Last updated on May 29th, 2025 at 08:29 am
ಕುಡ್ಲ, ಮೇ 29: ಇಲ್ಲ್ ಕಟ್ಟೆರೆ ಜಾಗೆಡುಪ್ಪುನ ಕಲ್ಲ್ ಕಡ್ಪೆರೆ ಅನು ಕೊರ್ಯೆರೆ 50 ಸಾರ ಲಂಚಗ್ ಕಾಯೆಸ್ ಮಲ್ತಿತ್ತಿನ ಗಣಿ ಇಲಾಖೆದ ಅಧಿಕಾರಿ ಬೊಕ್ಕ ಇರ್ವೆರ್ ಸಿಬ್ಬಂದಿಲೆನ್ ಲೋಕಾಯುಕ್ತೆರ್ ಪತ್ತ್‌ದೆರ್. ಕೈದಾತಿನಕ್ಲೆನ್ ಕುಡ್ಲ ಗಣಿ ಇಲಾಖೆದ ಉಪನಿರ್ದೇಶಕೆರಾಯಿನ ಕೃಷ್ಣವೇಣಿ ಬೊಕ್ಕ ಸಿಬ್ಬಂದಿ ಪ್ರದೀಪ್ ಬೊಕ್ಕ ಡ್ರೈವರ್ ಮಧು ಪನ್ದ್ ಗುರ್ತ ಪತ್ತ್‌ದೆರ್.
ಒಯಿಲ್ ಬರೆಪಾದಿನಾರ್ ಉಳ್ಳಾಲ ತಾಲೂಕ್ ಇರಾ ಗ್ರಾಮೊದ ಸರ್ವೆ ನಂಬ್ರ 279/5 ಟ್ 1.39 ಎಕರೆ ವಿಸ್ತೀರ್ಣೊ ಜಾಗೆಡ್ 0.35 ಎಕರೆ ಜಾಗೆಡ್ ಇಲ್ಲ್ ಕಟ್ಟುನ ಉದ್ದೇಶೊಡು ಕಡ್ಪಕಲ್ಲ್ ದೆತ್ತ್‌ದ್ ತಟ್ಟ್ ಮಲ್ಪೆರೆ ಅನು ಕೊರ್ಯೆರ ಕುಡ್ಲದ ಗಣಿ ಬೊಕ್ಕ ಭೂವಿಜ್ಞಾನ ಇಲಾಖೆಗ್ ತೇದಿ 28/10/2024 ತಾನಿ ಅರ್ಜಿ ಪಾಡ್ದಿತ್ತೆರ್. ಉಳ್ಳಾಲ ತಾಲೂಕು ತಹಶೀಲ್ದಾರ್ ತಟ್ಟ್ ಮಲ್ಪೆರಗ್ ಜಾಗೆಡ್ ಇಪ್ಪುನ ಮುರಕಲ್ಲ್ ಕಡ್ಪೆರ ಪ್ರಮಾಣಪತ್ರ/ದೃಢೀಕರಣ ಪತ್ರ ಕೊರೊಲಿ ಪನ್ದ್ ತೇದಿ 21/03/2025ತಾನಿ ವರದಿ ಕೊರ್ದಿತ್ತ್ಂಡಲಾ ಗಣಿ ಇಲಾಖೆರ್ದ್ ಅನು ತಿಕ್ಕ್‌ದಿಜಿ.
