Last updated on September 3rd, 2025 at 02:12 pm
ಕೊಲ್ಲೂರು, ಸೆ. 03: 17 ವರ್ಸೊದ ಅಪ್ರಾಪ್ತೆ ಆಣನೊಟ್ಟುಗು 2 ಜೋಕುಲೆನ ಅಪ್ಪೆ ಬಲ್ತಿನ ನಡಕೆ ಕೇರಳದ ಪಲ್ಲಿಪುರಂ ಪನ್ಪಿನಲ್ಪ ನಡತ್ದ್ಂಡ್. ಪಲ್ಲಿಪುರಂ ಮೂಲೊದ ಸನುಷಾ ನ್ ಕೊಲ್ಲೂರುಡು ಚೇರ್ತಲ ಪೊಲೀಸೆರ್ ಕೈದ್ ಮಲ್ತ್ದೆರ್. ಪೊಂಜೊವುನ ಮಿತ್ತ್ ಪೋಕ್ಸೋ ಕಾಯ್ದೆದಡಿಟ್ ಪ್ರಕರಣ ದಾಕಲ್ತ್ದೆರ್.
ರಡ್ಡ್ ಜೋಕುಲೆನ ಅಪ್ಪೆ ಆದುಪ್ಪುನ ಸನುಷಾ 17 ವರ್ಸ ಪ್ರಾಯೊದ ವಿಧ್ಯಾರ್ಥಿನ ಒಟ್ಟುಗು 12 ದಿನೊಕು ದುಂಬು ನಾಪತ್ತೆ ಆದಿತ್ತಲ್. ಆಣ್ ನಾಪತ್ತೆ ಆತಿನ ಬಗೆಟ್ ಆಯನ ಇಲ್ಲದಕುಲು ಪೊಲೀಸ್ ಸ್ಟೇಶನ್ಡ್ ಒಯಿಲ್ ಬರೆಪಾದಿತ್ತೆರ್. ಇಂಚಿಡ್ ಪೊಂಜೊವುನ ಇಲ್ಲದಕುಲ್ಲಾ ಆಲ್ ನಾಪತ್ತೆ ಆತಿನ ಬಗೆಟ್ ಒಯಿಲ್ ಬರೆಪಾದಿತ್ತೆರ್. ಬಲ್ತ್ ಪೋತಿನ ಇರ್ವೆರ್ಲಾ ತನ್ಕುಲೆನ ಫೋನ್ಲೆನ್ ಸ್ವಿಚ್ ಆಫ್ ಮಲ್ತ್ ದೀದಿತ್ತೇರ್. ಪೊಲೀಸೆರ್ ಸೂರುಕು ಬೆಂಗಳೂರ್ಡ್ ನಾಡ್ದೆರ್. ಈ ನಡುಟು ಪೊಂಜೊವು ತನ್ನ ಫೋನ್ನ್ ಆನ್ ಮಲ್ತ್ದ್ ತನ್ನ ಗುರ್ತೊದಕ್ಲೆಗ್ ವಾಟ್ಸಾಪ್ ಮೆಸೇಜ್ ಮಲ್ಪುನಗ ತಿಕ್ಕ್ದ್ ಬೂರ್ದಲ್.
ಉಂದು ತೆರಿದ್, ಚೆರ್ತಲ ಪೊಲೀಸೆರ್ ಕೊಲ್ಲೂರುಗ್ ಪೋದು ಆಲೆನ್ ಪತ್ತ್ದೆರ್. ಅಕುಲೆನ್ ಇರ್ವೆರೆನ್ಲಾ ಜೋಕುಲೆನೊಟ್ಟುಗು ಇಲ್ಲಗ್ ಲೆತೊಂದು ಬತ್ತಿನ ಪೊಲೀಸೆರ್, ವಿದ್ಯಾರ್ಥಿನ್ ಆಯನ ಅಪ್ಪೆಅಮ್ಮನಡೆ ಕಡಪುಡ್ದೆರ್. ಪೊಂಜೊವುನ ಜೋಕುಲೆನ್ ಪೊಂಜೊವುನ ಕಂಡನ್ಯಗ್ ಒಪ್ಯಾದೆರ್. ಪೊಂಜೊವು ಪೊಲೀಸೆರೆಗ್ ಯಾನ್ ಆಯನ ಒಟ್ಟುಗು ಇಪ್ಪೆರ ಬಯಕಿನೆರ್ದಾವರ ಬಲ್ತ್ ಪೋದಿತ್ತೆ ಪನ್ದ್ ತೆರಿಪಾದಲ್. ಆರೋಪಿ ಪೊಂಜೊವುನ ಮಿತ್ತ್ ಪೋಕ್ಸೋ ಪ್ರಕರಣ ದಾಕಲಾದಿತ್ತ್ದ್, ನ್ಯಾಯಾಂಗ ಕೈದ್ಗ್ ಒಪ್ಯಾದೆರ್. ಕುಟುಂಬ ಕಾರ್ಯಕ್ರಮ ಒಂಜೆಟ್ ಪೊಂಜೊವು ಬೊಕ್ಕ ಈ 17 ವರ್ಸ ಪ್ರಾಯೊದ ಆಣಗ್ ಗುರ್ತ ಆದಿತ್ತ್ಂಡ್ ಪನ್ದ್ ಪೋಲೀಸೆರ್ ತೆರಿಪಾದೆರ್.