Last updated on June 5th, 2025 at 04:56 pm
ಕುಡ್ಲ, ಜೂನ್ 5: ಬುಡಂದೆ 24 ಗಂಟೆದಾತ್ ಪೊರ್ತು ಡಾ ಎಸ್.ಪಿ. ಬಾಲಸುಬ್ರಹ್ಮಣ್ಯಂ ರೆನ 270 ಪದೊಕುಲೆನ್ ಪನ್ಪುನ ಮುಕೇನ ಬೆದ್ರದ ಯಶವಂತ್ ಎಂ.ಜಿ. ಗೋಲ್ಡನ್ ಬುಕ್ ಆಫ್ ವರ್ಲ್ಡ್ ರೆಕಾರ್ಡ್ಡ್ ದಾಕಲೆ ಬರೆತೆರ್.
ಟೌನ್ಹಾಲ್ಡ್ ಅಂಗಾರೆ ಮಧ್ಯಾಹ್ನ ಮೂಜಿ ಗಂಟೆಗ್ ಸುರು ಆಯಿನ “ಬಾಲಗಾನ ಯಶೋಯಾನ’ ನಿರರ್ಗಳ ಗಾಯನ ಬುಧವಾರ ಮಧ್ಯಾಹ್ನ 3 ಗಂಟೆ ಮುಟ್ಟ ನಡತ್ಂಡ್. ಗಾನ ಗಂಧರ್ವೆ ಡಾ| ಎಸ್.ಪಿ. ಬಾಲಸುಬ್ರಹ್ಮಣ್ಯಂ ಮೆರೆನ ಪುಟ್ಟಿನ ದಿನೊತ ಲೆಕ್ಕೊಡು ಯಶವಂತ್ ಒರಿಯೇ ಪದ ಪನ್ಡ್ದ್ ದಾಖಲೆ ಮಲ್ತೆರ್.
ಕಾರ್ಯಕ್ರಮೊನು ತೂಯಿನ ಗೋಲ್ಡನ್ ಬುಕ್ ಆಫ್ ವರ್ಲ್ಡ್ ರೆಕಾರ್ಡ್ ಏಷ್ಯಾ ಮುಖ್ಯಸ್ಥೆ ಡಾ| ಮನೀಶ್ ವಿಕ್ಟೋಯ್ ಗಣ್ಯೆರೆ ಒತ್ತುಪಾಲ್ಡ್ ಪ್ರಮಾಣ ಪತ್ರ ಕೊರ್ಯೆರ್.
ಅವೆರ್ದ್ ದುಂಬು ಪಾತೆರ್ನ ಮನೀಶ್, “ಮಾತೆರೆಗ್ಲಾ ನಮಸ್ಕಾರ” ಪನ್ದ್ ತುಳುಟೇ ಪಾತೆರ ಸುರು ಮಲ್ತೆರ್. ಯಶವಂತ್ ಮೇರ್ ಡಾ| ಎಸ್.ಪಿ. ಬಾಲಸುಬ್ರಹ್ಮಣ್ಯಂ ಮೆರೆನ ಪುಟ್ಟಿನ ದಿನೊನು ಆಚರಿತಿನ ಲೆಕ ಈತ್ನೇಟ ಏರ್ಲಾ ಆಚರಿತ್ದ್ಜೆರ್. 24 ಗಂಟೆ ಮುಟ್ಟ ಉಂತಾವಂದೆ ಪದ ಪನ್ಪುನವು ಕಮ್ಮಿದ ಬೇಲೆ ಅತ್ತ್. ಪಾಕ ವಿಶ್ವ ದಾಖಲೆಲೆನ್ ಯಾನ್ ತೂತೆ, ಆಂಡ ಇಂಚಿನ ಮಧುರವಾದ ದಾಖಲೆ ತೂತುಜಿ ಪನ್ದ್ ಪನ್ಡೆರ್.
24 ಗಂಟೆಡ್ ಗಂಟೆಗೊರ ಎಲ್ಯೆಟ್ 5 ನಿಮಿಷದ ವಿರಾಮ ಇತ್ತ್ದ್. ತೆನಸ್ ದಾಲ ತಿನಂದೆ ಕಾಲೀ ಜ್ಯೂಸ್ ಪರ್ದ್ ಪದ ಪನ್ತೆರ್. ಒಂಜಿ ಗಂಟೆ ಕುಲ್ಲುದು, ಕುಡೊಂಜಿ ಗಂಟೆ ಉಂತುದು ಪದ ಪನ್ತೆರ್.
ಒಡಿಪು ಜಿಲ್ಲಾ ಬಿಜೆಪಿ ಅಧ್ಯಕ್ಷೆ ಕಿಶೋರ್ ಕುಮಾರ್ ಪಾತೆರ್ದ್, ಕಲಾವಿದೆರೆನ್ ಅರಿತೊನ್ಡ ಕಲೆ ಒರಿಪುಂಡು ಪನ್ದ್ ಪನ್ಡೆರ್. ಕುಡ್ಲ ಎಸಿಪಿ ಗೀತಾ ಕುಲಕರ್ಣಿ, ಉದ್ಯಮಿ ವಾಲ್ಟರ್ ನಂದಳಿಕೆ, ಬೆದ್ರ ಎಕ್ಸಲೆಂಟ್ ಶಿಕ್ಷಣ ಸಂಸ್ಥೆಲೆನ ಅಧ್ಯಕ್ಷೆ ಯುವರಾಜ್ ಜೈನ್, ಮಾಜಿ ಎಸಿ ಪ್ರಭಾಕರ್ ಶರ್ಮಾ, ಉದ್ಯಮಿ ಪೂರ್ಣಚಂದ್ರ ಜೈನ್, ಜಿ.ಎಸ್. ಕಾಮತ್, ಸಾಮಾಜಿಕ ಕಾರ್ಯಕರ್ತೆ ಪ್ರಕಾಶ್ ಮಲ್ಪೆ, ಪಾಲಿಕೆ ಮಾಜಿ ಸದಸ್ಯೆ ಜಗದೀಶ್ ಶೆಟ್ಟಿ, ಯಶವಂತ್ ಮೆರೆನ ಅಪ್ಪೆ ಹೇಮಾವತಿ ಒತ್ತುಪಾಲ್ ಇತ್ತೆರ್.