Last updated on July 3rd, 2025 at 11:39 am
ಬೆಂಗಳೂರು, ಜು. 03: ಬೆಂಗಳೂರು ಗ್ರಾಮಾಂತರ ಜಿಲ್ಲೆದ ಪುದರ್ನ್ ‘ಬೆಂಗಳೂರು ಉತ್ತರ ಜಿಲ್ಲೆ” ಪನ್ದ್ ಅಂಚೆನೇ ಬಾಗೇಪಲ್ಲಿ ಪೇಂಟೆದ ಪುದರ್ನ್ ‘ಭಾಗ್ಯ ನಗರ’ ಪನ್ದ್ ಪಗಪೆರ ನಂದಿಬೆಟ್ಟಡ್ ನಡತಿನ ವಿಶೇಷ ಸಚಿವ ಸಂಪುಟ ಸಭೆಟ್ ಸರ್ಕಾರ ನಿರ್ಧಾರ ಮಲ್ದ್ಂಡ್.
ಈ ಪೊರ್ತುಡು ವಿರೋಧಪಕ್ಷೊಲೆನ ಬಾರೀ ವಿರೋಧದ ನಡುಟೇ ಬೆಂಗಳೂರು ಕೇಂದ್ರ ವಿಶ್ವವಿದ್ಯಾಲಯೊಗು ಮಾಜಿ ಪ್ರಧಾನಿ, ಕರಿದ್ ಪೋತಿನ ಡಾ. ಮನಮೋಹನ್ ಸಿಂಗ್ ರೆನ ಪುದರ್ ದೀಪುನ ತೀರ್ಮಾನ ಮಲ್ತಿತ್ತ್ದ್, ‘ಡಾ.ಮನಮೋಹನ್ ಸಿಂಗ್ ಬೆಂಗಳೂರು ನಗರ ವಿಶ್ವವಿದ್ಯಾಲಯ’ ಪನ್ದ್ ಪೊಸ ಪುದರ್ ದೀಪಿನ ಪ್ರಸ್ತಾವನೆಗ್ ಒಪ್ಪಿಗೆ ಕೊರ್ತೆರ್. ಈ ಮುಕೇನ ಒಂಜೇ ಸಚಿವ ಸಂಪುಟ ಸಭೆಟ್ ಮೂಜಿ ಪೊಸ ಪುದರ್ಲೆನ ಪ್ರಸ್ತಾವನೆಗ್ ಅಂಗೀಕಾರ ತಿಕ್ಕ್ದ್ಂಡ್.
ಸಭೆ ಆದ್ ಬೊಕ್ಕ ಸುದ್ದಿಗೋಷ್ಠಿ ಮಲ್ತ್ದ್ ಪಾತೆರ್ನ ಮುಖ್ಯಮಂತ್ರಿ ಸಿದ್ದರಾಮಯ್ಯೆರ್, ಚಿಕ್ಕಬಳ್ಳಾಪುರ ಜಿಲ್ಲೆದ ತಾಲೂಕು ಆದುಪ್ಪುನ ಬಾಗೇಪಲ್ಲಿ ಪೇಂಟೆದ ಪುದರ್ನ್ ಪಗಪೆರ ಸ್ಥಳೀಯ ಶಾಸಕೆ ಎಸ್.ಎನ್.ಸುಬ್ಬಾರೆಡ್ಡಿ ಸರ್ಕಾರೊಗು ಪ್ರಸ್ತಾವನೆ ಸಂದಾದಿತ್ತೆರ್. ಆಂಧ್ರ ಗಡಿಟ್ ಈ ಪೇಂಟೆ ಇತ್ತ್ದ್ ಹಳ್ಳಿನ್ ತೆಲುಗುಡ್ ಪಲ್ಲಿ ಪನ್ದ್ ಲೆಪ್ಪುವೆರ್. ಅಂಚಾದ್ ಬಾಗೇಪಲ್ಲಿ ಪಗತೆಗ್ ಭಾಗ್ಯನಗರ ಪನ್ದ್ ಮಲ್ಪುನ ತೀರ್ಮಾನ ಗೆತೊಂದ ಪನ್ದ್ ಪನ್ಡೆರ್.
ಬಾಗೇಪಲ್ಲಿಡ್ ಪಾಕ ಹಳ್ಳಿಲೆನ ಪುದರ್ಡ್ ಪಲ್ಲಿ ಪನ್ದ್ ಉಂಡು. ಐಕ್ಲೆನ ಕತೆ ದಾದ ಪನ್ದ್ ಕೇನ್ಡಿನೆಕ್, ‘ಶಾಸಕೆರ್ ಬಾಗೇಪಲ್ಲಿದ ಪುದರ್ ಪಗಪೆರ ಬಿನ್ನಪು ಮಲ್ತಿತ್ತೆರ್. ಅಂಚಾದ್ ಪಗಪುನ ನಿರ್ಣಯ ಮಲ್ತ್ದ. ಒರಿನ ಹಳ್ಳಿಲೆನ ಬಗೆಟ್ ಪಿನ್ಪಿಜ್ಜಿ’ ಪನ್ದ್ ಸ್ಪಷ್ಟ ಮಲ್ತೆರ್.
ಬೆಂಗಳೂರು ನಗರ ವಿಶ್ವವಿದ್ಯಾಲಯೊಗು ‘ಡಾ.ಮನಮೋಹನ್ ಸಿಂಗ್ ಬೆಂಗಳೂರು ನಗರ ವಿಶ್ವ ವಿದ್ಯಾಲಯ’ ಪನ್ದ್ ಪೊಸ ಪುದರ್ ದೀಪುನ ತೀರ್ಮಾನ ಮಲ್ತ್ದ. ಮನಮೋಹನ್ ಸಿಂಗ್ ಆರ್ಥಿಕ ತಜ್ಞೆರ್, ಪ್ರಧಾನಿ ಆದ್ ದೇಶೊಗು ಪಾಕ ಕೊರ್ಪುಗೆ ಕೊರ್ತೆರ್. ಅಂಚಾದ್ ಆರೆನ ಪುದರ್ ದೀಪುನ ಸೂಕ್ತ ಪನ್ದ್ ನಿರ್ಧಾರ ಮಲ್ತ್ದ ಪನ್ದ್ ಸಿದ್ದರಾಮಯ್ಯೆ ಪನ್ಡೆರ್.