Last updated on August 1st, 2025 at 05:24 pm
ತೊರ್ತಲ್, ಆ. 1 : ಬೈಕಂಪಾಡಿ ಕೈಗಾರಿಕಾ ಪ್ರದೇಶೊದ ಮೀನ್ ಸಂಸ್ಕರಣಾ ಘಟಕೊಡು ಅಮೋನಿಯಾ ಗ್ಯಾಸ್ ತೋರ್ದ್ ನಾಲ್ವೆರ್ ಕಾರ್ಮಿಕೆರ್ ಉಸಾರ್ ತತ್ತ್ದ್ ಗಾತಿದ ಸ್ಥಿತಿಟ್ ಮುಕ್ಕದ ಪ್ರೈವೇಟ್ ಆಸ್ಪತ್ರೆಗ್ ದಾಕಲಾತೆರ್. ಸುಮಾರ್ 25 ಜನ ಉಸಾರ್ ತತ್ತ್ದ್ ಇತ್ತ್ದ್, ಅಕಲೆನ್ ಆಸ್ಪತ್ರೆಗ್ ದಾಕಲ್ತ್ದ್ ಮರ್ದ್ ಮಲ್ತೊಂದುಲ್ಲೆರ್. ಉಂದೆಟ್ ಬಡಕಾಯಿ ಭಾರತ ಮೂಲೊದ ನಾಲ್ವೆರ್ ಕಾರ್ಮಿಕೆರೆನ ಸ್ಥಿತಿ ಬಾರೀ ಗಾತಿಡ್ ಇತ್ತ್ದ್, ಅಕಲೆನ್ ಐಸಿಯು ಡ್ ದೀದ್ ಮರ್ದ್ ಮಲ್ತೊಂದುಲ್ಲೆರ್.
ಈ ಕಂಪೆನಿಡ್ 200ರ್ದ್ಲಾ ಎಚ್ಚ ಕಾರ್ಮಿಕೆರ್ ಇತ್ತ್ದ್, ಶಿಫ್ಟ್ಡ್ ಬೇಲೆ ಆಪೆದ್ಂಡ್. ಗುರುವಾರ ಬಯ್ಯ 4.30ತ ಅಂದಾಜಿಗ್ ಪ್ಲಾಂಟ್ದ ಉಲಯಿದ ಅಮೋನಿಯಾ ಪೈಪ್ ಒಂಜಿ ತೋರೆರೆ ಪತ್ತ್ದ್ಂಡ್. ಘಟಕೊದ ಮುಟ್ಟಡ್ ಬೇಲೆ ಮಲ್ತೊಂದಿತ್ತಿನ ಕಾರ್ಮಿಕೆರೆಗ್ ಈ ಲೀಕ್ರ್ದಾವರ ದಮ್ಮುಕಟ್ಟಿಲೆಕ ಆದ್ ಬೊಬ್ಬೆ ಪಾಡ್ದೆರ್. ಅಪಗನೇ ಸೈರನ್ ಬುಲಿಪಾದ್ ಕಾರ್ಮಿಕೆರೆನೊ ಪಿದಯಿ ಲೆತೊಂದು ಬತ್ತ್ದ್ ಕಾಪುದ ಜಾಗೆಗ್ ಲೆತೊಂದು ಪೋತೆರ್.
ಉಸಾರ್ ತತ್ತಿನಕಲೆನ್ ಕಂಪೆನಿದ ಮ್ಯಾನೇಜ್ಮೆಂಟ್ ತಾಪುರ್ತೋಪು ಮರ್ದ್ಗ್ ಆಸ್ಪತ್ರೆಗ್ ದೋಕಲ್ಪೆರ ಕ್ರಮ ಗೆತೊಂದುಂಡು. ತೋರೊಂದುಪ್ಪುನ ಅಮೋನಿಯಾನ್ ಅಂಕೆಗ್ ಕನಯೆರೆ ಎಂಸಿಎಫ್ದ ಒಟ್ಟುಗು ಅಗ್ನಿಶಾಮಕ ದಳ ಬತ್ತ್ದ್ ಕಾರ್ಯಾಚರಣೆ ಮಲ್ದ್ಂಡ್. ಒಲವು ತಿಕ್ಕಿನೆಟ್ಟಿಗೆ ಕುಡ್ಲ ತಹಶೀಲ್ದಾರ್, ಉಪತಹಶೀಲ್ದಾರ್, ಕಂದಾಯ ಅಧಿಕಾರಿಲು ಬತ್ತ್ದ್ ತುರ್ತು ಪತ್ತ ಒಲವು ಗೆತೊಂಡೆರ್. ಪಣಂಬೂರು ಪೊಲೀಸ್ ಸ್ಟೇಶನ್ದ ಅಧಿಕಾರಿಲು ಬತ್ತ್ದ್ ಕಾನೂನು ಕ್ರಮ ಗೆತೊಂದೆರ್.