Last updated on July 31st, 2025 at 08:31 am
ಸಿಡ್ನಿ, ಜುಲೈ 31: 16 ವರ್ಸೊರ್ದು ತಿರ್ತ್ದ ಜೋಕುಲೆಗ್ ಸಾಮಾಜಿಕ ವಿಡಿಯೋ ಬಲೆತ್ತಾನ ಯುಟ್ಯೂಬ್ ನ್ ಬ್ಯಾನ್ ಮಲ್ತ್ದ್ ಆಸ್ಟ್ರೇಲಿಯಾ ಆದೇಶ ಮಲ್ತ್ದ್ಂಡ್. ಈ ಮುಕೇನ ಜವನಟಿಗೆದ ಜೋಕುಲೆಗ್ ಸಾಮಾಜಿಕ ಬಲೆತ್ತಾನ ಯೂಟ್ಯೂಬ್ನ್ ಬ್ಯಾನ್ ಮಲ್ದಿನ ವಿಶ್ವೊದ ಕಡೀರ್ದ ದೇಶ ಆತ್ಂಡ್.
10 ರ್ದ್ 15 ವರ್ಸ ಪ್ರಾಯೊದ ಜೋಕುಲೆಡ್ ಶೇ. 37 ದಾತ್ ಜೋಕುಲು, ಬೇತೆ ಒವ್ವೇ ಸಾಮಾಜಿಕ ಮಾಧ್ಯಮ ತಾನೊರ್ದು ಎಚ್ಚಾದ್, YouTube ಡೆ ಪಡಾಯಿದ ವಿಷಯೊಲೆನ್ ತೂವೊಂದುಲ್ಲೆರ್ ಪನ್ದ್ ವರದಿ ಬೈದಿನೆತ ಬೆರಿಟ್, ಆಸ್ಟ್ರೇಲಿಯಾದ ಇಂಟರ್ನೆಟ್ ಕಾಪು ಸಂಸ್ಥೆ ಕರಿನ ತಿಂಗೊಲು ಸರ್ಕಾರೊಗು YouTube ಗ್ ಇಪ್ಪುಗ ಬುಡ್ಕೆನ್ ರದ್ದ್ ಮಲ್ಪೆರ ಒತ್ತಾಯ ಮಲ್ತ್ದ್ಂಡ್.
ಆಸ್ಟ್ರೇಲಿಯಾಡ್ ದುಂಬೇ ಬ್ಯಾನ್ ಆದುಪ್ಪುನ ಮೆಟಾದ ಫೇಸ್ಬುಕ್ ಬೊಕ್ಕ ಇನ್ಸ್ಟಾಗ್ರಾಮ್, ಸ್ನ್ಯಾಪ್ಚಾಟ್ ಅಂಚೆನೇ ಟಿಕ್ಟಾಕ್ದಂಚಿನ ಬೇತೆ ಸಾಮಾಜಿಕ ಮಾಧ್ಯಮ ಕಂಪನಿಲು ಯೂಟ್ಯೂಬ್ಗ್ ಬುಡ್ಕೆ ಕೊರ್ತಿನವು ಎಂಕ್ಲೆಗ್ ಅನ್ಯಾಯ ಆಪುಂಡು ಪನ್ದ್ ವಾದ ಮಂಡನೆ ಮಲ್ತಿತ್ತ. ಅಂಚಾದ್ ಇತ್ತೆ ಆಸ್ಟ್ರೇಲಿಯಾ ಯುಟ್ಯೂಬ್ ನ್ಲಾ ಬ್ಯಾನ್ ಮಲ್ದ್ಂಡ್. ಈ ಮುಕೇನ 16 ವರ್ಸೊರ್ದು ತಿರ್ತ್ದ ಜೋಕುಲು ಒವ್ವೇ ರೀತಿದ ಯುಟ್ಯೂಬ್ ಚಾನೆಲ್ ಅತ್ತ್ಂಡ ಅಕೌಂಟ್ ದೀವೊನುನೆನ್ ಬ್ಯಾನ್ ಮಲ್ದ್ಂಡ್. ಆಸ್ಟ್ರೇಲಿಯಾಡ್ ಫೇಸ್ ಬುಕ್, ಇನ್ಸ್ಟಾಗ್ರಾಂ ಸೇರ್ದ್ ಬೇತೆ ಸಾಮಾಜಿಕ ಬಲೆತ್ತಾನೊಲೆಗ್ ದುಂಬುರ್ದೇ ಈ ಬ್ಯಾನ್ ಉಂಡು.