Last updated on July 21st, 2025 at 03:58 pm
ಕುಡುಮ, ಜು. 21: ಸೌಜನ್ಯಗ್ ನ್ಯಾಯ ತಿಕ್ಕೊಡು ಪನ್ದ್ ಪಾದಯಾತ್ರೆ ಮಲ್ತೊಂದು ಬೆಂಗಳೂರುರ್ದ್ ಕುಡುಮಗ್ ಬೈದಿನ ಕಬ್ಜಾ ಶರಣ್ ಪನ್ಪಿನಾಯನ್ ಬೊಕ್ಕ ಆಯನ ಕೂಟೊನು ಕುಡುಮದ್ವಾರೊದ ಕೈತಲ್ ಗ್ರಾಮೊದಕುಲು ಉಂತಾಯೆರ್.
ಆಯನ್ ದ್ವಾರೊದಲ್ಪ ಉಂತಾದ್, ಗ್ರಾಮೊದಕುಲು ಶ್ರೀ ಕ್ಷೇತ್ರೊದ ಪುದರ್ ತೆಟ್ಟಾಯೆರ ಪಾದಯಾತ್ರೆ ಮಲ್ತೊಂದುಲ್ಲ, ಕಲ್ವ ದೇವಮಾನವೆ ಪನ್ಡಿನೆಕ್ ಸ್ಪಷ್ಟನೆ ಕೊರು ಪನ್ದ್ ಪನ್ಡೆರ್. ಧರ್ಮಸ್ಥಳ ಕ್ಷೇತ್ರೊದ ಬಗೆಟ್ ಎಲ್ಯೆ ಮಲ್ತ್ ಪಾತೆರ್ದಿನೆಕ್ ಗ್ರಾಮೊದಕುಲು ಕಬ್ಜಾ ಶರಣ್ನ್ ತಡೆದ್ ಪ್ರಶ್ನೆ ಮಲ್ದೆರ್.
ಈ ನಡುಟು ಒಂತೆ ಪೊರ್ತು ಗೊಂದಲೊದ ವಾತಾವರಣ ಉಂಡಾಂಡ್. ಪೋಡಿಗೆ ಉಂಡು, ಪಾದಯಾತ್ರೆ ಬನ್ನಗ ಗಾಡಿಡ್ ಫಾಲೋ ಮಲ್ತೊಂದು ಬತ್ತೆರ್ ಪನ್ದ್ ಶರಣ್ ಪನ್ನಗ, ಫಾಲೋ ಮಲ್ತಿನ ಗಾಡಿದ ನಂಬರ್ ಕೊರು ಪನ್ದ್ ಊರುದಕುಲು ಕೇನ್ದೆರ್. ಆತೇ ಅತ್ತಂದೆ ನಿನ್ನ ವೀಡಿಯೋ ಲೈಕ್, ಕಮೆಂಟ್, ಶೇರ್ಗ್ ನಾಟಕ ಮಲ್ಪೊರ್ಚಿ, ಲೈವ್ಡೇ ಮಾಪು ನಟ್ಟ್ ಪನ್ದ್ ಆಗ್ರಹ ಮಲ್ತ್ದ್ ಆಕ್ರೋಶ ತೂಪಾದೆರ್.
ಈ ಪೊರ್ತುಡು ಧರ್ಮಸ್ಥಳ ಪೊಲೀಸೆರ್ ನಡುಟು ಬತ್ತ್ದ್, ಪರಿಸ್ಥಿತಿನ್ ಅಂಕೆಗ್ ಕನತ್ದೆರ್. ಇತ್ತೆ ಕಬ್ಜಾ ಶರಣ್ನ ಕೂಟ ಪೊಲೀಸ್ ಸ್ಟೇಶನ್ಗ್ ಪೋತುಂಡು. ಶರಣ್ ಪನ್ತಿನ ಪಾತೆರೊಲೆಗ್ ಸ್ಪಷ್ಟನೆ ಕೊರೊಡು ಪನ್ದ್ ಊರುದಕುಲು ಆಗ್ರಹ ಮಲ್ದೆರ್.