ಈ ಬಗೆಟ್ ಅರ್ಜಿದ ವಿಚಾರಣೆ ಮಲ್ಪೆರೆ ಪಿರ್ಯಾದಿದಾರೆರ್ ಕುಡ್ಲ ಗಣಿ ಇಲಾಖೆ ಕಛೇರಿಗ್ ಪೋದಿತ್ತ್‌ದ್, ಅಲ್ಪದ ಉಪನಿರ್ದೇಶಕೆರಾಯಿನ ಕೃಷ್ಣವೇಣಿ ಮೇರ್ ಸಿಬ್ಬಂದಿ ಪ್ರದೀಪ್ ಪನ್ಪಿನಾರೆನ್ ಲೆಪ್ಪುಡಾದ್ ಫೈಲ್‌ಗ್ 50,000/- ಗೆತೊನ್ಲೆ, ಬೊಕ್ಕ ಸೈನ್ ಮಲ್ಪುಗ ಪನ್ದ್ ಲಂಚದ ಕೇನ್ದೆರ್. ಈ ಬಗೆಟ್ ಕುಡ್ಲ ಲೋಕಾಯುಕ್ತ ಪೊಲೀಸ್ ಸ್ಟೇಶನ್‌ಡ್ ಕುಡ್ಲ ಗಣಿ ಇಲಾಖೆದ ಉಪನಿರ್ದೇಶಕೆರಾಯಿನ ಕೃಷ್ಣವೇಣಿ ಬೊಕ್ಕ ಸಿಬ್ಬಂದಿ ಪ್ರದೀಪ್‌ನ ಮಿತ್ತ್ ಪ್ರಕರಣ ದಾಕಲಾತ್ಂಡ್.
ಕೋಡೆ, ತೇದಿ 28.05.2025 ತಾನಿ ಕುಡ್ಲ ಗಣಿ ಇಲಾಖೆದ ಉಪನಿರ್ದೇಶಕೆರಾಯಿನ ಕೃಷ್ಣವೇಣಿ, ಡ್ರೈವರ್ ಮಧು ನ ಮುಕೇನ ಮೂಲಕ ರೂ 50,000/- (ಐವ ಸಾರ) ಲಂಚೊದ ಕಾಸ್ ಗೆತೊನುನಗ ಲೋಕಾಯುಕ್ತ ಪೊಲೀಸೆರೆ ಬಲೆಕ್ ಬೂರ್ದೆರ್. ಈ ಅಧಿಕಾರಿ ಬೊಕ್ಕ ಸಿಬ್ಬಂದಿನ್ ವಶೊಕು ಗೆತೊಂದು ಜಡ್ತೆ ಮಲ್ತೊಂದುಲ್ಲೆರ್.
ಈ ಕಾರ್ಯಾಚರಣೆಡ್ ಕರ್ನಾಟಕ ಲೋಕಾಯುಕ್ತ ಪೊಲೀಸ್ ಕುಡ್ಲ ವಿಭಾಗೊದ ಪ್ರಭಾರ ಅಧೀಕ್ಷಕೆರ್ ಶ್ರೀ ಕುಮಾರಚಂದ್ರೆ ಮೆರೆನ ಮಾರ್ಗದರ್ಶನೊಡು, ಕುಡ್ಲ ಲೋಕಾಯುಕ್ತ ಪೊಲೀಸ್ ಸ್ಟೇಶನ್‌ದ ಪೊಲೀಸ್ ಉಪಾಧೀಕ್ಷಕೆರಾಯಿನ ಡಾ. ಗಾನ ಪಿ ಕುಮಾರ್, ಶ್ರೀ ಸುರೇಶ್ ಕುಮಾರ್.ಪಿ, ಪೊಲೀಸ್ ನಿರೀಕ್ಷಕೆರಾಯಿನ ಶ್ರೀಮತಿ ಭಾರತಿ ಜಿ, ಶ್ರೀ ಚಂದ್ರಶೇಖರ್ ಕೆ.ಎನ್ ಅಂಚೆನೇ ಒಡಿಪು ಲೋಕಾಯುಕ್ತ ಪೊಲೀಸ್ ಸ್ಟೇಶನ್‌ದ ಪೊಲೀಸ್ ನಿರೀಕ್ಷಕೆರಾಯಿನ ಶ್ರೀ ಮಂಜುನಾಥ, ಶ್ರೀ ರಾಜೇಂದ್ರ ನಾಯ್ಕ, ಅಂಚೆನೇ ಕುಡ್ಲ ಬೊಕ್ಕ ಒಡಿಪು ಲೋಕಾಯುಕ್ತ ಸಿಬ್ಬಂದಿಲೆನ ಒಟ್ಟುಗು ಟ್ರ್ಯಾಪ್ ಕಾರ್ಯಾಚರಣೆ ಮಲ್ತ್‌ದೆರ್.