Last updated on August 18th, 2025 at 12:48 pm
ಬಂಟ್ವಾಳ, ಆ.18 : ಕಾರ್ ಗೆತೊನರೆ ಕನತಿನ ಎನ್ನ ಕಾಸ್ ಕನ್ಡ್ದ್ ಪೋತುಂಡು ಪನ್ದ್ ಆಂಜೊವು ಒರಿ ರಡ್ಡ್ ದಿನ ಕರಿದ್ ಬಂಟ್ವಾಳ ನಗರ ಸ್ಟೇಷನ್ಡ್ ಒಯಿಲ್ ಬರೆಪಾದಿತನ ನಡಕೆ ಐತಾರ ನಡತ್ದ್ಂಡ್.
ಕುಂದಾಪುರ ನಿವಾಸಿ ರಂಗನಾಥೆ ಪನ್ಪಿನಾರ್ ತನ್ನ ಕಿಸೆರ್ದ್ 50 ಸಾರ ರೂಪಾಯಿದ ರಡ್ಡ್ ಕಟ್ಟ ಕನ್ಡ್ದ್ ಪೋತುಂಡು ಪನ್ದ್ ಒಯಿಲ್ ಬರೆಪಾದೆರ್.
ಆರೆಡ ಇತ್ತಿನ ಒಂಜಿ ಕಾರ್ನ್ ಮಾರ್ದ್ ಬತ್ತಿನ 1,60,000 ಕಾಸ್ನ್ ರೂ. 50 ಸಾರದ ಲೆಕ ಮೂಜಿ ಕಟ್ಟ ಮಲ್ತ್ದ್ ಬೊಕ್ಕ ರೂ.10 ಸಾರದ ಕುಡೊಂಜಿ ಕಟ್ಟ ಮಲ್ತ್ದ್ ಕಿಸೆಟ್ ದೀವೊಂದು ಬಿಸಿರೋಡ್ದ ಕೈಕಂಬದ ಶಾಂತಿ ಅಂಗಡಿಗ್ ಕಾರ್ ಗೆತೊನರೆ ಬತ್ತಿತ್ತೆರ್.
ಗೆತೊನೊಡಿತ್ತಿನ ಕಾರ್ದ ರೆಕಾರ್ಡ್ಲು ಸಮದಾಂತಿನೆರ್ದಾವರ ಆರ್ ಕೈಕಂಬದ ದೋಸ್ತಿನ ಇಲ್ಲಡ್ ಉಂತುದು ಆಗಸ್ಟ್ 15 ತ ಕಾಂಡೆ ಕೊಟ್ಟಿಗೆಹಾರಗ್ ಪೋಯೆರ ಬಿ.ಸಿ.ರೋಡ್ದ ಬಸ್ ಉಂತಡೆಡ್ ಬಸ್ಗ್ ಕಾತೊಂದಿತ್ತ್ದ್, ಬಸ್ ಬತ್ತಿ ಬೊಕ್ಕ ಬಸ್ ಬರ್ತ್ದ್ ಕಿಸೆಕ್ ಕೈ ಪಾಡ್ದ್ ತೂನಗ ರೂ. 50 ಸಾರದ ಮೂಜಿ ಕಟ್ಟಲೆಡ್ ರಡ್ಡ್ ಕಟ್ಟಲು ಪನ್ಡ ರೂ.ಒಂಜಿ ಲಕ್ಷ ಕಾಸ್ ಕನ್ಡ್ದ್ ಪೋತಿನ ಗೊತ್ತಾತ್ಂಡ ಪನ್ದ್ ತೆರಿಪಾದೆರ್.
ಈ ಬಗೆಟ್ ಬಂಟ್ವಾಳ ನಗರ ಪೋಲೀಸ್ ಸ್ಟೇಷನ್ಡ್ ಆರ್ ಒಯಿಲ್ ಬರೆಪಾದಿತ್ತ್ದ್, ಪೋಲೀಸೆರ್ ಅಲ್ಪದ ಸಿ.ಸಿ.ಕ್ಯಾಮರಾಲೆನ್ ಪರಿಶೀಲನೆ ಮಲ್ತೊಂದುಲ್ಲೆರ್.