Last updated on September 4th, 2025 at 04:32 pm
ಕುಡ್ಲ, ಸೆ. 04 : ಕುಡ್ಲದ ವೆನ್ಲಾಕ್ ಆಸ್ಪತ್ರೆನ್ ಪ್ರಾದೇಶಿಕ ಆಸ್ಪತ್ರೆ ಆದ್ ಅಪ್ಗ್ರೇಡ್ ಮಲ್ಪೊಡು ಪನ್ಪಿನ ಪಾಕ ದಿನೊತ ಕಾಯೆಸ್ನ್ ರಾಜ್ಯ ಸರ್ಕಾರ ತಿರಸ್ಕರಿತ್ದ್ಂಡ್.
ಪ್ರತಿ ವರ್ಷ ಸುಮಾರ್ 30,000 ರೋಗಿಲು ವೆನ್ಲಾಕ್ ಆಸ್ಪತ್ರೆಡ್ ಮರ್ದ್ ಮಲ್ಪುವೆರ್. ಆಸ್ಪತ್ರೆನ್ ಮೂಲಸೌಕರ್ಯೊಲೆನ ವಿಷಯೊಡು ಇತ್ತೆನೇ ಡೆವಲಪ್ ಮಲ್ದ್ಂಡ್, ಬೊಕ್ಕ ಬರಿತ ಜಿಲ್ಲೆಲೆಗ್ ಸೇವೆ ಕೊರ್ಯೆರ ಉಂದೆನ್ ಪ್ರಾದೇಶಿಕ ಆಸ್ಪತ್ರೆ ಪನ್ದ್ ಘೋಷಣೆ ಮಲ್ಪೊಡು ಪನ್ದ್ ಪಾಕ ಸಮೆರ್ದಿಂಚಿ ಕಾಯೆಸ್ ಇತ್ತ್ಂಡ್. ಆಂಡ, ಒಂಜಿ ಜಿಲ್ಲಾ ಆಸ್ಪತ್ರೆನ್ ಪ್ರಾದೇಶಿಕ ಆಸ್ಪತ್ರೆ ಆದ್ ಪಗಪೆರ ಒವ್ವೇ ಮಾರ್ಗಸೂಚಿಲು ಇಜ್ಜ ಪನ್ದ್ ರಾಜ್ಯ ಸರ್ಕಾರ ಪ್ರಸ್ತಾವನೆನ್ ತಿರಸ್ಕರಿತ್ದ್ಂಡ್. ವೆನ್ಲಾಕ್ ಆಸ್ಪತ್ರೆಡ್ ಇತ್ತೆನೇ ಬೋಡಾಪಿನ ಸವ್ಕಾಸೊಲು ಉಲ್ಲ ಬೊಕ್ಕ ಪ್ರಾದೇಶಿಕ ಸ್ಥಾನಮಾನ ಕೊರ್ಪುನೆರ್ದ್ ಒವ್ವೇ ಎಚ್ಚಿನ ಪ್ರೇಜನ ತಿಕ್ಕುಜಿ ಪನ್ದ್ ಅವು ಸ್ಪಷ್ಟ ಮಲ್ದೊಂಡ್.
