Last updated on July 23rd, 2025 at 02:08 pm
ಕುಡ್ಲ, ಜು. 23: 24 ಪ್ರಕರಣೊಲೆಡ್ ಕೈ ಇತ್ತ್ದ್, ಜಾಮೀನ್ ಗೆತೊಂದು ಪದ್ರಾಡಾದಿತ್ತಿನ ಆರೋಪಿನ್ ಸಿಸಿಬಿ ಪೊಲೀಸೆರ್ ಕಾರ್ಯಾಚರಣೆ ಮಲ್ತ್ದ್ ಅರೆಸ್ಟ್ ಮಲ್ತ್ದೆರ್.
ಕೈದಾತಿನಾಯನ್ ಮೊಹಮ್ಮದ್ ಅಬ್ದುಲ್ ಫಯಾನ್(27) ಪನ್ದ್ ಗುರ್ತ ಪತ್ತ್ದೆರ್.
ಆರೋಪಿಗ್ ಪಾಕ ಪ್ರಕರಣೊಲೆಡ್ ಪಾಲಿತ್ತ್ದ್ ನ್ಯಾಯಂತಡೆದ ವಿಚಾರಣೆದ ಪೊರ್ತುಡು ಬರಂದೇ ದೆಂಗ್ತಪ್ಪಾದಿತ್ತೆ. 22-07-2025 ತಾನಿ ಕುಡ್ಲ ಸಿಸಿಬಿ ಪೊಲೀಸೆರ್ ವಶೊಕು ಗೆತೊಂದು ನನದ ಕ್ರಮೊಕು ಬರ್ಕೆ ಪೊಲೀಸ್ ಸ್ಟೇಶನ್ಗ್ ಕೊರ್ತೆರ್.
ಕುಡ್ಲ ಪೇಂಟೆ ಬೊಕ್ಕ ಮಂಗಳೂರು ಜಿಲ್ಲೆದ ಬೇತೆ ಬೇತೆ ಪೊಲೀಸ್ ಸ್ಟೇಶನ್ಲೆಡ್ ಕಲ್ವೆ, ಕೆರ್ಪುನ ಪುನೆಪು, ಕರ್ಪಿಲ್ಲ್ಡ್ ಅಧಿಕಾರಿಲೆನ ಬೇಲೆಗ್ ತಲೆಪು ಇಂಚ ಸುಮಾರ್ 24 ಪ್ರಕರಣೊಲೆಡ್ ಪುದರಿತ್ತಿನಾಯೆ ನ್ಯಾಯಂತಡೆದ ಜಾಮೀನ್ಡ್ ಪಿದಯಿ ಬತ್ತ್ದ್ ಬೊಕ್ಕ ನ್ಯಾಯಂತಡೆಕ್ ವಿಚಾರಣೆಗ್ ಬರಂದೆ ದೆಂಗ್ತಪ್ಪಾದಿತ್ತೆ.
ಉಂಬ್ಯನ ಮಿತ್ತ್ ಕುಡ್ಲ ಕಮೀಷನರೇಟ್ ಸೀಮೆದ ಕೊಣಾಜೆ, ಉಳ್ಳಾಲ ಪೊಲೀಸ್ ಸ್ಟೇಶನ್ಡ್ ಅಂಚೆನೇ ಮಂಗಳೂರು ಜಿಲ್ಲೆದ ಬಂಟ್ವಾಳ ನಗರ, ಬಂಟ್ವಾಳ ಗ್ರಾಮಾಂತರ, ಉಬಾರ್, ಕಡಬ, ಪುತ್ತೂರ ನಗರ ಪೊಲೀಸ್ ಸ್ಟೇಶನ್ಲೆಡ್ ಬೇತೆ ಬೇತೆ ಸರಕಾರಿ ಕಛೇರಿ, ಶಾಲೆ ಬೊಕ್ಕ ಅಂಗಡಿಲೆಡ್ ಕಂಡ್ದಿನ ಪ್ರಕರಣೊಲು ಉಲ್ಲ.