Last updated on August 27th, 2025 at 08:59 am
ವಜ್ರದಾರಗೆ..✍️
ಆಟಿ ಆನೆದ ಮಿತ್ತ್ ಕುಲ್ಲೊಂದು ಆಡೊಂದು ಪೋಯಿಲೆಕ್ಕಾಂಡ್… ಸೋನ ಕುದುರೆದ ಮಿತ್ತ್ ಕುಲ್ಲೊಂದು ಪಾರೊಂದು ಬತ್ತಿಲೆಕ್ಕಾಂಡ್... ಆಟಿದ ಬಂಙೊದ ಬದ್ಕ್ ಸಿರ್ಕ್ ಸಂಕಟ ಮದೆಯಾಯಿನೇ ಆಟಿಡ್ ಪಾಡಿ ಸಾನ ಗುಂಡದ ಬಾಕಿಲ್ಲೆನ್ ಸೋನೊಡು ದೆಪ್ಪುನಗ ತುಲುನಾಡ ಮಟ್ಟೆಲ್ಡ್ ಪರ್ಬ ಪಾಡ್ಯ ಅಂಕ ಆಯನೊದ ಅಟ್ಟನೆದ ಅಜನೆ ಪಜ್ಜ ದೀಯರೆ ಸುರು ಮಲ್ಪುಂಡು. ಸೋನದ ಬೊಲ್ಯ ಬೊಲಿಕ್ಕಿರಿ ನಾಡೊರ್ಮೆ ಪಸೆರೊಂದು ಬನ್ನಗ, ಪಚ್ಚೆ ನೇಜಿಡ್ ಕುರಲ್ ಕಂಡೊರ್ಮೆ ತರೆ ದೆರ್ತ್ ನಲಿಪುನಗ, ಅಟ್ಟೆಮಿದ ಗೌಜಿ ಬೆರಿ ಪಾರ್ದ್ ಪೋನಗ ಚೌತಿದ ಗಮ್ಮತ್ತ್ ತರೆ ಪಾರ್ದ್ ಬತ್ತ್ಂಡ್.
ಆನಿದ ಕಾಲೊಡು ಚೌತಿದ ಗಮ್ಮತ್ತ್ ಎಂಚ ಕೇಂಡ, ಚೌತಿರ್ದ್ ನಾಲ್ ದಿನೊರ್ದು ದುಂಬು ಮಂಜಲ್ ಬಿರಾದ್ ನಾಲ್ ಬಗೆತ ಧಾನ್ಯೊಲೆಗ್ ಮಣ್ಣ ಬಿಸಲೆ ಕಂಕನೆ ಪಾರ್ದ್ ದೀಂಡ ಅವೆನ್ ಚೌತಿದಾನಿ ದೆಪ್ಪುನುಗೆ. ಅಟ್ಟೆಮಿಗ್ ಸೇಮದಡ್ಯೆ ಮೂಡೆ ಮಲ್ತ್ಂಡ ಚೌತಿಗ್ ಉರ್ದುದ ತೆಲ್ಲವುಗೆ.. ಕರ್ಮ್ಬುನು ಅಡ್ಡ ತೌರುದು ನೀಟಪ್ಪ ತಿಗ್ತ್ದ್ ಅಟ್ಟಲಿಗೆ ಕಟ್ಟಿನೆ ಅಯಿತ ಮಿತ್ತ್ ಉರ್ದುದ ತೆಲ್ಲವು ದೀಪುನುಗೆ, ಪೊರಿ ಬಜಿಲ್ ಬಲಸುನುಗೆ, ಬಿಸಲೆದ ಅಡಿಟ್ ಇತ್ತಿನ ಪೂ ಬಿತ್ತ್ನ್ ದೀಪುನುಗೆ, ತುಡರ್ ಅರ್ಲಾದ್ ಸ್ವಾಮಿ ಪಂದ್ ಅಡ್ಡ ಬೂರುನುಗೆ.
