Last updated on July 1st, 2025 at 07:12 pm
ಕುಡ್ಲ, ಜು 01: 2020ಡ್ ನಡತಿನ ಕೊಲೆ ಪ್ರಕರಣೊಗು ಸಂಬಂಧಿತ್ದ್, ಸುಪ್ರೀಂಕೋರ್ಟ್ರ್ದ್ ಜಾಮೀನ್ ಕ್ಯಾನ್ಸಲ್ ಆದಿತ್ತ್ಂಡಲಾ ಕಲ್ವ ಪಾಸ್ ಪೋರ್ಟ್ ಗಲಸ್ದ್ ಪಿದಯಿ ದೇಶೋಡು ದೆಂಗ್ತಪ್ಪಾದಿತ್ತಿನ ಆರೋಪಿನ್ ಕುಡ್ಲ ಪೊಲೀಸೆರ್ ಕೈದ್ ಮಲ್ದೆರ್. ಕೈದಾತಿನಾಯನ್ ಮೊಹಮ್ಮದ್ ಮುಸ್ತಫಾ @ ಮುಸ್ತಾ ಪನ್ದ್ ಗುರ್ತ ಪತ್ತ್ದೆರ್.
ಆರೋಪಿ ಮೊಹಮ್ಮದ್ ಮುಸ್ತಫೆ 2020ತ ಜೂನ್ 5 ತಾನಿ ಮುಲ್ಕಿದ ವಿಜಯ ಸನ್ನಿದಿ ಪೆರ್ಸಾದಿದ ಕೈತಲ್ ಪಟ್ಟಪಗೆಲ್ಡೇ ನಡುಸಾದಿಡ್ ಅಬ್ದುಲ್ ಲತೀಫ್ ಪನ್ಪಿನಾಯನ್ ಬೇತೆ ಆರೋಪಿಲೆ ಒಟ್ಟು ಸೇರ್ದ್ ಕೆರ್ದಿತ್ತೆ, ಈ ಪ್ರಕರಣೊಗು ಸಂಬಂಧಿತ್ದ್ ಆರೋಪಿಲಾಯಿನ ದಾವೂದ್ ಹಕೀಂ, ಮೊಹಮ್ಮದ್ ಮುಸ್ತಾಫೆ ಬೊಕ್ಕ ಬೇತೆ 10 ಜನತ ಮಿತ್ತ್ ದೋಷಾರೋಪಣಾ ಪಟ್ಟಿನ್ ನ್ಯಾಯಂತಡೆಕ್ ಸಂದಾದಿತ್ತೆರ್. ಇತ್ತೆ ನ್ಯಾಯಂತಡೆದ ವಿಚಾರಣಾ ಹಂತೊಡು ಉಂಡು.
ಆರೋಪಿಗ್ 2020ದ ಅಕ್ಚೋಬರ್ 10 ತಾನಿ ಹೈಕೋರ್ಟ್ ಜಾಮೀನ್ ಕೊರ್ದಿತ್ತ್ಂಡ್. ಸುಪ್ರೀಂ ಕೋರ್ಟ್ 2022ತ ಏಪ್ರಿಲ್ 22ತಾನಿ ಆಯನ ಜಾಮೀನು ಕ್ಯಾನ್ಸಲ್ ಮಲ್ತಿತ್ತ್ಂಡ್. ಬೊಕ್ಕ ಆರೋಪಿ ಕಲ್ವ ಪಾಸ್ ಪೋರ್ಟ್ ಗಲಸ್ದ್ ಪಿದಯಿ ದೇಶೋಗು ಪದ್ರಾಡಾತೆ. ಆರೋಪಿ ಅಕ್ರಮವಾದ್ ಒಮನ್ ದೇಶೊರ್ದು ನೇಪಾಳದ ಮುಕೇನ ಭಾರತೊಗು ಬತ್ತ್ದೆ. ಈ ಬಗೆಟ್ಲಾ ಆರೋಪಿನ ಮಿತ್ತ್ ಪ್ರಕರಣ ದಾಕಲಾದಿತ್ತ್ಂಡ್ ಪನ್ದ್ ಪೋಲೀಸ್ ಮೂಲೊಲು ತೆರಿಪಾದ.
ಆರೋಪಿ ಮೂಜಿ ವರ್ಸೊರ್ದಿಂಚಿ ನ್ಯಾಯಂತಡೆಕ್ ವಿಚಾರಣೆಗ್ ಹಾಜಿರಾದಿಜ್ಜಂಡ್. ಆರೋಪಿನ ಬಗೆಟ್ ಒಲವು ತಿಕ್ಕಿನ ಪೊಲೀಸೆರೆ ವಿಶೇಷ ಕೂಟ ಮೂಲ್ಕಿದ ಪಕ್ಷಿಕೆರೆ ಕೈತಲ್ ಸೋಮವಾರ ಆಯನ್ ಪತ್ತ್ದೆರ್.