Last updated on June 27th, 2025 at 04:27 pm
ಕುಡ್ಲ, ಜೂ. 27: ಇಂಚಿಪ ಏರೋ ಒರಿ ಗ್ರಾಮ ಪಂಚಾಯತ್ದ ಗ್ರಾಮ ಸಭೆಟ್ ಇಲಾಖೆದ ಅಧಿಕಾರಿಲು ಬೊಕ್ಕ ಜನಪ್ರತಿನಿಧಿಕುಲು ತುಳು ಪಾತೆರ್ಯೆರ ಬಲ್ಲಿ ಪನ್ದ್ ಕೊರ್ದಿತ್ತಿನ ಬಿನ್ನಪುನು ಜಿಲ್ಲಾ ಪಂಚಾಯತ್ದ ಮುಖ್ಯ ಕಾರ್ಯನಿರ್ವಹಣಾ ಅಧಿಕಾರಿ ಎದುರು ಪಿರ ತೂವಂದೆ, ಈ ನೆಲತ ಭಾಷಾ ಪರಂಪರೆನ್ ಗೆನ್ಪಂದೆ ತುಳುನಾಡ ಮಾತಾ ತಾಲೂಕ್ಲೆಗ್ ಪರಿಶೀಲನೆ ಮಲ್ತ್ ಕ್ರಮ ಗೆತೊನ್ಯೆರೆ ಕಡಪುಡ್ದಿನವು ತುಳುವೆರೆಗ್ ಎಚ್ಚಿನಕಲೆಗ್ ತೆರಿನ ವಿಚಾರ. ಅವೆರ್ದ್ ಬೊಕ್ಕ ತಂಕೊದ ತುಳುವೆರ್ ಜಿಲ್ಲಾ ಪಂಚಾಯತ್ಗ್ ಪೋದು ಅಕಲೆಗ್ ತೆರಿಪಾದ್ ಆ ನಿರ್ದೇಶನೊನು ಪಿರ ಗೆತೊನ್ಪಾವುನೆಟ್ ಯಶಸ್ವಿ ಆತೆರ್. ಈ ವಿಶಯ ಎಚ್ಚಿನ ತುಳುವೆರೆನ ಪಿತ್ತ್ಗೆಜಲುಲೆಕ ಮಲ್ತಿತ್ತ್ಂಡ್.
ಆ ಬೇನೆದ ಅಂಬಲ್ ಮಾಜುನ ದುಂಬೇ ಕುಡೊಂಜಿ ನಾಟಕ ಸುರು ಆತ್ಂಡ್. ಜಿಲ್ಲೆಡ್ 10% ಜನೊತಲಾ ಅಪ್ಪೆಭಾಷೆ ಅತ್ತಂದಿನ ಭಾಷೆನ್ ಇಲ್ಲ ಇಲ್ಲಗ್ ಎತ್ತಾವುನ ‘ಮನೆ ಮನೆ ಕನ್ನಡ ಜಾಗೃತಿ ಅಭಿಯಾನ’ಗ್ ಒಂಜಾತ್ ಜನ ಜತ್ತ್ದೆರ್. ಎಂಕ್ಲೆಗ್ ಕನ್ನಡೊದ ಮಿತ್ತ್ ಪಗೆ ಇಜ್ಜಿ. ಅಂಚ ಪನ್ದ್ ಮುರಾನಿ ಮುರಾನಿ ತುಳುನಾಡ್ಡೇ ತುಳುಭಾಷೆನ್ ದೊಂಕುನಂಚಿನ ನಿರ್ದೇಶನ ಸರಕಾರೊರ್ದು ಬನ್ನಗ ಉಸ್ಕು ದಮ್ಮು ದೆಪ್ಪಂದಿನ ಕಂದೊಡಿಲು ಇನಿಕಾನಗ ವಾ ಭಾಷೆ ಪತೊಂದು ತುಳುನು ದೊಂಕೆರ ಪಿದಡ್ದಿತ್ತೆರೋ ಅವೆನೇ ಪತೊಂದು ಇಲ್ಲ ಇಲ್ಲಗ್ ಬತ್ತ್ದ್ ಕನ್ನಡ ಪಾತೆರ್ಲೆ ಪನ್ದ್ ಪನ್ಪುನ ಏತ್ ಸಮ? ಕನ್ನಡೊದ ಪುಸ್ತಕೊನೇ ಓದುಲೆ ಪನ್ಪಿನ ಏತ್ ಸಮ? ಒಂಜಿ ರಾಜಕೀಯ ಪಕ್ಷೊದ ಬಾವುಟನ್ ಭಾಷೆದ ಪುದರ್ಡ್ ಮಾತೆರೆನ ಪುಗೆಲ್ಗ್ ಪಾಡೊಂದು ಪೋಪುನ ಏತ್ ಸಮ.