ಆನಿಯೆ ಎಚ್ಚಿನ ತುಲುವೆರೆ ಇಲ್ಲಡ್ ಇಲ್ಲ್ ದಿಂಜಾವುನ ಕುರಲ್ ಕಟ್ಟುನ ಪರ್ಬಲ ನಡಪುಂಡುಗೆ. ಕಂಡೊರ್ದು ಇಲ್ಲ ಯಜಮಾನೆ ತರೆಟ್ಟ್ ಕುರಲ್ ತುಂಬೊಂದು ಬರ್ಪುನ ಕ್ರಮಗೆ, ಅಯಿತ ಒಟ್ಟಿಗೆ ಆನಿ ಕಜಿಪುಗು ಗಲಸುನ ಕಾಯಿಲೆನ್ಲ ದೀಯರೆ ಉಂಡುಗೆ. ತರೆಟ್ಟ್ ತುಂಬೊಂದು ಬತ್ತಿನ ಕುರಲ್ನ್ ಚಾವಡಿಡ್ ದೈವದ ಉಜ್ಜಾಲ್ದ ಎದುರು ದೀದ್ ಸರನಾದ್, ಸುರುಕು ಉಜ್ಜಾಲ್ಗ್ ಕುರಲ್ ಕಟ್ಟಿನೆ ಬೊಕ್ಕ ಅರಿತ ಕರಕ್ ಕಟ್ಟುನ ಕ್ರಮೊಗೆ. ಅವೆರ್ದ್ ಬೊಕ್ಕ ಕೆಲ ಸೊತ್ತುಲೆಗ್ ಕಟ್ಟಿನೇ ಕುರಲ್ದ ಬಾರ್ಡ್ ಅರಿನ್ ಪೆಜಿದ್ ನುಪ್ಪುಗು ಅತ್ತ್ಂಡ ಸಲಯಿದ ಪಾಯಿಸೊಗು ಪಾಡುವೆರ್ಗೆ.
ಉಂದೆನ್ ಇಲ್ಲ ದಿಂಜಾವುನ ಕ್ರಮ ಪಂದ್ಲ ಪನ್ಪೆರ್. ಕುರಲ್ ಕಟ್ಟಿನ ದಿನೊಟು ಪಿದಯಿ ಒವ್ವೇ ಧಾನ್ಯೊದ ಸೊತ್ತುಲ ಕೊರಿಯರೆ ಬಲ್ಲಿ ಅಂಚೆನೆ ಏರೆಗ್ಲ ಪನವು ಕೊರಿಯರೆ ಬಲ್ಲಿ ಪನ್ಪುನ ನಂಬೊಲಿಗೆಲ ಉಂಡುಗೆ. ಪದಿನಾಜಿ ಬಗೆತ ಕಾಯಿ ಕಜಿಪು ಆಯಿನೆ ಕಜಿಪುದ ಮಾತ ಬಿಸಲೆಲೆನ್ ಚಾವಡಿಡ್ ಕನತ್ ದೀವೊಡುಗೆ. ಒವ್ವೆ ಬಾಜನೊಗು ತೋಡುದು ಬಲಸುಲೆಕ ಇಜ್ಜಿಗೆ. ಇಲ್ಲದ ಮಾತ ಮಂದೆಲ ಒಂಜೆ ಚಾವಡಿಡ್ ಕುಲ್ಲಿನೆ ಬಾರೆದ ಇರೆಟ್ ಒರ್ಮೆಲ ಕಜಿಪು ನುಪ್ಪು ಬಲಸಿನೆ. ಮಾತೆರ್ಲ ಒಂಜಿ ಪುಂಡಿ ನುಪ್ಪುನು ದೆತ್ತ್ ಪತ್ತೊಡುಗೆ.. ಬಲಸಿನ ಯಜಮಾನ್ದಿಲ ಕೈಟ್ ನುಪ್ಪು ಪತ್ತೊಡುಗೆ. ಇಲ್ಲ ಯಜಮಾನೆ ದೈವ ದೇವೆರೆನ್ ಸುಗಿತೊಂದು ಪೊಸ ಅರಿ ಉನ್ಪ ಪಂದ್ ಮೂಜಿ ಸರ್ತಿ ಪಂಡಿನೇ ಮಾತೆರ್ಲ ಒಟ್ಟಿಗೆ ನುಪ್ಪುನು ಬಾಯಿಗ್ ದೀವೊಡುಗೆ. ಉಂದೆಕ್ಕ್ ಪೊಸ ಅರಿ ಉನ್ಪುನು, ಪುದ್ದರ್ ಉನ್ಪುನು ಪಂದ್ ಪನ್ಪೆರ್.
ಇಂಚ ಬಾಮಕುಮಾರ ದೇಬೆರೆನ್ ತುಲುವೆರ್ ಸಾಗೊಲಿ ಬದ್ಕ್ದ ಮೂಲ ದೇಬೆರಾದ್ ಚೌತಿ ಪರ್ಬೊಡು ಕರ್ಮ್ಬುದ ಅಟ್ಟೊಲಿಗೆದ ಮಿತ್ತ್ ನಂಬೊಲಿಗೆ ದೀದ್ ನಂಬೊಂದು ಬತ್ತೆರ್..