Last updated on September 10th, 2025 at 08:42 am
ಕುಡ್ಲ, ಸೆ. 10: ಕಾನೂನು ನೆವನೊಡು ಈ ನೆಲತ ಸಂಸ್ಕೃತಿ ಆಯಿನ ಆಟ, ನಾಟಕ ಪ್ರದರ್ಶನೊಗು ಅವಕಾಶ ಕೊರಂದೇ ಇತ್ತ್ಂಡ ಎಂಕ್ಲು ಮನಿಪಂದೆ ಕುಲ್ಲುಜ. ನನ ಒಂಜಿ ರಡ್ಡ್ ದಿನೊಟು ಸಂಸದೆರೆನ ಮುತಾಲಿಕೆಡ್ ಜಿಲ್ಲಾಡಳಿತೊದ ಒಟ್ಟುಗು ಪಾತೆರುವ. ಪಾತೆರೊಗು ಬಗ್ಗ್ಜಿಂಡ ಜಿಲ್ಲೆಡೊರ್ಮೆ ಪೊರ್ಮ್ಬಾಟ ಮಲ್ಪುವ, ಎಂಕ್ಲೆನ ಸ್ಥಾನೊನಾಂಡಲಾ ಬುಡುವ, ಸಂಪ್ರದಾಯೊಗು ತೆಟ್ಟಾಯೆರ ಬುಡ್ಪುಜ ಪನ್ದ್ ಶಾಸಕೆ ವೇದವ್ಯಾಸ ಕಾಮತ್ ಕೋಡೆ ನಡತಿನ ಬೃಹತ್ ಜನಾಗ್ರಹ ಸಭೆಟ್ ಪನ್ಡೆರ್.
ದಕ್ಷಿಣಕನ್ನಡ ಜಿಲ್ಲಾಡಳಿತ ಬೊಕ್ಕ ಪೊಲೀಸ್ ಇಲಾಖೆ ಜಿಲ್ಲೆದ ಸಾಂಸ್ಕೃತಿಕ ಕಾರ್ಯಕ್ರಮೊಲೆನ್ ಕಾನೂನುದ ನೆವನೊಡು ತಲೆಪು ಕನವೊಂದುಪ್ಪುನೆತ ವಿರುದ್ದ ನಡತಿನ ಬೃಹತ್ ಜನಾಗ್ರಹಸಭೆಟ್ ಪಾತೆರ್ನ ಆರ್ ಅಧಿಕಾರಿಲೆಗ್ ಡೆಸಿಬಲ್ ಲೆಕ್ಕ ಪಾಡುನು ಎಂಚ ಪನ್ದ್ ತೆರಿದಿಜಿ. ಮೊಬೈಲ್ ಆ್ಯಾಪ್ ಪತೊಂದು ಬರ್ಪೆರ್. ಅಕುಲು ನಮ್ಮಲ್ಪ ಆಟ, ನಾಟಕದ ಧ್ವನಿವರ್ಧಕ, ಮುಲ್ಪ ಸೇರುನ ಜನೊಕ್ಲೆರ್ದ್ ಎಚ್ಚ ಇಪ್ಪುಂಡಾ ಪನ್ದ್ ಲೆಕ್ಕ ಪಾಡೊಡು. ಕಾನೂನು ಎಂಚಿನಲಾ ಇಪ್ಪಡ್, ನಮ್ಮ ಸಂಸ್ಕೃತಿದ ಮಿತ್ತ್ ಸವಾರಿ ಮಲ್ಪುನ ಕಾನೂನು ನಮಕ್ ಬೊರ್ಚಿ. ಒವ್ವೇ ರಾಜಕೀಯದಾಂತೆ ಮಾತೆರೆನ್ಲಾ ಬೆಂಗಳೂರುಗು ಲೆತೊಂದುಪೋಪ, ಒಟ್ಟುಗು ಇತ್ತ್ಂಡ ಒಟ್ಟುಗು, ಇಜಿಂಡ ತೊರ್ತ್ದ್ ಪನ್ಪಿನ ಲೆಕ ಅಧಿಕಾರಿಲೆನ ಒಟ್ಟುಗು ಕಲಾವಿದೆರ್ ಬೊಕ್ಕ ಮಾತೆರ್ಲಾ ಇತ್ತಿನ ಸಭೆತ ಅಟ್ಟನೆ ಮಲ್ಪುವ. ಬೊಕ್ಕಲಾ ಕೇನ್ಡಿಜೆರ್ನ್ಡ ನಮ ನಮ್ಮ ಸಾದಿ ನಾಡೊನೊಡಾಪುಂಡು ಪನ್ದ್ ಪನ್ಡೆರ್.
ಕಾರ್ಯಕ್ರಮೊಡು ಪಾತೆರ್ನ ಪಟ್ಲ ಸತೀಶ್ ಶೆಟ್ಟಿ ಸುಪ್ರೀಂಕೋರ್ಟ್ ಕಾನೂನು 25 ವರ್ಸೊರ್ದು ಉಂಡು. ಉಂದೆಕ್ ದುಂಬು ಇಂಚಿನ ಸಮಸ್ಯೆ ಆದಿಜ್ಜಂಡ್. ಇತ್ತೆ ಒರರ್ದ್ ಒರಾನೆ ಧಾರ್ಮಿಕ ಕಟ್ಲೆಲೆಗ್ ಸವಾಲ್ ಮಲ್ಪುನ ಬೇಲೆನ್ ಜಿಲ್ಲಾಡಳಿತ ಮಲ್ತೊಂದುಂಡು ಪನ್ದ್ ಪನ್ಡೆರ್. ಪೊಲೀಸ್ ಇಲಾಖೆದ ನಿರ್ಬಂಧೊಡು ಕಲೆನ್ ನಂಬಿನಕ್ಲೆನ ಜೂವನ ಅಡಿಮೇಲ್ ಆವೊಂದುಂಡು. ಪಾಕ ಕುಟುಮೊಲು ತಾದಿಗ್ ಬೂರೊಂದುಲ್ಲ. ಉಂದೆತ ಪತ್ತ ಜಬದರಿನ್ ಸರಕಾರ ತುಂಬೊಡು. ಎಂಕ್ಲೆಗ್ ದುಂಬು ಎಂಚ ಕಾರ್ಯಕ್ರಮೊಲು ನಡತೊಂದಿತ್ತನಾ ಅಂಚೆನೇ ನಡಪೊಡು. ಡಿಸಿಎಂ ಮುರಾನಿ ತುಳು ಸಂಸ್ಕೃತಿದ ಬಗೆಟ್ ಪಾತೆರ್ದಿತ್ತೆರ್. ಆಂಡ ಮುಲ್ಪ ಸಂಸ್ಕೃತಿದ ಮಿತ್ತ್ ದಬ್ಬಾಳಿಕೆ ಮಲ್ತೊಂದುಲ್ಲೆರ್ ಪನ್ದ್ ಪನ್ಡೆರ್. ಇನಿ ಕಮ್ಮಿ ಜನ ಸೇರ್ದ್ ಜನಾಗ್ರಹ ಸಭೆ ಮಲ್ತ್ದ, ನನ ಲಕ್ಷಗಟ್ಲೆ ಜನ ಸೇರ್ದ್ ಧರಣಿ ಮಲ್ಪೊಡಾದ್ ಬರು, ಅವೆಕ್ ಅವಕಾಶ ಮಲ್ತ್ ಕೊರೊರ್ಚಿ ಪನ್ದ್ ಪನ್ಡೆರ್.