Last updated on August 11th, 2025 at 01:33 pm
ಹುಬ್ಬಳ್ಳಿ, ಆ. 11: ಧರ್ಮಸ್ಥಳಡ್ ಪುನ ಕೌಂತ್ದಿನ ಪ್ರಕರಣೊದ ಜಡ್ತೆ ಮಲ್ತೊಂದುಪ್ಪುನ ಎಸ್ಐಟಿ ಜಡ್ತೆದ ಮಧ್ಯಂತರ ವರದಿನ್ ಎಸ್ಐಟಿ ಪ್ರಕಟ ಮಲ್ಪೋಡು ಪನ್ದ್ ಜೈನ ಸಮಾಜೊದ ಮುಖಂಡೆರ್ ಆಗ್ರಹ ಮಲ್ತ್ದೆರ್.
ಹುಬ್ಬಳ್ಳಿದ ವರೂರುದ ನವಗ್ರಹತೀರ್ಥ ಕ್ಷೇತ್ರೊಡು ಗುಣಧರನಂದಿ ಮಹಾರಾಜೆರೆ ಮುತಾಲಿಕೆಡ್ ಐತಾರ ನಡತಿನ ಜೈನ ಸಮಾಜೊದ ಮುಖಂಡೆರ್, ಜೈನ ಮುನಿಕ್ಲೆನ ಸಭೆಟ್ ಈ ನಿರ್ಣಯ ಮಲ್ತ್ದೆರ್, ಈ ಬಗೆಟ್ ಮುಖ್ಯಮಂತ್ರಿ ಸಿದ್ದರಾಮಯ್ಯೆ, ಗೃಹ ಸಚಿವ ಜಿ.ಪರಮೇಶ್ವರೆರೆನ್ ಭೇಟಿ ಆದ್ ಮನವಿ ಕೊರ್ಪುನ ಪನ್ದ್ ನಿರ್ಣಯ ಮಲ್ತ್ದೆರ್. ಪ್ರಕರಣೊದ ಸಾಕ್ಷಿ ದೂರುದಾರೆ ಪನ್ತೀನ ಎಚ್ಚಿನ ಜಾಗೆಲೆಡ್ ನಾಡುನ ಬೇಲೆ ಆತ್ಂಡ್. ಆಯನ ಮಂಪರು ಪರೀಕ್ಷೆ ಮಲ್ಪೊಡು. ಉಂದು ಇಂಚೆನೇ ದುಂಬರಿಂಡ ಮಂಜುನಾಥಸ್ವಾಮಿನ ದೇಲಂತಡೆನ್ ಪುಡಪುನ ಪಡಾಯಿ ಉಂಡು ಪನ್ದ್ ಮುಖಂಡೆರ್ ಇನಯೊಡು ಪನ್ಡೆರ್.
ಧರ್ಮಸ್ಥಳ ಕ್ಷೇತ್ರೊದ ಬಗೆಟ್ ಅಪಪ್ರಚಾರ ಮಲ್ದಿನ ಗಿರೀಶ ಮಟ್ಟೆಣ್ಣವರ ಇತ್ತೆನೇ ಮಾಪು ಪಟ್ಟೊಡು. ಆಯನ ಮಿತ್ತ್ ಮಾತಾ ತಾಲ್ಲೂಕ್ ಕೇಂದ್ರೊಲೆಡ್ ಜೈನ ಸಮಾಜೊದ ಕಡೆರ್ದ್ ಪ್ರಕರಣ ದಾಕಲ್ಪೆರ ಉಂಡು. ಇತ್ತೆನೇ ಆಯನ್ ಪೊಲೀಸೆರ್ ಕೈದ್ ಮಲ್ಪೊಡು ಪನ್ದ್ ಆಗ್ರಹ ಮಲ್ದೆರ್. ಧಾರವಾಡ ಕಲಾಮಂದಿರೊರ್ದು ಜಿಲ್ಲಾಧಿಕಾರಿ ಕಚೇರಿ ಮುಟ್ಟ ಸೋಮವಾರ ಮೌನ ಪ್ರತಿಭಟನಾ ಮೆರವಣಿಗೆ ಮಲ್ತ್ಡ್, ಕಾಯೆಸ್ಲೆನ ಈಡೆತ್ತಾಯೆರ ಆಗ್ರಹ ಮಲ್ಪುನು. ಆಯಿಜಿಂಡ ಸೆಪ್ಟೆಂಬರ್ 1ತಾನಿ ಧಾರವಾಡ ರಾಷ್ಟ್ರೀಯ ಪೆರ್ಸಾದಿ ಬ್ಲಾಕ್ ಮಲ್ತ್ದ್ ಪೊರ್ಮ್ಬಾಟ ಮಲ್ಪುವ ಪನ್ದ್ ಎಚ್ಚರ್ಗೆ ಕೊರ್ತೆರ್.