Last updated on June 25th, 2025 at 09:24 am
ಉಬಾರ್, ಜೂ. 25: ಇನಿ ಕಾಂಡೆ ಕಾಂಡೆ ಕೆಮ್ಮಾರ ಸಂಕೊರ್ದು ಉಬಾರ್ ಗಾಂಧಿಪಾರ್ಕ್ದ ನಡುಟು ಮೂಜಿ ಮೂಜಿ ಕೆಎಸ್ಆರ್ಟಿಸಿ ಬಸ್ಲ್ ಹಾಲಾದ್ ಉಂತುದ. ಒಂಜೊಂಜೆತ ಒಂಜೊಂಜಿ ಕಂಪ್ಲೆಂಟ್. ಒಂಜೆತ ಶಾಫ್ಟ್ ಜಾಯಿಂಟ್ ಕಟ್ ಆಂಡ, ಬೊಕ್ಕೊಂಜೆತ ಟಯರ್ ಪಂಕ್ಚರ್, ಕುಡೊಂಜೆಟ್ ವ್ಯಾಕ್ಯೂಮ್ದ ಪ್ರಾಬ್ಲಮ್ಗೆ.
ಸುಬ್ರಹ್ಮಣ್ಯ ಉಬಾರ್ ರಾಜ್ಯ ಪೆರ್ಸಾದಿದ ಕೆಮ್ಮಾರ ಸಂಕದ ಕೈತಲ್ ಸುಬ್ರಹ್ಮಣ್ಯರ್ದ್ ಉಬಾರ್ ಆದ್ ಕುಡ್ಲಗ್ ಪೋಪುನ KA 19 F 2997 ನಂಬರ್ದ KSRTC ಬಸ್ ಟ್ರಾನ್ಸ್ಮಿಷನ್ ಶಾಫ್ಟ್ದ ಜಾಯಿಂಟ್ ಕಟ್ ಆದ್ ಉಂತುದುಂಡು. ಕಾಂಡೆ ಈ ಸಾದಿಯೆ ಪೋಪುನ ಶಾಲೆ ಕಾಲೇಜ್ದ ಜೋಕುಲು ನೆಟೆ ಪೋಪುನ ಲೆಕ್ಕದ ಸರಕಾರಿ ಬಸ್ಲೆನೇ ತಾಂಗ್ದುಪ್ಪುನೆರ್ದಾವರ ಒಂತೆ ಜೋಕುಲೆಗ್ ಬಂಙ ಆಂಡ್.
ಉಬಾರ್ ಸರಕಾರಿ ಕಾಲೇಜ್ದ ಕೈತಲ್ ಬೆಂಗಳೂರ್ಗ್ ಪೋಪುನ KA 19 F 3597 ನಂಬರ್ದ KSRTC ಬಸ್ ಅಶ್ವಮೇಧ ಬಸ್ ಟಯರ್ ಪಂಕ್ಚರ್ ಆದ್ ಉಂತುದುಂಡು. ಆ ಬಸ್ದ ಸಿಬ್ಬಂದಿಲು ಅಂಚೆನೇ ಕುಡೊಂಜಿ ಬಸ್ದ ಸಿಬ್ಬಂದಿಲು ಸೇರ್ದ್ ಟಯರ್ ಸಮ ಮಲ್ತೊಂದಿತ್ತೆರ್.
ಕುಡ ಒಂತೆ ಎದುರು ಬೈಪಾಸ್ಡ್ ಪೊಸ ಫ್ಲೈಓವರ್ದ ಕೈತಲ್ ವ್ಯಾಕ್ಯೂಮ್ ಸಿಸ್ಟಮ್ಡ್ ದಾದನಾ ತೊಂದರೆ ಇತ್ತಿನೆರ್ದಾವರ KA 19 F 3239 ನಂಬರ್ದ KSRTC ಬಸ್ ಸ್ಟಾರ್ಟ್ ಆವಂದೆ ಉಂತುದುಂಡು.
ಬಸ್ ಸಿಬ್ಬಂದಿಲೆ ಪ್ರಕಾರ ಎಲ್ಯ ಎಲ್ಯ ತೊಂದರೆಲು ಸುರು ಆನಗನೇ ಅವೆನ್ ಸಮ ಮಲ್ಪುನ ಬುಡ್ದ್ ಅಲಕ್ಕ ಹಾಲಾಪುನೇಟ ಇಲಾಖೆರ್ದ್ ಅವೆಕ್ ಬೋಡಾಪಿನ ವ್ಯವಸ್ಥೆ ಮಲ್ತೊಂದಿಜ್ಜೆರ್. ಎಂಕುಲು ಪನ್ಡಲಾ ಅವೆನೇ ಗಿಡಪುಲೆ ಪನ್ಪೆರ್. ಎಂಕುಲ ಆಪುಜ ಪನ್ಡನ್ಡ ಬೇತೆ ಡ್ರೈವರ್ನ್ ಪಾಡ್ದ್ ಕಡಪುಡುವೆರ್ ಪನ್ದ್ ತನ್ಕುಲೆ ಬೇನೆನ್ ಪನ್ಡೊನ್ಡೆರ್. ಅಂಚೆನೇ ಇತ್ತೆ ಇಪ್ಪುನ ರೋಡ್ದ ಕಂಡೀಷನ್ ಬಸ್ಲೆ ಬೊಕಲಾ ಹಾಲ್ ಮಲ್ತೊಂದುಂಡು, ಈ ಭಾಗೊಗು ಪಾಡುನ ಬಸ್ಲ್ ದುಂಬೇ ಪರತಾದ್ ಇಪ್ಪುವ, ಈ ರೋಡ್ ಅವೆನ್ ಬೊಕಲಾ ಲಗಾಡಿ ದೆಪ್ಪುಂಡು ಪನ್ದ್ ಪನ್ಡೆರ್.