Last updated on August 18th, 2025 at 03:11 pm
ಪುತ್ತೂರು, ಆ. 18: ಕುಂಬ್ರ ಮರ್ಕಝುಲ್ ಹುದಾ ಮಹಿಳಾ ಕಾಲೇಜ್ಡ್ ಓದೊಂದಿತ್ತಿನ ಸಜ್ಲ ಇಸ್ಮಾಯಿಲ್ ಮೇರ್ ಕುರಾನ್ದ 30 ಕಾಂಡೊಲೆನ್ ಕೈಟೇ ಬರೆದ್ ಸಾದಗೊ ಬೆನ್ತೆರ್.
ಪುತ್ತೂರು ತಾಲೂಕ್ದ ಬೈತಡ್ಕದ ಇಸ್ಮಾಯಿಲ್ ಹಾಜಿ ಬೊಕ್ಕ ಝಕ್ರಾ ಜಾಸ್ಮಿನ್ ದಂಪತಿಲೆನ ಮಗಲ್ ಸಜ್ಲ ಈ ಸಾದಗೊ ಬೆನ್ತಿನಾರ್. ಕುರಾನ್ ಬರೆಯೆರ 2021ತ ಜನವರಿಡ್ ಸುರು ಮಲ್ತಿತ್ತಿನ ಮೇರ್ 2025ತ ಆಗಸ್ಟ್ ಡ್ ಪೂರ್ಣ ಮಲ್ತ್ದೆರ್.
ಸಜ್ಲ ಮೇರ್ ಕುಂಬ್ರ ಮರ್ಕಝುಲ್ ಹುದಾ ಮಹಿಳಾ ಕಾಲೇಜಡ್ ಬಿಕಾಂ ಪದವಿ ಓದೊಂದಿತ್ತೆರ್. ಇತ್ತೆ ಆರ್ ಆ ಕಾಲೇಜ್ದ ಪರ ವಿದ್ಯಾರ್ಥಿ ಆದುಲ್ಲೆರ್.
ಒಟ್ಟು 604 ಪುಟೊತ ಈ ಕೃತಿಕ್ ಬೊಲ್ದು, ತೆಲಿನೀಲಿ, ತೆಲಿಪಚ್ಚೆ ರಂಗ್ದ ಕಾಕಜಿ ಗಲಸ್ದೆರ್. ಚೆನ್ನೆ ಬೊಕ್ಕ ಬಂಗಾರ್ ರಂಗ್ದ ಪೊದಿಕೆ ಪಾಡ್ದೆರ್. ಈ ಕೃತಿ ಸುಮಾರ್ 14 ಕೆ.ಜಿ. ತೂಕ ಉಂಡು.
“ಒಂಜಿ ಪುಟ ಬರೆಯೆರೆ ಎಂಕ್ ಸುಮಾರ್ ನಾಲ್ ಗಂಟೆ ಬೋಡಾಪೆದ್ಂಡ್. ಕೆಲ ದಿನೊಟು 8 ಗಂಟೆ ಕುಲ್ಲುದು 2 ಪುಟ ಬರೆಯೆರಾಪೆದ್ಂಡ್. ಒಟ್ಟಾರೆ ಪತ್ತ ಕುರಾನ್ನ್ ಒಟ್ಟು 303 ದಿನೊಟು ಬರೆದ್ ಮುಗಿತ್ದೆ. ಕುರಾನ್ನ್ ಬರೆದ್ ಮುಗಿಪೆರೆ 2,416 ಗಂಟೆ ಬೋಡಾತ್ಂಡ್” ಪನ್ದ್ ಸಜ್ಲ ತೆರಿಪಾದೆರ್.
ಈ ಕೃತಿನ್ ಶನಿವಾರ ಕುಂಬ್ರದ ಮರ್ಕಝುಲ್ ಹುದಾ ಮಹಿಳಾ ಕಾಲೇಜ್ಡ್ ಕೇರಳದ ಮರ್ಕಝ್ ನಾಲೇಜ್ ಸಿಟಿತ ಮುರ್ರಿಸ್ ಯಾಸೀನ್ ಸಖಾಫಿ ಅಲ್ ಅಝ್ಹರಿ ಮೇರ್ ಲೋಕಾರ್ಪಣೆ ಮಲ್ತ್ದೆರ್.