Last updated on June 27th, 2025 at 01:29 pm
ಚೆನ್ನೈ, ಜೂನ್ 27: ಸಿಬಿಲ್ ಕ್ರೆಡಿಟ್ ಸ್ಕೋರ್ ಲೋನ್ ಗೆತೊನುನಗ ಮಾತ್ರ ತೂಪೆರ್ ಪನ್ದ್ ಎನ್ನ್ದಿತ್ತರ್ನ್ಡ ನಿಕುಲು ಎನ್ನ್ದಿನವು ಸುಳ್ಳು. ಇತ್ತೆ ಸಿಬಿಲ್ ಸ್ಕೋರ್ ನಿಕ್ಲೆನ ಕೆಲ ಬೇಲೆಲೆಗ್ಲಾ ಬಾರೀ ಮುಖ್ಯ ಪನ್ಪಿನ ಇತ್ತೆ ಸಾಬೀತಾತ್ಂಡ್. ನೆಗೆಟಿವ್ ಸಿಬಿಲ್ ಸ್ಕೋರ್ ಇತ್ತಿನಾಯಗ್ ಎಸ್ಬಿಐ ಬ್ಯಾಂಕ್ ತಾನ್ ಕೊರ್ದಿತ್ತಿನ ಬೇಲೆನ್ ಕ್ಯಾನ್ಸಲ್ ಮಲ್ದಿನ ಅಪರೂಪದ ನಡಕೆ ನಡತಿತ್ತ್ದ್, ಮದ್ರಾಸ್ ಹೈಕೋರ್ಟ್ಲಾ ಎಸ್ಬಿಐದ ಕ್ರಮೊಕು ನಡುಟು ಬರ್ಯೆರ ಕೇನ್ದಿಜಿ.
ಕಾರ್ತಿಕೇಯನ್ ಪನ್ಪಿ ಜವನೆ ಸ್ಟೇಟ್ ಬ್ಯಾಂಕ್ ಆಫ್ ಇಂಡಿಯಾ (SBI) ಡ್ ಸರ್ಕಲ್ ಬೇಸ್ಡ್ ಆಫೀಸರ್ (CBO) ಬೇಲೆಗ್ ಪರೀಕ್ಷೆ, ಇಂಟರ್ವ್ಯೂ ಬೊಕ್ಕ ಮೆಡಿಕಲ್ ಚೆಕಪ್ ಸೇರ್ದ್ ಮಾತಾ ಹಂತೊದ ನೇಮಕಾತಿಡ್ ಪಾಸ್ ಆದಿತ್ತೆ, ಆಂಡ ಆಯನ ಸಿಬಿಲ್ ಸ್ಕೋರ್ ಮಾತ್ರ ನೆಗೆಟಿವ್ ಇತ್ತ್ಂಡ್. ಅಂಚಾದ್ ಬ್ಯಾಂಕ್ ಆಯನ ಬೇಲೆನ್ ಕ್ಯಾನ್ಸಲ್ ಮಲ್ತಿತ್ತ್ಂಡ್. ಉಂದೆನ್ ಕಾರ್ತಿಕೇಯನ್ ಹೈಕೋರ್ಟ್ಡ್ ಪ್ರಶ್ನೆ ಮಲ್ತಿತ್ತೆರ್.
‘ಸಿಬಿಲ್ದ ವರದಿ ಪ್ರಕಾರ, ಕಾರ್ತಿಕೇಯನ್ಗ್ ಫೈನಾನ್ಸಿಯಲ್ ಡಿಸಿಪ್ಲಿನ್ ಇಜ್ಜಂದಿನ ತೋಜಿದ್ ಬರ್ಪುಂಡು. ಬೇಲೆ ಕೊರ್ಪುನ ಕಂಪೆನಿ ಪ್ರಕಟ ಮಲ್ದಿನ ನೇಮಕಾತಿ ನಿಯಾಮವಳಿ ಪ್ರಕಾರ, ನೇಮಕಾತಿಗ್ ದುಂಬೇ ಅರ್ಜಿದಾರೆರೆಗ್ ಬೇಲೆದ ಅರ್ಹತೆದ ಕಂಡೀಷನ್ಲೆನ್ ಸಮ ಪನ್ದಿತ್ತ್ಂಡ್’ ಪನ್ದ್ ಎಸ್ಬಿಐ ಪರ ವಕೀಲೆರ್ ವಾದ ಮಲ್ತೆರ್.
ಉಂದೆಕ್ ಆಕ್ಷೇಪ ತೂಪಾಯಿನ ಕಾರ್ತಿಯೇನ್ ಪರ ವಕೀಲೆರ್, ‘ಬೇಲೆಗ್ ಅಧಿಸೂಚನೆ ಪಿದಡ್ಪಾನಗ ಅರ್ಜಿದಾರೆರ್ ಒವ್ವೇ ಬಾಕಿ ಅತ್ತ್ಂಡ ನೆಗೆಟಿವ್ ಸಿಬಿಲ್ ವರದಿ ಇಜ್ಜಂಡ್. ಅತ್ತಂದೇ, ಕ್ರೆಡಿಟ್ ಕಾರ್ಡ್ದ ಮಾತಾ ಬಾಕಿನ್ ಕಟ್ಟ್ದೆರ್, ಸಿಬಿಲ್ಲಾ ಬಾಕಿ ಮಲ್ದೆರ್ ಪನ್ದ್ ತೂಪಾದಿಜಿ’ ಪನ್ದ್ ನ್ಯಾಯಂತಡೆದ ಗೇನೋಗು ಕನತೆರ್. ಅರ್ಜಿದ ವಿಚಾರಣೆ ಮಲ್ತಿನ ನ್ಯಾಯಮೂರ್ತಿ ಎನ್.ಮಾಲಾ, ‘ಕಡ ಪಿರ ಕೊರ್ಪುನೆಟ್ ಬಜೀ ದೆತ್ತ್ ಪಾಡಿನ ರೆಕಾರ್ಡ್ ಅಂಚೆನೇ ಕಮ್ಮಿ ಸಿಬಿಲ್ ಸ್ಕೋರ್ ಇತ್ತಿನೆರ್ದಾವರ, ಅರ್ಜಿದಾರೆರೆನ ನೇಮಕಾತಿನ್ ಕ್ಯಾನ್ಸಲ್ ಮಲ್ದಿನೆನ್ ಎಸ್ಬಿಐ ಸಮರ್ಥನೆ ಮಲ್ತೊಂದುಂಡು. ಈ ವಿಷಯೊಡು ನಡತಿನ ವಿಚಾರಣೆದ ಆಧಾರೊಡು, ಅರ್ಜಿದಾರೆರೆ ರಿಟ್ ಅರ್ಜಿನ್ ನನ ದುಂಬು ಕೊನೊಪುನೆಟ್ ಅರ್ಥ ಇಜ್ಜಿ, ಅಂಚಾದ್ ರಿಟ್ ಅರ್ಜಿನ್ ವಜಾ ಮಲ್ದ್ಂಡ್’ ಪನ್ದ್ ತೀರ್ಪುಡು ತೆರಿಪಾದೆರ್.