Last updated on July 28th, 2025 at 06:41 pm
ಕಡಬ, ಜು. 28: ರಡ್ಡ್ ದಿನೊರ್ದಿಂಚಿ ಉಸಾರ್ ತತ್ತ್ದ್ ಇತ್ತಿನ ಕಡಬ ತಾಲೂಕ್ದ ಕುಂತೂರ್ದ ಜವನ್ದಿ ಒರ್ತಿ ಇನಿ, ಜುಲೈ 28ದ ಕಾಂಡೆ ತೀರ್ದೆರ್.
ಕುಂತೂರು ಗ್ರಾಮೊದ ಇಡಾಳ ನಿವಾಸಿ ಕರಿಯಪ್ಪ ಯಾನೆ ಕೇಶವ ಗೌಡ ಪನ್ಪಿನಾರೆನ ಮಗಲ್ ಶ್ವೇತಾ(23ವ.) ತೀರ್ದಿನ ಪೊಣ್ಣು. ಡಿಗ್ರಿ ಆದಿತ್ತಿನ ಶ್ವೇತಾ ಕರಿನ ರಡ್ಡ್ ವರ್ಸೊರ್ದಿಂಚಿ ಉಸಾರ್ದಾಂತೆ ಇತ್ತೆರ್. ಸುರುಟು ಜ್ವರ ಸುರು ಆದ್ ಪುತ್ತೂರ್ದ ಪ್ರೈವೇಟ್ ಆಸ್ಪತ್ರೆಡ್ ಅಡ್ಮಿಟ್ ಆದ್ ಮರ್ದ್ ಮಲ್ತಿತ್ತೆರ್. ಬೊಕ್ಕ ಕುಡ್ಲದ ಬೇತೆ ಬೇತೆ ಪ್ರೈವೇಟ್ ಆಸ್ಪತ್ರೆಲೆಡ್ ಮರ್ದ್ ಮಲ್ತ್ಂಡಲಾ ಕಿಡ್ನಿ ಸಂಬಂಧಿತಿನ ಸೀಕ್ ಗುಣ ಆದಿಜ್ಜಂಡ್. ಜು.28 ದಾನಿ ಕಾಂಡೆ ಆರೆಗ್ಗೆ ದಮ್ಮು ದೆಪ್ಪೆರೆ ಬಂಙ ಆವೊಂದಿತ್ತ್ದ್ ಇಲ್ಲದಕುಲು ಆಲಂಗಾರ್ದ ಪ್ರೈವೇಟ್ ಕ್ಲಿನಿಕ್ಗ್ ಲೆತೊಂದು ಬತ್ತಿತ್ತೆರ್. ಅಪಗ ಆರ್ ಅಲ್ಪನೇ ಕುಸ್ಕುದ್ ಬೂರ್ದೆರ್, ಅಂಚಾದ್ ಮರ್ದ್ ಪುತ್ತೂರ್ದ ಆಸ್ಪತ್ರೆಗ್ ಲೆತೊಂದು ಪೋಂಡಲಾ ಆ ಪೊರ್ತುಗಾನಗ ಜೂವ ಪೋದಿತ್ತ್ಂಡ್.