167 ವರ್ಸೊವೆನ ಪರತಿರಿ ಇಪ್ಪುನ ವೆನ್ಲಾಕ್ ಆಸ್ಪತ್ರೆ ಕಾಲಿ ಮಂಗಳೂರು ಜಿಲ್ಲೆಗೆಅ ಸೀಮಿತ ಆತಿಜಿ. ನೆರೆಕರೆತ ಎಣ್ಮ ಜಿಲ್ಲೆಲೆರ್ದ್ ಬೊಕ್ಕ ಕೇರಳದ ಕಾಸ್ರೋಡ್ರ್ದ್ ಇಡೆಗ್ ಮರ್ದ್ಗ್ ಬರ್ಪೆರ್. ಈ ಆಸ್ಪತ್ರೆ ಸರ್ಕಾರಿ ಆರೋಗ್ಯ ಕ್ಷೇತ್ರೊದ ಮಾದರಿ ಆದಿತ್ತ್ದ್, ಪ್ರೈವೇಟ್ ಆಸ್ಪತ್ರೆಲೆ ಲೆಕನೆ ಆಧುನಿಕ ಮರ್ದ್ ಬೊಕ್ಕ ಸೌಲಭ್ಯೊಲೆನ್ ಪಾಪದಕ್ಲೆಗ್ ದರ್ಮೊಗು ಕೊರೊಂದುಂಡು. ಕರ್ನಾಟಕ ಅಭಿವೃದ್ಧಿ ಕಾರ್ಯಕ್ರಮ (ಕೆಡಿಪಿ) ಸಭೆಟ್ ಈ ವಿಷಯೊದ ಬಗೆಟ್ ಚರ್ಚೆ ಮಲ್ತಿತ್ತ್ಂಡ್. ಈ ಭಾಗೊದ ಜನಪ್ರತಿನಿಧಿಲುಲಾ ಸರ್ಕಾರೊದ ಗೇನೊಗು ಕನತಿತ್ತೆರ್.
ವೆನ್ಲಾಕ್ಡ್ ಸಿಬ್ಬಂದಿ ಕುಂದೆಲ್
ಪ್ರಾದೇಶಿಕ ಸ್ಥಾನಮಾನೊದ ಕಾಯೆಸ್ದ ಒಟ್ಟುಗು, ಸಿಬ್ಬಂದಿ ಕುಂದೆಲ್ನ್ ನಿವಾರಿಪುನ ಕಾಯೆಸ್ಲಾ ಉಂಡು. 618 ಮಂಜೂರಾತಿನ ಹುದ್ದೆಲೆಡ್, ಕಾಲಿ 194 ಹುದ್ದೆಲು ಭರ್ತಿ ಆತ. ಒರಿನ 424 ಬೇಲೆಲು ಕಾಲಿ ಉಲ್ಲ. ಇತ್ತೆ, 195 ಕಾಂಟ್ರಾಕ್ಟ್ ಗ್ರೂಪ್ ಡಿ ಕಾರ್ಮಿಕೆರ್ ಬೇಲೆ ಮಲ್ತೊಂದುಲ್ಲೆರ್.
ಪ್ರಾದೇಶಿಕ ಸ್ಥಾನಮಾನೊರ್ದು ತಿಕ್ಕುನ ಪ್ರೇಜನೊಲು ದಾದ?
ಇತ್ತೆ ವೆನ್ಲಾಕ್ ನ್ ಪ್ರಾದೇಶಿಕ ಆಸ್ಪತ್ರೆ ಪನ್ದ್ ಘೋಷಣೆ ಮಲ್ತ್ಂಡ, ಅವು ಬರಿತ ಜಿಲ್ಲೆಲೆಗ್ ಕೇಂದ್ರ ಆಪುಂಡು. ಆಡಳಿತಾತ್ಮಕ ಜಬದರಿನ್ ಕೆಎಎಸ್ ಶ್ರೇಣಿದ ಅಧಿಕಾರಿಲು ತೂವೊನುವೆರ್. ತಜ್ಞ ಡಾಕ್ಟರ್ನಕುಲು, ನರ್ಸ್ನಕುಲು ಬೊಕ್ಕ ಸಿಬ್ಬಂದಿಲೆನ ನೇಮಕ ಡಬಲ್ ಆಪುಂಡು. ಹಾಸಿಗೆಲು, ಆಕ್ಸಿಜನ್ ಸಪ್ಲೈ ಬೊಕ್ಕ ಐಸಿಯುದಂಚಿನ ಸೌಲಭ್ಯೊಲು ನನ ಆತ್ ಎಚ್ಚಾಪ.