Last updated on July 3rd, 2025 at 02:32 pm
ಬೆಂಗಳೂರು, ಜು: 03: ದಕ್ಷಿಣ ಕನ್ನಡ ಪನ್ಪಿ ಪುದರ್ ಈ ಜಿಲ್ಲೆಗ್ ಸೂಕ್ತವಾಯಿನ ಪುದರ್ ಅತ್ತ್, ಈ ಜಿಲ್ಲೆಗ್ ಮುಲ್ಪದ ಸಂಸ್ಕೃತಿಗ್ ಒಂಬುನ, ಮುಲ್ಪದ ಪರತಿರಿನ್ ತೋಜಾವುನ ಪುದರ್ ಬೋಡು ಪನ್ಪಿ 95 ವರ್ಸೊರ್ದಿಂಚಿದ ಬಿನ್ನಪುಗು ಕುಡ ಪಿರಜೂವ ಬರೊಂದುಂಡು. ಈ ವಿಷಯೊಡು 2 ದಿನೊಕು ದುಂಬು ನಡತಿನ ಆನ್ಲೈನ್ ಪಟ್ಟಾಂಗೊಡು ಜಾತಿ, ಧರ್ಮ, ರಾಜಕೀಯ ಮಾತಾ ಬುಡುದು ತುಳುನಾಡ್ದ ಸಂಸದೆರ್, ಶಾಸಕೆರ್, ರಾಜಕಾರಣಿಲು, ಧಾರ್ಮಿಕ ಮುಖಂಡೆರ್, ಸಂಘಸಂಸ್ಥೆಲೆನ ಪ್ರತಿನಿಧಿಲು, ಸಂಘಟಕೆರ್ ಮಾತಾ ಒಟ್ಟು ಸೇರ್ದ್ ದಕ್ಷಿಣ ಕನ್ನಡದ ಪುದರ್ ಪಗಪುನವು ನಿಜವಾದ್ ಆವೊಡಾಯಿನ ವಿಚಾರ, ದಾಸ್ಯದ ಸಂಕೇತ ಆದುಪ್ಪುನ ಪುದರ್ನ್ ಪಗಪೊಡು ಪನ್ದ್ ಒತ್ತರ್ಮೆದ ನಿರ್ಧಾರ ಮಲ್ತಿತ್ತೆರ್.
ಉಂದೆತ ನನದ ಪಜ್ಜೆ ಆದ್, ಕೆಪಿಸಿಸಿ ಪ್ರಧಾನ ಕಾರ್ಯಂತೆರ್ ರಕ್ಷಿತ್ ಶಿವರಾಮ್ ಇನಿ ಬೆಂಗಳೂರುಡು ವಿಧಾನಸಭಾ ಸ್ಪೀಕರ್ ಯು.ಟಿ. ಖಾದರ್ರೆನ್ ಭೇಟಿ ಆದ್ ದಕ್ಷಿಣ ಕನ್ನಡ ಜಿಲ್ಲೆದ ಪುದರ್ ಪಗಪುನೆತ ಬಗೆಟ್ ಪಾತೆರ್ಯೆರ್.
ಉಂದೆಕ್ ಸ್ಪೀಕರ್ ಯು.ಟಿ ಖಾದರ್ ಮೇರ್ ಸಕಾರಾತ್ಮಕವಾದ್ ಸ್ಪಂದನೆ ಕೊರ್ದು, ಸಮಿತಿದೊಟ್ಟುಗು ಯಾನುಲ್ಲೆ ಪನ್ಪಿನ ಭರವಸೆ ಕೊರ್ತೆರ್.
ಈ ಮುಕೇನ ತುಳುವೆರೆನ 95 ವರ್ಸೊದ ಕನೊಕು ಪೊಸ ಕಳೆ ಬತ್ತ್ದ್, ನಿಜ ಆಪಿನ ಕಾಲ ಮುಟ್ಟ ಬೈದ್ಂಡ್.