Last updated on July 15th, 2025 at 03:38 pm
ಬೆದ್ರ, ಜು. 15: ಬೆದ್ರದ ಕಾಲೇಜ್ ಒಂಜೆತ ಇರ್ವೆರ್ ಉಪನ್ಯಾಸಕೆರ್ ಬೊಕ್ಕ ಅಕ್ಲೆನ ದೋಸ್ತಿ ಒರಿ, ಒರ್ತಿ ವಿದ್ಯಾರ್ಥಿನಿನ ಮಿತ್ತ್ ನಿರಂತರ ಅತ್ಯಾಚಾರ ಮಲ್ದಿನ ಆರೋಪಡ್ ಬೆಂಗಳೂರ್ದ ಮಾರತಹಳ್ಳಿ ಪೊಲೀಸ್ ಸ್ಟೇಶನ್ಡ್ ಪ್ರಕರಣ ದಾಕಲಾತ್ಂಡ್. ಪ್ರಕರಣೊಡು ಇತ್ತೆ ಮೂವೆರ್ ಆರೋಪಿಲೆನ್ ಪೊಲೀಸೆರ್ ಕೈದ್ ಮಲ್ದೆರ್. ಕೈದಾತಿನಕ್ಲೆನ್ ಫಿಸಿಕ್ಸ್ ಉಪನ್ಯಾಸಕೆ ನರೇಂದ್ರೆ, ಬಯಾಲಜಿ ಉಪನ್ಯಾಸಕೆ ಸಂದೀಪ್ ಬೊಕ್ಕ ಅಕ್ಲೆನ ದೋಸ್ತಿ ಅನೂಪ್ ಪನ್ದ್ ಗುರ್ತ ಪತ್ತ್ದೆರ್.
ನೋಟ್ಸ್ ಕೊರ್ಪುನ ನೆವನೊಡು ಅತ್ಯಾಚಾರ
ಫಿಸಿಕ್ಸ್ ಉಪನ್ಯಾಸಕೆ ನರೇಂದ್ರೆ ನೋಟ್ಸ್ ಕೊರ್ಪುನ ನೆವನೊಡು ಪೊಣ್ಣಗ್ ಮುಟ್ಟ ಆದಿತ್ತೆ. ಬೊಕ್ಕ ಮೆಲ್ಲ ಮೆಲ್ಲ ಚಾಟ್ ಮಲ್ಪುನು, ನೋಟ್ಸ್ ಕೊರ್ಪುನು ಮಾತ ಮಲ್ಪೆದೆ. ಅಂಚೆನೇ ವಿದ್ಯಾರ್ಥಿನಿನ ಒಟ್ಟುಗು ಸಸಾರಡ್ ಇತ್ತಿನ ಉಪನ್ಯಾಸಕೆ, ಆಲ್ ಬೆಂಗಳೂರ್ಗ್ ಬತ್ತಿ ಬೊಕ್ಕಲಾ ಚಾಟ್ ಮಲ್ಪುನು, ನೋಟ್ಸ್ ಕಡಪುಡುನ ಮಾತಾ ಮಲ್ಪೆದೆ. ಅವ್ವೇ ನೆವನೊಡು ಮಾರತಹಳ್ಳಿದ ದೋಸ್ತಿನ ರೂಮ್ಗ್ ಲೆತೊಂದು ಪೋದು ಅತ್ಯಾಚಾರೊಲಾ ಮಲ್ತಿತ್ತೆ. ಆತೇ ಅತ್ತಂದೆ ಈ ವಿಷಯೊನು ಬೇತೆ ಏರೆಗ್ಲಾ ಪನಂದಿಲೆಕ ಪೋಡಿಕಟ್ಟಾದಿತ್ತೆ.
ಉಪನ್ಯಾಸಕೆ ನರೇಂದ್ರೆ ಅತ್ಯಾಚಾರ ಮಲ್ತಿ ಬೊಕ್ಕ ಬಯಾಲಜಿ ಉಪನ್ಯಾಸಕೆ ಸಂದೀಪ್ ಲಾ ಪೊಣ್ಣನ ಮಿತ್ತ್ ಅತ್ಯಾಚಾರ ಮಲ್ಪೆರ ತೂತೆ. ಆ ಪೊರ್ತುಡು ಆಲ್ ವಿರೋಧ ಮಲ್ತಿತ್ತಲ್. ಅಪಗ, “ಈ ನರೇಂದ್ರನ ಒಟ್ಟುಗು ಇಪ್ಪುನ ಫೋಟೊ ಬೊಕ್ಕ ವಿಡಿಯೋ ಎನಡ ಉಂಡು. ಅವೆನ್ ಕಾಲೇಜ್ಡ್ ಮಾತೆರೆಗ್ಲಾ ಗೊತ್ತಾಪುಲೆಕ ಮಲ್ಪುವೆ” ಪನ್ದ್ ಬ್ಲ್ಯಾಕ್ಮೇಲ್ ಮಲ್ತ್ದ್ ಸಂದೀಪ್, ಅತ್ಯಾಚಾರ ಮಲ್ತ್ದೆ.
