Last updated on June 11th, 2025 at 05:58 pm
ಒಡಿಪು, ಜೂ. 11: ಒಡಿಪು ತಾಲೂಕ್‌ದ ಮೂಡನಿಡಂಬೂರು ಗ್ರಾಮೊದ ಪರ ಕೆಎಸ್‌ಆರ್‌ಟಿಸಿ ಬಸ್ ಉಂತಡೆದ ಆಶಾ ಬಾರ್‌ದ ಕೈತಲ್ ಸಾರ್ವಜನಿಕ ಜಾಗೆಡ್ ಅಕ್ರಮವಾದ್ ಗಂಗಸರ ಮಾರೊಂದಿತ್ತಿನ ಆಂಜೊವುನು ಒಡಿಪು ನಗರ ಪೊಲೀಸೆರ್ ಜೂನ್ 11 ತಾನಿ ಕೈದ್ ಮಲ್ತ್‌ದೆರ್.
ಪತ್ತ ಒಲವುದ ಆಧಾರೊಡು ದಾಳಿ ಮಲ್ತಿನ ಪೊಲೀಸೆರ್, ಹಾವೇರಿ ಜಿಲ್ಲೆದ ರಾಣೆಬೆನ್ನೂರು ನಿವಾಸಿ ಶಂಭುಲಿಂಗ್ ಮಡಿವಾಳ (37) ಪನ್ಪಿನಾಯನ್ ಕೈದ್ ಮಲ್ತ್‌ದೆರ್.
ಆರೋಪಿ ಒವ್ವೇ ಲೈಸೆನ್ಸ್‌ದಾಂತೆ ಸಾರ್ವಜನಿಕ ಜಾಗೆಡ್ ಲಾಭೊಗು ಬೋಡಾದ್ ಅಕ್ರಮವಾದ್ ಗಂಗಸರ ಮಾರೊಂದಿತ್ತೆ ಪನ್ದ್ ಆರೋಪ ಮಲ್ದೆರ್. ದಾಳಿದ ಪೊರ್ತುಡು, ಪೊಲೀಸೆರ್ ಆರೋಪಿರ್ದ್ 2,600 ರೂ. ಮೌಲ್ಯೊದ ಬೇತೆ ಬೇತೆ ಬ್ರಾಂಡ್‌ಲೆನ ಗಂಗಸರದ ಪ್ಯಾಕೆಟ್‌ಲು ಬೊಕ್ಕ 3,960 ರೂ. ಕಾಸ್ ವಶೊಕು ಗೆತೊಂದೆರ್.
ಈ ಬಗೆಟ್ ಒಡಿಪು ನಗರ ಪೊಲೀಸ್ ಸ್ಟೇಶನ್‌ಡ್ ಪ್ರಕರಣ ದಾಕಲಾತ್ಂಡ್. ಆರೋಪಿ ಶಂಭುಲಿಂಗನ್ ವಶೊಕು ಗೆತೊಂದು ನ್ಯಾಯಂತಡೆಕ್ ಹಾಜಿರಿ ಮಲ್ಪುವ ಪನ್ದ್ ಪೊಲೀಸೆರ್ ಒಲವು ಕೊರ್ತೆರ್.