Last updated on July 18th, 2025 at 10:42 am
ಕುಡ್ಲ, ಜು 18: ಕಡ ಕೊರ್ಪುನ ನೆವನೊಡು ಉದ್ಯಮಿಲೆಗ್ ಸುಮಾರ್ ರಡ್ಡ್ ಕೋಟಿ ರೂಪಾಯಿರ್ದ್ಲಾ ಎಚ್ಚ ದಗೆ ಮಲ್ದಿನ ಪ್ರಕರಣೊಡು ಆರೋಪಿನ್ ಕುಡ್ಲ ನಗರ ಪೊಲೀಸ್ ಆಯುಕ್ತೆರೆ ಮುತಾಲಿಕೆಡ್ ಗುರುವಾರ ರಾತ್ರೆ ಪಡತಿನ ಮಲ್ಲ ಕಾರ್ಯಾಚರಣೆ ಒಂಜೆಟ್ ಅರೆಸ್ಟ್ ಮಲ್ತ್ದೆರ್. ಕೈದಾತಿನ ಆರೋಪಿನ್ ಜಪ್ಪುದಮೊಗೇರ್ ನಿವಾಸಿ ರೋಶನ್ ಸಲ್ಡಾನ(45) ಪನ್ದ್ ಗುರ್ತ ಪತ್ತ್ದೆರ್.
ಉಂಬ್ಯನ್ ಗುರುವಾರ ರಾತ್ರೆ ಕುಡ್ಲ ಕಮಿಷನರ್ ಸುಧೀರ್ ಕುಮಾರ್ ರೆಡ್ಡಿ ಬೊಕ್ಕ ಎಸಿಪಿ ರವೀಶ್ ನಾಯಕ್ ಮುತಾಲಿಕೆದ ಕೂಟ ಕಾರ್ಯಾಚರಣೆ ಮಲ್ತ್ದ್ ಕೈದ್ ಮಲ್ದೆರ್ ಪನ್ದ್ ತೆರಿದ್ ಬೈದ್ಂಡ್. ರೋಹನ್ ಸಲ್ಡಾನ ಉದ್ಯಮಿ ಂದ್ ಪನೊಂದು ಪಿದಯಿರಾಜ್ಯ, ಪಿದಯಿ ಜಿಲ್ಲೆದ ಮಲ್ಲ ಕಾಸ್ದಕ್ಲೆನ್ ಈಡ್ ಮಲ್ತ್ದ್ ಜಾಗೆದ ವೈವಾಟ್ದೊಟ್ಟುಗು ಕಡ ಕೊರ್ಪೆ ಪನ್ದ್ ನಂಬಾವೆದೆ. ಇಂಚ ಆರೋಪಿ ಕಾಲಿ 3 ತಿಂಗೊಲುಡೇ 45 ಕೋಟಿ ರೂ. ವೈವಾಟ್ ಮಲ್ದಿನ ಪತ್ತೆ ಆತ್ಂಡ್. ಕರಿನ ಕೆಲ ವರ್ಸೊರ್ದಿಂಚಿ 200 ಕೋಟಿ ರೂ.ಗ್ಲಾ ಎಚ್ಚ ದಗೆ ಮಲ್ತ್ದೆ ಪನ್ದ್ ಪೊಲೀಸೆರ್ ಒಲವು ಕೊರ್ತೆರ್.
ಆರೋಪಿ ರೋಹನ್ ಸಲ್ಡಾನಾ, ಜಾಗೆದ ವೈವಾಟ್ ಮಲ್ತೊಂದು, ತಾನ್ ಒರಿ ಉದ್ಯಮಿ ಪನ್ದ್ ತೋಜಾವೊಂದು ಮಲ್ಲಾಕ್ಲೆನ ವಿಶ್ವಾಸ ಗೆಂದೊಂದಿತ್ತೆ. ಜಪ್ಪುದಮೊಗೇರ್ದ ಐಷಾರಾಮಿ ಬಂಗ್ಲೆಗ್ ಅಕ್ಲೆನ್ ಲೆತೊಂದು ಬರ್ಪೆದೆ. ಆಯನ ಬಂಗ್ಲೆ, ಜೀವನಶೈಲಿಗ್ ಉದ್ಯಮಿಲು ಮಂಗೆ ಆಪೆದೆರ್. ರಂಗ್ದ ಪಾತೆರೊಗು ಮರ್ಲಾದ್ ದುಂಬು ಪಿರ ತೂವಂದೆ ಕೋಟಿಗಟ್ಲೆ ಕಾಸ್ ಕೊರ್ಪೆದೆರ್.
ಸುರುತ ಸುತ್ತುದ ಪಾತೆರಕತೆ ಆಯಿನೇ ಉದ್ಯಮಿಲೆನ್ ತನ್ನ ದಗೆತ ಬಲೆಕ್ ಬೂರ್ಪಾವೆದಿನ ರೋಹನ್, 50 ಕೋಟಿರ್ದ್ 100 ಕೋಟಿ ರೂ. ವೈವಾಟ್ ಅತ್ತ್ಂಡ ಅವೆರ್ದ್ ಮಲ್ಲ ಅಮಂಂಟ್ ಕಡ ಕೊರ್ಯೆರೆ ಉಂಡು ಪನ್ದ್ ಕಾಸ್ ಕೇನೆದೆ. ತಾನ್ ಎನ್ನಿನಾತ್ ಕಾಸ್ ಪೀಂಕಾದ್ ಬೊಕ್ಕ ಉದ್ಯಮಿಲೆಗ್ ಅವ್ವು ಇಂದುನ್ದ್ ನೆವನ ಪನ್ಡ್ದ್ ಪದ್ರಾಡಾಪೆದೆ. ಇಂಚ ಕಾಲಿ 3 ತಿಂಗೊಲುಡೇ 45 ಕೋಟಿ ರೂ ವೈವಾಟ್ ಮಲ್ದಿನ ಪತ್ತೆ ಆತ್ಂಡ್.
ಆರೋಪಿ ರೋಹನ್ ಸಲ್ಡಾನಾನ ಲಕ್ಸುರಿ ಬೆಡ್ ರೂಮ್ದ ಕೈತಲ್ ಹೈಡ್ ಔಟ್ ರೂಮ್ ಒಂಜಿ ಉಂಡು. ಬೆಡ್ ರೂಮ್ ಕಬೋರ್ಡ್ದ ಉಲಯಿ ಒಂಜಿ ಕಲ್ವಬಾಕಿಲ್ ಉಂಡು. ಅವೆನ್ ದೆತ್ತ್ಂಡ್ ನೇಲ್ಯ ಅದೆ ಉಂಡು. ಪೊಲೀಸೆರ್ ಅತ್ಂಡ ಮಂಗೆ ಆತಿನ ಉದ್ಯಮಿಲು ಬತ್ತೆರ್ನ್ಡ ಈ ಅದೆಟೇ ದೆಂಗ್ದ್ ಕುಲ್ಲೆದೆ. ರೋಹನ್ ಸಲ್ಡಾನಾನ ಇಲ್ಲ್ ತೂದು ಪೊಲೀಸೆರೇ ಶಾಕ್ ಆತೆರ್, ದಾಯೆ ಪನ್ಡ ಇಲ್ಲಡೊರ್ಮೆ ಫಾರಿನ್ ಮಾಲ್ದ ರಾಶಿಯೇ ಇತ್ತ್ಂಡ್. ಕೋಟಿ ಕೋಟಿ ಮೌಲ್ಯೊದ ಫಾರಿನ್ ಗಂಗರ ಇಲ್ಲಡ್ ತಿಕ್ಕ್ದ್ಂಡ್.