ಈ ಮಣ್ಣ್ಡ್ ಇತ್ತೆ ನಡಪೊಡಾಯಿನ ಕನ್ನಡ ಜಾಗೃತಿ ಅತ್ತ್…ತುಳುತ ಜಾಗೃತಿ, ತುಳು ಕಟ್ಟ್ಕಟ್ಲೆಲೆನ ಬಗೆಟ್ ಜಾಗೃತಿ, ತುಳು ಸಂಸ್ಕೃತಿದ ಬಗೆಟ್ ಜಾಗೃತಿ, ತುಳು ಲಿಪಿತ ಬಗೆಟ್ ಜಾಗೃತಿ, ತುಳು ಪರತಿರಿತ ಬಗೆಟ್ ಜಾಗೃತಿ, ತುಳು ಸಾಹಿತ್ಯದ ಬಗೆಟ್ ಜಾಗೃತಿ, ತುಳು ಬುಲೆಚ್ಚಿಲ್ದ ಬಗೆಟ್ ಜಾಗೃತಿ. ಆಂಡ ಉಂದೆನ್ ಮಾತಾ ಬುಡುದು, ಜಿಲ್ಲೆದ 10% ಜನಲಾ ಅಪ್ಪೆಬಾಸೆ ಆದ್ ಪಾತೆರಂದಿನ ಬಾಸೆನ್ ಮಾತೆರ್ನ ಮಿತ್ತ್ ಪುದೆ ತುಂಬಾಯೆರ ಪಿದಡ್ದೆರ್. ಮೊಕುಲು ವಾ ಮೋನೆ ಪತೊಂದು ಇಲ್ಲ್ ಇಲ್ಲಡೆ ಬರ್ಪೆರಾ..!
ತುಳು ಲಿಪಿ ತುಳು ಭಾಷೆಡ್ ಏತೇತೋ ಮಹಾಕಾವ್ಯೊಲೆನ್ 600-700 ವರ್ಸೊಗು ದುಂಬೇ ಬರೆದಿತ್ತೆರ್ನ್ಡಲಾ, ಇನಿಕ್ಲಾ ನಮ್ಮ ನಡುಟು ಕೆಲ ತುಳುವೆರ್ ತುಳುಕು ಲಿಪಿ ಇಜ್ಜಿ ಪನೊಂದು ತಿರ್ಗುವೆರ್. ಜಾಗೃತಿ ಬೋಡಾಯಿನ ಈ ವಿಷಯೊಡು ಆಂಡ ಮೊಕುಲು ಮುಲ್ಪ ಮುಡುಬೂತೊಲು.
ಸಿನಿಮಾ, ನಾಟಕ ಪನ್ದ್ ಮನೋರಂಜನೆಗ್ ತುಳುವ ನೆಲತ ಸತ್ಯೊಲೆನ ಏಸ ಪಾಗ್ದ್ ಸ್ಟೇಜ್ಡ್ ಬಿಂಗಿರಿ ಕಟೊಂದು ನಲಿಪುನ ಜಾಗೃತಿಗ್ ಮೊಕುಲು ಇಜ್ಜೆರ್. ಇತ್ತೆ ತೆಡಿಲ್ ಬರ್ಸೊದ ಬೆರಿಟೆ ಲಾಂಬುದ ಲೆಕ ಕುಡ ಲಕ್ಕೊಂದ.
ಈತ್ನೇಟ ತುಳುವೆರ್ ಪಾಕ ತೂತೆರ್, ನನ ನನಲಾ ಭಾಷೆದ ಪುದರ್ಡ್ ತುಳುವೆರೆನ್ ದೊಂಕೆರೆ ತೂಂಡ, ಬೇತೆ ಭಾಷೆನೇ ಪಾತೆರೊಡು ಪನ್ದ್ ಕೋಂಗಿ ಕಟ್ಟೊಂದು ಬತ್ತ್ಂಡ ಅಕಲೆನ್ ಎಂಚ ಪೊಲಿಪೊಡು ಪನ್ದ್ ತುಳುವೆರೆಗ್ ತೆರಿದ್ಂಡ್.