Last updated on July 9th, 2025 at 06:27 pm
ಕುಡ್ಲ, ಜು. 09: ಮಾದಕ ಸೊತ್ತುಲೆನ ಸಪ್ಲೈ ಪ್ರಕರಣೊಡು ಕುಡ್ಲ ನಗರ ಪೊಲೀಸೆರ್ ಕುಡ ಮೂವೆರ್ ಆರೋಪಿಲೆನ್ ಕೈದ್ ಮಲ್ತಿತ್ತ್ದ್, ಕಾಸಾ ಬೊಕ್ಕ ಮೂಜಿ ಮೊಬೈಲ್ ಫೋನ್ಲೆನ್ ವಶೊಕು ಗೆತೊಂದೆರ್.
ಮಧ್ಯಪ್ರದೇಶೊದ ಬರ್ವಾನಿ ಜಿಲ್ಲೆ, ಮೋಹನ್ ಪಡವಾ ಗ್ರಾಮೊದ ಮಾಯಾರಾಮ್(32), ಮಹಾರಾಷ್ಟ್ರದ ಜಲಗಾಂವ್ ಜಿಲ್ಲೆ ಚೋಪ್ಡಾದ ಪ್ರೇಮಸಿಂಗ್ ರಾಮ ಪವಾರ(48) ಬೊಕ್ಕ ಅನಿಲ್ ಪ್ರಕಾಶ್ ಕೋಲಿ(35) ಕೈದಾತಿನ ಆರೋಪಿಲು.
ಈ ಪ್ರಕರಣ ಜುಲೈ 2 ತಾನಿ ಮಂಗಳೂರು ಸೆನ್ ಕ್ರೈಂ ಪೊಲೀಸ್ ಸ್ಟೇಶನ್ಡ್ ಅಪರಾಧ ಕ್ರಮಾಂಕ: 31/2025 ಅಡಿಟ್ ಎನ್.ಡಿ.ಪಿ.ಎಸ್ ಕಾಯ್ದೆದ ಸೆಕ್ಷನ್ 8(c),20(b)(ii)(B) ದ ಪ್ರಕಾರ ದಾಕಲಾತ್ಂಡ್.
ಈ ಪ್ರಕರಣೊಡು ಮಾದಕ ಸೊತ್ತುಲೆನ ಗೆತೊನುನಕುಲು ಕೊರ್ತಿನ ಒಲವುದ ಆಧಾರೊಡು ಪೊಲೀಸೆರ್ ಜಡ್ತೆ ಸುರು ಮಲ್ತಿತ್ತೆರ್. ಮಹಾರಾಷ್ಟ್ರ ಬೊಕ್ಕ ಮಧ್ಯಪ್ರದೇಶೊರ್ದು ಮಾದಕ ಸೊತ್ತುಲೆನ್ ಕುಡ್ಲ ಪೇಂಟೆಗ್ ಸಪ್ಲೈ ಮಲ್ಪುನ ಆಜಿ ಜನೊನು ಪೊಲೀಸೆರ್ ಪತ್ತೆ ಮಲ್ತ್ದ್ ದುಂಬೇ ದಸ್ತಗಿರಿ ಮಲ್ದೆರ್. ಆರೋಪಿಲೆನ್ ನ್ಯಾಯಂತಡೆದ ಎದುರು ಹಾಜಿರ್ ಮಲ್ತಿತ್ತ್ದ್, ನ್ಯಾಯಾಂಗ ಕೈದ್ದ ಆದೇಶ ಆತ್ಂಡ್.
ಅವೆರ್ದ್ ಬೊಕ್ಕ ಪ್ರಕರಣೊಡು ಮಹಾರಾಷ್ಟ್ರ ಬೊಕ್ಕ ಮಧ್ಯಪ್ರದೇಶ ರಾಜ್ಯೊಗು ವಿಶೇಷ ಕೂಟೊನು ಕಡಪುಡ್ದ್ ಕುಡ ಮೂಜಿ ಆರೋಪಿಲೆನ್ ನಾಡ್ಪತ್ತ್ದ್ ದಸ್ತಗಿರಿ ಮಲ್ದೆರ್. ಈ ಮೂವೆರ್ ಆರೋಪಿಲೆನ್ ಜುಲೈ 9ದಾನಿ ನ್ಯಾಯಂತಡೆದ ಎದುರು ಹಾಜಿರ್ ಮಲ್ಪೆರ ಇತ್ತ್ದ್, ನ್ಯಾಯಂತಡೆ ಆರೋಪಿಲೆಗ್ ನ್ಯಾಯಾಂಗ ಕೈದ್ದ ಆದೇಶ ಮಲ್ದ್ಂಡ್.
ಆರೋಪಿಲು ಗಲಸ್ದಿನ ಮೂಜಿ ಮೊಬೈಲ್ ಫೋನ್ ಹಾಗೂಅಂಚೆನೇ1,78,920 ರೂ. ಕಾಸ್ನ್ ವಶೊಕು ಗೆತೊಂದೆರ್.
ಪ್ರಕರಣೊದ ಜಡ್ತೆ ದುಂಬರಿದಿದ್ಂಡ್. ಈ ಪ್ರಕರಣೊದ ಆರೋಪಿಲೆನ್ ನಾಡ್ಪತ್ತುನೆಟ್ ಕ್ರೈಂ ಪೊಲೀಸ್ ಸ್ಟೇಶನ್ ಬೊಕ್ಕ ಕುಡ್ಲ ಪೇಂಟೆದ ವಿಶೇಷ ಕೂಟೊದ ಅಧಿಕಾರಿ ಬೊಕ್ಕ ಸಿಬ್ಬಂದಿಲು ಪಾಲ್ಪಡೆತೆರ್.