Last updated on May 3rd, 2025 at 10:07 am
ಬಾಗಲಕೋಟೆ, ಮೇ 03: ಬಜೀ ಎಲ್ಯ ನೆವನೊಗು ಸುರು ಆಯಿನ ಲಡಯಿ ಕೆರ್ಪಟಿಗೆಡ್ ಉಂತುದುಂಡು. ಕಂಡನೆ, ಬೊಡೆದಿನ್ ಕೆರ್ತಿನ ನಡಕೆ ಬಾಗಲಕೋಟೆ ಜಿಲ್ಲೆದ ಮುಧೋಳ ತಾಲೂಕ್‌ದ ಮುಗಳಖೋಡ ಗ್ರಾಮೊಡು ನಡತ್‌ದ್ಂಡ್.
ಸಾಕ್ಷಿತಾ ವಾಳಕೆ (19) ತೀರ್ದಿನ ಪೊಣ್ಣು. ಬೀರಪ್ಪ ಪೂಜಾರಿ (21) ಕೆರ್ತಿನ ಆರೋಪಿ. ಸಾಕ್ಷಿತಾ ವಾಳಕೆ ಮೂಲತಃ ಬೆಳಗಾವಿ ಜಿಲ್ಲೆದ ಚಿಕ್ಕೋಡಿ ತಾಲೂಕ್‌ದ ವಡಗೋಲ ಗ್ರಾಮೊದಾಲ್. ಬೀರಪ್ಪ ಪೂಜಾರಿ ಬಾಗಲಕೋಟೆ ಜಿಲ್ಲೆದ ಮುಧೋಳ ತಾಲೂಕ್‌ದ ಮುಗಳಖೋಡ ಗ್ರಾಮೊದಾಯೆ. ಇರ್ವೆರೆ ನಡುಟು ಅಪ್ರಾಪ್ತ ಪ್ರಾಯೊಡೇ ಮೋಕೆ ಬುಲೆದಿತ್ತ್ಂಡ್. ಸಮ್ಮಲೆನ ಊರ್ ವಡಗೋಲಡ್ ಹೈಸ್ಕೂಲ್ ಓದುನಗನೇ ಬೀರಪ್ಪ ಬೊಕ್ಕ ಸಾಕ್ಷಿತಾನ ನಡುಟು ಮೋಕೆ ಪುಟ್ಟುದಿತ್ತ್ಂಡ್.
ಇರ್ವೆರೆ ಮೋಕೆದ ವಿಷಯ ತೆರಿನ ಇಲ್ಲದಕುಲು ಒಂಜೇ ಜಾತಿದಕುಲು ಪನ್ದ್ ಮೋಕೆನ್ ಒಪ್ಪಿದ್ ರಡ್ಡ್ ಕುಟುಮೊದ ಪೆರಿಯಾಕುಲು ಉಂತುದು ಕರಿನ ವರ್ಸ ಮದಿಮೆ ಮಲ್ತಿತ್ತೆರ್. ಮದಿಮೆರ್ದ್ ಬೊಕ್ಕ ಪೊಸ ದಂಪತಿ ಮುಗಳಖೋಡ ಗ್ರಾಮೊಡು ಒಕ್ಕೆಲ್ ಕುಲ್ದಿತ್ತೆರ್. ಮೋಕೆ ಮಲ್ತಿನಕುಲು ಎಡ್ಡೆಡ್, ಒಂಜಾದ್ ಇಪ್ಪೆರ್ ಪನ್ದ್ ಪೆರಿಯಕುಲು ಮದಿಮೆ ಮಲ್ತ್ಂಡ, ಕಜಿಪು, ಸಾರ್ ಸಮ ಮಲ್ಪುಜಲ್ ಪನ್ಪಿನ ನೆವನೊಡು, ಕಂಡನೆ ಬೀರಪ್ಪೆ ತನ್ನ ಬೊಡೆದಿ ಸಾಕ್ಷಿತಾನ ಕಂಟೆಲ್ ಪೊಜೆಂಕ್‌ದ್ ಕೆರ್ತೆ.
