟನೆ ಮಲ್ಪುವ ಪನ್ದ್‌ಲಾ ಪನ್ಡೆರ್.
ಲೇಸ್‌ಡ್ ಅಕಾಡೆಮಿ ಗುರ್ಕಾರೆ ತಾರಾನಾಥ ಗಟ್ಟಿ, ನಿವೃತ್ತ ಪ್ರಾಂಶುಪಾಲೆರ್ ಡಾ. ಎನ್. ಇಸ್ಮಾಯಿಲ್, ಪೆರಿಯ ಲೆಕ್ಕ ಪರಿಶೋಧಕೆರ್ ಪುಂಡರಿಕಾಕ್ಷೆ, ಪಜೀರ್ ಪಂಚಾಯತ್ ಸದಸ್ಯೆರಾಯಿನ ಇಮ್ತಿಯಾಜ್, ಸೀತಾರಾಮ ಶೆಟ್ಟಿ ಮುಗುಳಿ, ಭರತ್ ರಾಜ್ ಶೆಟ್ಟಿ, ಮಾಜಿ ತಾಲೂಕ್ ಪಂಚಾಯತ್ ಸದಸ್ಯೆ ಉಮೇಶ್, ಪತ್ರಕರ್ತೆ ಶಶಿಧರ ಪೊಯ್ಯತ್ತಬೈಲ್ ಪಾಲ್‌ಪಡೆದ್ ಪಾತೆರ್ಯೆರ್.
ಬೊಕ್ಕ ನಡತಿನ ಸಂವಾದ ಕಾರ್ಯಕ್ರಮೊಡು ಲೇಖಕೆ ಚಂದ್ರಹಾಸ ಕಣಂತೂರು, ಶಶಿಧರ್ ಮಂಟಮೆ, ಬಾಬು ಪಿಲಾರ್, ಎಡ್ವರ್ಡ್ ತೊಕ್ಕೊಟ್ಟು, ಅಮಿತಾ ಪಾಲ್‌ಗೆತೊಂಡೆರ್. ಡಾ. ರಾಜರಾಮ್ ಆಳ್ವೆರ್ ಒತ್ತುಪಾಲಿತ್ತೆರ್.
ಮುಡಿಪು ಸರಕಾರಿ ಪ.ಪೂ ಕಾಲೇಜಿದ ಪರ ವಿದ್ಯಾರ್ಥಿ ಬಳಗೊದ ಪ್ರವೀಣ್ ಅಮ್ಮೆಂಬಳ ಲೇಸ್ ಸುದಾರ್ಮೆ ಮಲ್ತೆರ್. ಇಸ್ಮತ್ ಪಜೀರ್ ಎದುಕೊಂದು, ಅನ್ನಪೂರ್ಣೇಶ್ವರಿ ಸೊಲ್ಮೆ ಸಂದಾಯೆರ್.