Last updated on September 5th, 2025 at 08:47 am
ಬೆದ್ರ, ಸೆ. 05: ಒಯಿಲ್ ಬರೆಪಾಯೆರ ಬತ್ತಿನ ಪೊಂಜೊವುಗು ಗಡೀಗಡೀ ಫೋನ್ ಮಲ್ತ್ದ್ ಅಶ್ಲೀಲವಾದ್ ಪಾತೆರೊಂದು ಅಂಚೆನೇ ಅಶ್ಲೀಲ ಮೆಸೇಜ್ ಮಲ್ತೊಂದು ಕಿರುಕುಳ ಕೊರೊಂದಿತ್ತಿನ ಆರೋಪಡ್ ಬೆದ್ರ ಸ್ಟೇಶನ್ದ ಪೊಲೀಸ್ ಕಾನ್ಸ್ಟೇಬಲ್ನ್ ಅವ್ವೇ ಸ್ಟೇಶನ್ದ ಪೊಲೀಸೆರ್ ಕೈದ್ ಮಲ್ತ್ದೆರ್.
ಕೈದಾತಿನ ಕಾನ್ಸ್ಟೇಬಲ್ ಶಾಂತಪ್ಪ (28) ಗ್ ನ್ಯಾಯಂತಡೆ ಜಾಮೀನ್ ಕೊರ್ತುಂಡು. ಕೈದಾಪಿನೆಕ್ ದುಂಬೇ ಪೊಲೀಸ್ ಆಯುಕ್ತೆರ್ ಆಯನ್ ಸಸ್ಪೆಂಡ್ ಮಲ್ತಿತ್ತೆರ್.
ಆಗಸ್ಟ್ 25ತಾನಿ ಪೊಂಜೊವು ತನ್ನ ಕಂಡನ್ಯನ ಮಿತ್ತ್ ಕೌಟುಂಬಿಕ ದೌರ್ಜನ್ಯೊದ ಬಗೆಟ್ ಒಯಿಲ್ ಬರೆಪಾಯೆರ ಸ್ಟೇಶನ್ಗ್ ಬತ್ತಿತ್ತೆರ್. ಆ ಪೊರ್ತುಡು ಬೇಲೆಡಿತ್ತಿನ ಶಾಂತಪ್ಪೆ ಪೊಂಜೊವುನ ಮೊಬೈಲ್ ನಂಬರ್ ಬರೆವೊಂದೆ. ಬೊಕ್ಕ, ಇನ್ಸ್ಪೆಕ್ಟರ್ ದಂಪತಿಲೆನ್ ಸ್ಟೇಶನ್ಗ್ ಲೆತ್ತ್ದ್ ವಿಚಾರಣೆ ಮಲ್ತ್ ಕಡಪುಡ್ದ್ ಕೊರ್ದಿತ್ತೆರ್.
ಪೊಲೀಸ್ ಮೂಲೊಲೆನ ಪ್ರಕಾರ, ಉಂದಾಯಿ ಬೊಕ್ಕ ಶಾಂತಪ್ಪೆ ಆ ಪೊಂಜೊವುಗು ಮೂಜಿ ಸರ್ತಿ ಫೋನ್ ಮಲ್ತ್ದ್ ಅಶ್ಲೀಲವಾದ್ ಮಾಡಿ ಪಾತೆರ್ದೆ ಪನ್ದ್ ಆರೋಪ ಉಂಡು. ಪೊಂಜೊವು ಕಾಲ್ದ ದಾಕಲೆಲೆನ್ ಪುರಾಪು ಆದ್ ಕೊರ್ದು ಆಯನ ಮಿತ್ತ್ ಒಯಿಲ್ ಬರೆಪಾದೆರ್.
ಕೊಪ್ಪಳ ಜಿಲ್ಲೆದ ಕುಷ್ಟಗಿ ತಾಲೂಕ್ದಾಯೆ ಆಯಿನ ಶಾಂತಪ್ಪೆ 2022 ಟ್ ಪೊಲೀಸ್ ಇಲಾಖೆಗ್ ಕಾನ್ಸ್ಟೇಬಲ್ ಆದ್ ಸೇರ್ದಿತ್ತೆ.