ಉಪನ್ಯಾಸಕೆರೆ ದೋಸ್ತಿರ್ದ್ಲಾ ಬ್ಲ್ಯಾಕ್ಮೇಲ್, ರೇಪ್
ವಿದ್ಯಾರ್ಥಿನಿನ ಮಿತ್ತ್ ಸಂದೀಪ್ ಅತ್ಯಾಚಾರ ಮಲ್ತಿನ ರೂಮ್ ಅನೂಪ್ ಪನ್ಪಿನಾಯನ ಆದಿತ್ತ್ಂಡ್. ನಡಕೆದ ಬೆರಿಟೇ ಪೊಣ್ಣನ್ ಕಾಂಟಾಕ್ಟ್ ಮಲ್ತಿನ ಅನೂಪ್, ‘ಈ ಎನ್ನ ರೂಮ್ಗ್ ಬತ್ತಿನವು ಸಿಸಿ ಟಿವಿಡ್ ರೆಕಾರ್ಡ್ ಆತ್ಂಡ್. ಎನ್ನ ರೂಮ್ಡ್ ಸಿಸಿಟಿವಿ ಉಂಡು’ ಪನ್ದ್ ಪೋಡಿಕಟ್ಟಾದೆ. ಬೊಕ್ಕ ಆಯೆಲಾ ಪೊಣ್ಣನ ಮಿತ್ತ್ ಅತ್ಯಾಚಾರ ಮಲ್ತ್ದೆ.
ಉಪನ್ಯಾಸಕೆರೆಗ್ ಎದುರು ಪಾತೆರ್ಯೆರೆ ಆವಂದೆ ಸುರುಟು ಮನಿಪಂದೆ ಇತ್ತಿನ ವಿದ್ಯಾರ್ಥಿನಿ, ಬೊಕ್ಕ ಸಮಸ್ಯೆಲು ಎಚ್ಚ ಆವೊಂದು ಬತ್ತಿನೇ ಕೃತ್ಯೊದ ಬಗೆಟ್ ಅಪ್ಪೆಅಮ್ಮಡ ಪನ್ಡೊನ್ದಲ್. ಅಪ್ಪೆಅಮ್ಮೆ ಆಲೆನ್ ಮಹಿಳಾ ಆಯೋಗಗ್ ಲೆತೊಂದು ಪೋತೆರ್. ಅಲ್ಪ ಆಲೆಗ್ ಕೌನ್ಸೆಲಿಂಗ್ ಮಲ್ಪಾದ್ ಪೊಲೀಸೆರೆಡ ಒಯಿಲ್ ಬರೆಪಾದೆರ್.
ಇತ್ತೆ ಮೂವೆರ್ ಆರೋಪಿಲೆನ್ ಕೈದ್ ಮಲ್ದಿನ ಮಾರತಹಳ್ಳಿ ಪೊಲೀಸೆರ್ ಜಡ್ತೆ ಮಲ್ತೊಂದುಲ್ಲೆರ್. ಈ ಉಪನ್ಯಾಸಕೆರ್ ಉಂದೆಕ್ ದುಂಬುಲಾ ಬೇತೆ ಕೆಲ ವಿದ್ಯಾರ್ಥಿನಿಯೆರೆ ಮಿತ್ತ್ ಅತ್ಯಾಚಾರ ಮಲ್ತ್ದ್ ಏರೆಡಲಾ ಪನಂದಿ ಲೆಕ ಬಾಯಿ ಕಟ್ಟ್ದುಪ್ಪುನ ಅನುಮಾನ ತೋಜಿದ್ ಬತ್ತಿನೆರ್ದಾವರ, ಈ ಬಗೆಟ್ ಜಡ್ತೆ ನಡತೊಂದುಂಡು.