Last updated on September 28th, 2025 at 11:02 am
ಕುಡ್ಲ, ಸೆ. 27: ಕುಡ್ಲಡ್ ವಿಧ್ಯಾರ್ಥಿಲೆಗ್ ಗಾಂಜಾ ಸಪ್ಲೈ ಮಲ್ಪೆರ ಅಪಾರ್ಟ್ಮೆಂಟ್ ಒಂಜೆಟ್ 12 ಕೆಜಿಗ್ಲಾ ಎಚ್ಚ ಗಾಂಜಾ ದೀವೊಂದಿತ್ತಿನ 11 ಜನ ಕೇರಳ ಮೂಲೊದ ಕಾಲೇಜ್ ವಿಧ್ಯಾರ್ಥಿಲೆನ್ ಪೊಲೀಸೆರ್ ಕೈದ್ ಮಲ್ತ್ದೆರ್.
ಕೈದಾತಿನಕ್ಲೆನ್ ಕೇರಳದ ವಿದ್ಯಾರ್ಥಿಲಾಯಿನ ಆದ್ವೈತ್ ಶ್ರೀಕಾಂತ್, ಮುಹಮ್ಮದ್ ಆಫ್ಸಿನ್, ಮುಹಮ್ಮದ್ ಸ್ಮಾನೀದ್, ನಿಬಿನ್ ಟಿ ಕುರಿಯನ್, ಮುಹಮ್ಮದ್ ಕೆಕೆ, ಮುಹಮ್ಮದ್ ಹನನ್, ಮುಹಮ್ಮದ್ ಶಾಮಿಲ್, ಅರುಣ್ ತೋಮಸ್, ಮುಹಮ್ಮದ್ ನಿಹಾಲ್ ಸಿ, ಮೊಹಮ್ಮದ್ ಜಾಸೀಲ್ ವಿ ಬೊಕ್ಕ ಸಿದಾನ್ ಪಿ ಆರೋಪಿಲು ಪನ್ದ್ ಗುರ್ತ ಪತ್ತ್ದೆರ್. ಆರೋಪಿಲು ಮಾತೆರ್ಲಾ ಕುಡ್ಲದ ಕಾಲೇಜಿದ ರಡ್ಡನೇ ವರ್ಸೊದ ಬಿಬಿಎ ವಿದ್ಯಾರ್ಥಿಲು.
ತೆನ್ಕಾಯಿ ಕುಡ್ಲ ಪೊಲೀಸ್ ಸ್ಟೇಶನ್ ದ ಅಪರಾಧ ಪತ್ತೆ ದಳೊದ ಸಿಬ್ಬಂದಿಲಾಯಿನ ಮುಖ್ಯ ಪೊಲೀಸ್ ಕಾನ್ಸ್ಟೆಬಲ್ ಪುಟ್ಟರಾಮ್ ಸಿಎಚ್ ಬೊಕ್ಕ ಪೊಲೀಸ್ ಕಾನ್ಸ್ಟೆಬಲ್ 2367 ಮಲ್ಲಿಕ್ ಜಾನ್ ಮೊಕುಲು ಬಯ್ಯಡ್ 7:45 ತ ಅಂದಾಜಿಗ್ ಬೇಲೆಡುಪ್ಪುನಗ, ಕೇರಳದ ವಿದ್ಯಾರ್ಥಿಲೆನ ಕೂಟ ಒಂಜಿ ನಿಷೇಧಿತ ಮಾದಕ ಸೊತ್ತು ಗಾಂಜಾ ನ್ ವಾಣಿಜ್ಯ ಪ್ರಮಾಣೊಡು ಗೆತೊಂದು ಅತ್ತಾವರದ ಕಾಫ್ರಿಗುಡ್ಡೆದ ಪಲ್ಲಿದ ಕೈತಲ್ ಕಿಂಗ್ ಕೋರ್ಟ್ ಅಪಾರ್ಟ್ಮೆಂಟ್ದ ಫ್ಲಾಟ್ ನಂಬರ್ ಜಿ 1 ಡ್ ಸಾರ್ವಜನಿಕೆರೆಗ್ ಮಾರುನ ಉದ್ದೇಶೊಡು ದೀತೆರ್ ಪನ್ದ್ ಪತ್ತ ಒಲವು ಇತ್ತ್ದ್ ದಾಳಿ ಮಲ್ತ್ದೆರ್.
ದಾಳಿದ ಪೊರ್ತುಡು, ಪೊಲೀಸೆರ್ 7 ಪ್ಯಾಕೆಟ್ಲೆಡ್ ಪ್ಯಾಕ್ ಮಲ್ದಿನ ಸುಮಾರ್ 12 ಕೆಜಿ 264 ಗ್ರಾಂ ಗಾಂಜಾ (ಅಂದಾಜಿ ಮೌಲ್ಯ 2,45,280 ರೂ.), 2,000 ರೂ. ಮೌಲ್ಯೊದ ರಡ್ಡ್ ಡಿಜಿಟಲ್ ತೂಕೊದ ಸ್ಕೇಲ್ಲ್ ಅಂಚೆನೇ ಬೇತೆ ಸೊತ್ತುಲೆನ್ ವಶೊಕು ಗೆತೊಂದೆರ್. ಒಟ್ಟು, ಆರೋಪಿಲೆರ್ದ್ 3,52,280 ರೂ. ಮೌಲ್ಯೊದ ಸೊತ್ತುಲೆನ್ (1,05,000 ರೂ. ನಗದು ಸೇರ್ದ್) ವಶೊಕು ಗೆತೊಂದೆರ್.