Last updated on July 16th, 2025 at 04:25 pm
ಕುಡ್ಲ, ಜು. 16 : ತನ್ನ ಬಂಙೊನು ಪನ್ಡೊನ್ದು ಬತ್ತಿನ ಪೊಂಜೊವುನು ಪೊಲೀಸ್ ಕಾನ್ಸ್ಟೇಬಲ್ಲೇ ದುರುಪಯೋಗ ಮಲ್ತೊಂದು ತನ್ನ ಅರ್ಬುಗು ಗಲಸೊಂದಿನ ನಡಕೆ ಕಡೆಸ್ಸ್ದ್ ಬೊಲ್ಪುಗು ಬೈದಿತ್ತ್ದ್, ಆರೋಪಿ ಪೊಲೀಸ್ ಕಾನ್ಸ್ಟೇಬಲ್ನ್ ಪೊಲೀಸ್ ಕಮಿಷನರ್ನ ಸೂಚನೆದ ಪ್ರಕಾರ ಕಂಕನಾಡಿ ನಗರ ಪೊಲೀಸೆರ್ ಕೈದ್ ಮಲ್ತ್ದೆರ್.
ಸಂತ್ರಸ್ತೆದಿ ಪೊಂಜೊವು ತನನ್ ಪೊಲೀಸ್ ಕಾನ್ಸ್ಟೇಬಲ್ ಒರಿ ಅತ್ಯಾಚಾರ ಮಲ್ತ್ದೆ ಪನ್ದ್ ಸೀದಾ ಪೊಲೀಸ್ ಕಮಿಷನರ್ ಸುಧೀರ್ ರೆಡ್ಡಿ ಮೆರೆನ್ ತಿಕ್ಕ್ದ್ ಪನ್ಡೊನ್ದೆರರ್. ಆ ಪ್ರಕಾರ, ಕಂಕನಾಡಿ ಸ್ಟೇಶನ್ಡ್ ಪ್ರಕರಣ ದಾಕಲ್ತ್ದ್ ಆರೋಪಿ ಕಾವೂರು ಸ್ಟೇಶನ್ದ ಪೊಲೀಸ್ ಕಾನ್ಸ್ಟೇಬಲ್ ಚಂದ್ರ ನಾಯಕ್ ಪನ್ಪಿನಾಯನ್ ಕೈದ್ ಮಲ್ದೆರ್. ಉಂಬ್ಯೆ ಬಾಗಲಕೋಟೆ ಮೂಲೊದಾಯೆ ಪನ್ದ್ ತೆರಿದ್ ಬೈದ್ಂಡ್.
ಆತೇ ಅತ್ತಂದೆ, ಪ್ರಕರಣೊಡು ಸಂತ್ರಸ್ತೆದಿ ಪೊಂಜೊವುನ ಕಂಡನ್ಯನ್ಲಾ ಪೊಲೀಸೆರ್ ಕೈದ್ ಮಲ್ದೆರ್. ರಿಯಲ್ ಎಸ್ಟೇಟ್ ಮಲ್ತೊಂದಿತ್ತಿನ ಕಂಡನೆ ತನ್ನ ಬೊಡೆದಿನ ಉರ್ಬುಲಿ ವಿಡಿಯೋ ಮಲ್ತ್ ದೀದ್ ಕಿರುಕುಳ ಕೊರೊಂದಿತ್ತೆ ಪನ್ಡ್ದ್, ಅವೆತ ಬಗೆಟ್ ತೆರಿನ ಪೊಲೀಸ್ ಕಾನ್ಸ್ಟೇಬಲ್ ಚಂದ್ರ ನಾಯಕ್ ಆರೋಪಿ ಕಂಡನ್ಯನ್ ಪೋಡಿಪಾದ್ ವಿಡಿಯೋ ಡಿಲೀಟ್ ಮಲ್ಪಾದಿತ್ತೆ. ಆಂಡ, ಅವೆರ್ದ್ ಬೊಕ್ಕ ಪೊಂಜೊವುನ ಅಸಹಾಯಕತೆ ಗಲಸೊಂದು ಅತ್ಯಾಚಾರ ಮಲ್ತ್ದೆ. ಉಂದೆರ್ದಾವರ ಬೆಸರ್ಡ್ ಪೊಂಜೊವು ಸೀದಾ ಪೊಲೀಸ್ ಕಮಿಷನರ್ಡನೇ ದೂರು ಕೊರ್ತೆರ್.