Last updated on September 8th, 2025 at 09:56 am
ಕುಡ್ಲ, ಸೆ 08: ಕುಡ್ಲ ವಿಮಾನ ಉಂತಡೆದ ಟರ್ಮಿನಲ್ ಕಟ್ವಾನೊನು ಪುಡಪುವೆ ಪನ್ದ್ ಪೋಡಿಕಟ್ಟಾವುನ ಕಾಲ್ ಮಲ್ತಿತ್ತಿನ ಆರೋಪಿನ್ ಬಜ್ಪೆ ಸ್ಟೇಶನ್ ಪೊಲೀಸೆರ್ ತಮಿಳುನಾಡ್ಡ್ ಅರೆಸ್ಟ್ ಮಲ್ತ್ದೆರ್. ಕೈದಾತಿನಾಯನ್ ತಮಿಳುನಾಡ್ದ ವೆಲ್ಲೂರು ಜಿಲ್ಲೆದ ಸಸಿಕುಮಾರ್ (38) ಪನ್ದ್ ಗುರ್ತ ಪತ್ತ್ದೆರ್. ವೆಲ್ಲೂರ್ಡ್ ಪೊಲೀಸೆರ್ ವಶೊಕು ಗೆತೊಂದು ವಿಚಾರಣೆ ಮಲ್ಪುನಗ ಫೋನ್ ಮಲ್ದಿನೆನ್ ಒತ್ತೊಂದೆ.
ಅಗಸ್ಟ್ 29 ದಾನಿ ರಾತ್ರೆ ಕುಡ್ಲ ಏರ್ಪೋರ್ಟ್ ಗ್ ಫೋನ್ ಬತ್ತಿತ್ತ್ದ್ ಡ್ಯೂಟಿ ಟರ್ಮಿನಲ್ ಮ್ಯಾನೇಜರ್ ಬಜ್ಪೆ ಪೊಲೀಸ್ ಸ್ಟೇಶನ್ಗ್ ಕೊರ್ತಿನ ಒಯಿಲ್ದ ಆಧಾರೊಡು ಮೊ.ನಂ 156/2025 ಕಲಂ 351(2), 351(3) BNS ಬೊಕ್ಕ ವಿಮಾನ ಉಂತಡೆಲೆನ ಭದ್ರತೆಗ್ ತಲೆಪು ಕನಪುನೆನ್ ನಿರ್ಬಂಧಿಪುನ ಕಾಯ್ದೆದಡಿಟ್ ಪ್ರಕರಣ ದಾಕಲ್ತೊಂದೆರ್.
ಪ್ರಕರಣ ದಾಕಲ್ತೊಂದು ಜಡ್ತೆ ಮಲ್ತಿನ ಪೊಲೀಸೆರ್ ಆರೋಪಿನ್ ವೆಲ್ಲೂರ್ ಡ್ ವಶೊಕು ಗೆತೊಂದು ವಿಚಾರಣೆ ಮಲ್ಪುನಗ ದೇಶೊದ ಮಾತಾ ವಿಮಾನ ಉಂತಡೆಲೆನ ಮೊಬೈಲ್ ನಂಬರ್ನ್ ಸಾಮಾಜಿಕ ಬಲೆತ್ತಾನೊಡು ಸರ್ಚ್ ಮಲ್ತ್ದ್ ಫೋನ್ ಮಲ್ತ್ದ್ ಪೋಡಿಕಟ್ಟಾದೆ ಪನ್ದ್ ತೆರಿಪಾದೆ. ಅಂಚೆನೇ ಕುಡ್ಲ ಅಂತರಾಷ್ಟ್ರೀಯ ವಿಮಾನ ಉಂತಡೆಗ್ಲಾ ಫೋನ್ ಮಲ್ತ್ದ್ ಟರ್ಮಿನಲ್ ಬಿಲ್ಡಿಂಗ್ ನ್ ಖಾಲಿ ಮಲ್ಪೆರೆ ಪನ್ಡ್ದ್, ಖಾಲಿ ಮಲ್ತಿಜಿಂಡ ಟರ್ಮಿನಲ್ ಬಿಲ್ಡಿಂಗ್ ಪುಡಪುವೆ ಪನ್ದ್ ಪೋಡಿಕಟ್ಟಾದೆ ಪನ್ದ್ಲಾ ಒತ್ತೊಂದೆ. ಆರೋಪಿನ್ ದಸ್ತಗಿರಿ ಮಲ್ತ್ದ್ ನ್ಯಾಯಂತಡೆದ ಎದುರು ಲೆತೊಂದು ಪೋದಿತ್ತ್ದ್, ನ್ಯಾಯಾಂಗ ಕೈದ್ ಕೊರ್ತುಂಡು.