Last updated on July 3rd, 2025 at 01:42 pm
ಪುತ್ತೂರು, ಜು. 03:ಪೆದ್ದುನ ಪೊರ್ತುಡು ಲೆಕ್ಕೊರ್ದೆಚ್ಚ ನೆತ್ತೆರ್ ಪೋದು ಕರ್ನೂರ್ದ ಪೊಂಜೊವು ಒರ್ತಿ ತೀರ್ದಿನ ಬಗೆಟ್ ಸಂಪ್ಯ ಪೊಲೀಸೆರೆಗ್ ಒಯಿಲ್ ಬೈದ್ಂಡ್. ಕರ್ನೂರು ಮೊಹಮ್ಮದ್ ಬಶೀರ್ ಕೆ. ಎ. ಪನ್ಪಿನಾರೆನ ಬೊಡೆದಿ ಆಯಿಷತ್ ಸೌಜಾನಾ ತೀರ್ದಿನ ಪೊಂಜೊವು.
ಆಯಿಷತ್ ಸೌಜಾನ ಮೆರೆನ್ ಜೂ.27ತಾನಿ ಪೆದ್ದುನ ಬೇನೆ ಬತ್ತಿನೆರ್ದಾರ ಆರೆನ ಕಂಡನೆ ಕಾಸ್ರೋಡ್ ಸರಕಾರಿ ಆಸ್ಪತ್ರೆಗ್ ದಾಕಲ್ತ್ದೆರ್. ಆರೆನ್ ತೂವೊನ್ಯೆರ ಜುಬೈದಾ ಕಾವು ಪನ್ಪಿನಾರ್ ಇತ್ತೆರ್. ಜು.1ತಾನಿ ಕಾಂಡೆ 05.30 ಗಂಟೆಗ್ ಆಯಿಷತ್ ಸೌಜಾನ ನಾರ್ಮಲ್ ಡೆಲಿವರಿಡ್ ಆಣ್ ಬಾಲೆನ್ ಪೆದ್ದ್ದೆರ್. ಅವೆರ್ದ್ ಬೊಕ್ಕ ಆರೆಗ್ ಬಾರೀ ನೆತ್ತೆರ್ ಪೋಯೆರ ಸುರು ಆತಿನೆರ್ದಾವರ ಕಾಸ್ರೋಡ್ ಸರಕಾರಿ ಆಸ್ಪತ್ರೆದ ಡಾಕ್ಟ್ರೆನ ಪಾತೆರದ ಪ್ರಕಾರ ಕುಡ್ಲ ಕೆಎಂಸಿ ಆಸ್ಪತ್ರೆಗ್ ದಾಕಲ್ತ್ದಿತ್ತೆರ್. ಆಂಡ ಆಯಿಷತ್ ಸೌಜಾನ ಬಾರೀ ನೆತ್ತೆರ್ ಪೋದು ಮರ್ದ್ ಪಲಿಪಂದೆ ತೀರ್ದೆರ್ ಪನ್ದ್ ಆರೆನ ಪಲಯೆ ಜಾಲ್ಸೂರು ಸಣ್ಣಕದಿಕೆ ಮಹಮ್ಮದ್ ಶಿಹಾಬುದ್ದೀನ್ ಪನ್ಪಿನಾರ್ ಕೊರ್ತಿನ ಒಯಿಲ್ದ ಪ್ರಕಾರ ಪುತ್ತೂರು ಗ್ರಾಮಾಂತರ ಪೊಲೀಸೆರ್ ಪ್ರಕರಣ ದಾಕಲ್ತ್ಂದೆರ್.