ಏಪ್ರಿಲ್ 29 ದಾನಿ ರಾತ್ರೆ 2 ಗಂಟೆಗ್ ಇರ್ವೆರೆ ನಡುಟು ಲಡಯಿ ಸುರು ಆತ್ಂಡ್. ಲಡಯಿ ಜೋರಾದ್ ಕಂಡನೆ ತನ್ನ ಬೊಡೆದಿನ ತಿಗಲೆದ ಮಿತ್ತ್ ಕುಲ್ಲುದ್ ಕೆಕ್ಕಿಲ್ ಪೊಜೆಂಕ್‌ದ್ ಕೆರ್ತೆ. ಪೊಣ್ಣನ ಇಲ್ಲದಕ್ಲೆನ ಬುಲಿಪು ಕೇನೆರಾವೊಂದಿಜ್ಜಿ, ಕೆರ್ತಿನ ಬೀರಪ್ಪಗ್ ಗಲ್ಲ್ ಶಿಕ್ಷೆ ಆವೊಡು ಪನ್ದ್ ಆಗ್ರಹ ಮಲ್ದೆರ್.
ಜಾಗೆಗ್ ಮುಧೋಳ ಸ್ಟೇಶನ್ ಪೊಲೀಸೆರ್ ಬತ್ತ್‌ದ್ ಪರಿಶೀಲನೆ ಮಲ್ತ್‌ದೆರ್. ಆರೋಪಿ ಬೀರಪ್ಪನ್ ವಶೊಕು ಗೆತೊಂದು ವಿಚಾರಣೆ ಮಲ್ತೊಂದುಲ್ಲೆರ್. ವಿಚಾರಣೆದ ಪೊರ್ತುಡು ಪೊಲೀಸೆರೆಗ್ ಬೀರಪ್ಪಗ್ ಅಕ್ರಮ ಸಂಬಂಧ ಇತ್ತ್ಂಡ್ ಪನ್ಪಿನ ಒಲವು ತಿಕ್ಕ್‌ದ್ಂಡ್. ಐಕ್ ಬೋಡಾದೇ ಅಟಿಲ್ ಸಮ ಮಲ್ಪುಜಲ್ ಪನ್ಪಿ ವೆವನೊಡು, ಮೋಕೆ ಮಲ್ತ್‌ದ್ ಮದಿಮೆ ಆತಿನ ಬೊಡೆದಿನೇ ಕೆರ್ತೆನಾ ಪನ್ಪಿನ ಡೌಟ್ ಬೈದ್ಂಡ್.
ಈ ಬಗೆಟ್ ಬಾಗಲಕೋಟೆ ಎಸ್ಪಿ ಅಮರನಾಥ ರೆಡ್ಡಿ ಒಲವು ಕೊರ್ದಿತ್ತ್‌ದ್, ಕಂಡನೆ-ಬೊಡೆದಿ ಒಂಜೇ ಸಮುದಾಯದಕುಲು. ಅಪ್ರಾಪ್ತ ಪ್ರಾಯೊಡೇ ಲವ್ ಮಲ್ತಿತ್ತೆರ್. ಒಂಜೇ ಸಮುದಾಯ ಆತಿನೆರ್ದಾವರ ಮಾತೆರ್ಲಾ ಸೇರ್ದ್ ಮದಿಮೆ ಮಲ್ತಿತ್ತೆರ್. ಕಾಲಿ ಅಟಿಲ್ ಮಲ್ಪೆರೆ ಬರಂದಿನೆರ್ದಾವರ ಕೆರ್ತಾಜೆ ಪನ್ಪಿನ ಸಂಶಯ ಉಂಡು. ಬೀರಪ್ಪಗ್ ಬೇತೆ ಪೊಂಜೊವುಲೆನ ಒಟ್ಟುಗು ಅಕ್ರಮ ಸಂಬಂಧ ಇತ್ತ್ಂಡ್ ಪನ್ಪಿನ ಒಲವು ತಿಕ್ಕ್‌ದ್ಂಡ್. ಆಯನ ಮೊಬೈಲ್‌ಡ್ ಬೇತೆ ಪೊಂಜೊವುಲೆನ ಒಟ್ಟುಗು ಇಪ್ಪುನ ಪೊಟೊಲು ತಿಕ್ಕ್‌ದ. ಅಂಚಾದೇ ಇರ್ವೆರೆ ನಡುಟು ಲಡಯಿ ಆಪೆದ್ಂಡ್ ಪನ್ಪಿನ ಸಂಶಯ ಊಂಡು. ಮಾತಾ ಕೋಡಿರ್ದ್‌ಲಾ ಜಡ್ತೆ ಮಲ್ತೊಂದುಲ್ಲ ಪನ್ದ್ ಪನ್ಡೆರ್.