ಬೆದ್ರ ತಾಲೂಕು ತುಳುವ ಮಹಾಸಭೆತ ಸಂಚಾಲಕಿ ಆದ್ ಪೆರಿಯ ತುಳು ಸಾಹಿತಿ ಜಯಂತಿ ಎಸ್. ಬಂಗೇರ

Last updated on July 2nd, 2025 at 03:35 pm

ಬೆದ್ರ: ತುಳು ಭಾಷೆ, ಸಾಹಿತ್ಯ, ಜಾನಪದ ಬೊಕ್ಕ ನಾಟಕ ಕ್ಷೇತ್ರೊಡು ಬೆನೊಂದುಪ್ಪುನ ಪೆರಿಯ ಸಾಹಿತಿ ಶ್ರೀಮತಿ ಜಯಂತಿ ಎಸ್. ಬಂಗೇರ ಮೆರೆನ್ ಬೆದ್ರ ತಾಲೂಕು ತುಳುವ ಮಹಾಸಭೆತ ಸಂಚಾಲಕಿ ಆದ್ ಅಧಿಕೃತವಾದ್ ನೇಮಕ ಮಲ್ದೆರ್.

ಜಯಂತಿ ಎಸ್. ಬಂಗೇರ ಮೆರೆಗ್ ಎಲ್ಯೆರ್ದೇ ಸಾಹಿತ್ಯೊಡ್ ಬಾರೀ ಆಸಕ್ತಿ ಇತ್ತ್‌ದ್, ಇತ್ತೆ ತುಳು ಸಾಹಿತ್ಯೊದ ಮೆನ್ಕುಬೊಲ್ಲಿ ಪನ್ದೇ ಪುದರ್ ಪಡೆತೆರ್. ಮೆರೆನ ‘ಎನ್ನಂದಿ ಭಾಗ್ಯ’, ‘ಮನಸ್ಸ್ ಬದಲಾನಗ’,‘ ಸತ್ಯ ನೆಗಪುನಗ’, ‘ಮಾಯಿದ ಪುಣ್ಣಮೆ’, ‘ಸೊರಗೆದ ಪೂ’ ನಾಟಕೊಲು ಬೊಕ್ಕ ಕಥಾಸಂಕಲನೊಲೆಗ್ ರಾಜ್ಯಮಟ್ಟೊದ ಪ್ರಶಸ್ತಿ ತಿಕ್ಕ್‌ದ್ಂಡ್.
ಮೇರ್ ‘ಉಡಲ್’ ಪನ್ಪಿ ತುಳು ತ್ರೈಮಾಸಿಕ ಪತ್ರಿಕೆದ ಸಂಪಾದಕೆರ್‌ಲಾ ಆದಿತ್ತೆರ್. ಮೆರೆನ 100ರ್ದ್‌ಲಾ ಎಚ್ಚಿನ ಕಿಞ್ಞ ಕಥೆಕುಲು ಆಕಾಶವಾಣಿಡ್ ಪ್ರಸಾರ ಆತ.

ಕರ್ನಾಟಕ ತುಳು ಸಾಹಿತ್ಯ ಅಕಾಡೆಮಿ ಪ್ರಶಸ್ತಿ, ಧರ್ಮಸ್ಥಳ ರತ್ನವರ್ಮ ಹೆಗ್ಗಡೆ ಪ್ರಶಸ್ತಿ, ಎಸ್. ಯು. ಪಣಿಯಾಡಿ ಪ್ರಶಸ್ತಿ, ವೀರರಾಣಿ ಅಬ್ಬಕ್ಕ ಪ್ರಶಸ್ತಿ, ತುಳು ಭಾಷೆಡ್ ಕಿತ್ತೂರು ರಾಣಿ ಚೆನ್ನಮ್ಮ ಪ್ರಶಸ್ತಿ ಪಡೆತಿನ ಒರ್ತೇ ಮಹಿಳಾ ಸಾಹಿತಿ, ವಿಶ್ವ ತುಳು ಸಮ್ಮೇಳನ – ದುಬೈಡ್ ಗೌರವ ಪ್ರಶಸ್ತಿ ಪಡೆತಿನ ಮೇರ್ ಕರ್ನಾಟಕ ತುಳು ಸಾಹಿತ್ಯ ಅಕಾಡೆಮಿದ ಮಾಜಿ ಪದುಕೆದಿ, ಅಖಿಲ ಭಾರತ ತುಳು ಒಕ್ಕೂಟದ ಸಂಘಟನಾ ಕಾರ್ಯದರ್ಶಿ ಆದುಪ್ಪುನ ಮೇರ್ ಬೇತೆ ಪಾಕ ಸಂಘ ಸಂಸ್ಥೆಲೆಡ್‌ಲಾ ಉಲ್ಲೆರ್.