Last updated on September 29th, 2025 at 08:50 am
ಸೆ. 29: ಏಷ್ಯಾಕಪ್ 2025 ತ ಫೈನಲ್ ಗೊಬ್ಬುಡು ಆರ್ಚ್ ರೈವಲ್ ಪಾಕಿಸ್ತಾನೊನು ಭಾರತ ಸೋಪಾದ್ಂಡ್. ಈ ಗೆಲ್ಮೆದ ಒಟ್ಟುಗು ಭಾರತ ಕುಡೊರ ಏಷ್ಯನ್ ಚಾಂಪಿಯನ್ ಆತ್ಂಡ್. ವಿಶೇಷ ಪನ್ಡ ಈ ಸರ್ತಿ ಪಾಕಿಸ್ತಾನೊದೊಟ್ಟುಗು ಗೊಬ್ಯೆರ ಬಲ್ಲಿ ಪನ್ಪಿ ಕಾಯೆಸ್ದ ನಡುಟುಲಾ ಭಾರತ ಪಾಕಿಸ್ತಾನೊದೊಟ್ಟುಗು ಮೂಜಿ ಸರ್ತಿ ಗೊಬ್ಬುದು ಮೂಜಿ ಸರ್ತಿಲಾ ಪಾಕ್ ತರೆಕ್ ಕೈ ದೀವೊನುನ ಲೆಕ ಮಲ್ದ್ಂಡ್. ಕಡೀರ ಸುತ್ತುದ ಗೊಬ್ಬುಡು 7 ವಿಕೆಟ್ಡ್ ಗೆಂದ್ದಿತ್ತಿನ ಟೀಮ್ ಇಂಡಿಯಾ, ರಡ್ಡನೇ ಸುತ್ತು, ಸೂಪರ್ ಫೋರ್ಡ್ 6 ವಿಕೆಟ್ಡ್ ಗೆಂದ್ದಿತ್ತ್ಂಡ್. ಇತ್ತೆ ಫೈನಲ್ಡ್ 5 ವಿಕೆಟ್ಡ್ ಗೆಂದ್ದ್ಂಡ್. ಈ ಮುಕೇನ ಪಾಕಿಸ್ತಾನೊದ ವಿರುದ್ಧ ಹ್ಯಾಟ್ರಿಕ್ ಗೆಲ್ಮೆ ತಿಕ್ಕ್ದ್ಂಡ್.
ಟಾಸ್ ಗೆಂದಿನ ಭಾರತೊದ ಕ್ಯಾಪ್ಟನ್, ತುಳುನಾಡ ಮರ್ಮಯೆ ಸೂರ್ಯಕುಮಾರ್ ಯಾದವ್ ಫೀಲ್ಡಿಂಗ್ ಮಲ್ಪೆರ ಜತ್ತೆರ್. ಸುರುಕು ಬ್ಯಾಟಿಂಗ್ ಮಲ್ತಿನ ಪಾಕ್, ಅಬ್ಬರೊದ ಬ್ಯಾಟಿಂಗ್ಡ್ ಮಲ್ಲ ಸ್ಕೋರ್ ಮಲ್ಪುಲೆಕ ತೋಜೆದ್ಂಡ್.
ಸಾಹಿಬ್ಜಾದಾ ಫರ್ಹಾನ್ ಬೊಕ್ಕ ಫಖರ್ ಜಮಾನ್ ಎಡ್ಡೆ ಪಾರ್ಟ್ನರ್ಶಿಪ್ ಮಲ್ತೆರ್. 10 ನೇ ಓವರ್ಡ್ ವರುಣ್ ಚಕ್ರವರ್ತಿ 57(38 ಬಾಲ್)ರನ್ ಮಲ್ತಿತ್ತಿನ ಫರ್ಹಾನ್ನ ವಿಕೆಟ್ ಗೆತೊಂಡೆರ್. ಅವೆರ್ದ್ ಬೊಕ್ಕ ಸೈಮ್ ಅಯೂಬ್ನ ವಿಕೆಟ್ ಪೋಂಡು, ಫಖರ್ ಜಮಾನ್ ಅಬ್ಬರೊದ 46 ರನ್ ಮಲ್ತ್ದ್ ಔಟ್ ಆಯೆ. ಅವೆರ್ದ್ ಬೊಕ್ಕ ಭಾರತದ ಬೌಲರ್ ನಕುಲೆನ ದಾಳಿಗ್ ಪಾಕ್ 146 ಕ್ ಆಲೌಟ್ ಆಂಡ್. ಕುಲದೀಪ್ ಯಾದವ್ 4 ವಿಕೆಟ್ ಗೆತೊಂಡೆರ್. ಅಕ್ಷರ್, ಬುಮ್ರಾ, ವರುಣ್ 2 2 ವಿಕೆಟ್ ದೆತ್ತೆರ್.
ಚೇಸಿಂಗ್ ಮಲ್ತಿನ ಭಾರತ 20 ರನ್ ಆಯೆರಾನಗ 3 ಮಲ್ಲ ವಿಕೆಟ್ ಕಲೆಯೊಂದು ಬಂಙೊಡು ಇತ್ತ್ಂಡ್. ಬೊಕ್ಕ ಬತ್ತಿನ ತಿಲಕ್ ವರ್ಮಾ ಅಕೇರಿ ಮುಟ್ಟಲಾ ಗಟ್ಟಿ ಉಂತುದು ಪಾಕ್ ಬೌಲರ್ನಕ್ಲೆನ ಚರ್ಬಿ ಜಪುಡಾಯೆರ್. 53 ಬಾಲ್ಡಾ 69 ರನ್ ಮಲ್ತ್ದ್ ಗೆಲ್ಮೆಡ್ ಮಲ್ಲ ಪಾಲ್ ಗೆತೊಂಡೆರ್. ಸಂಜು ಸ್ಯಾಮ್ಸನ್ 24 ಬೊಕ್ಕ ಶಿವಂ ದುಬೆನ 33 ರನ್ ಬಾರೀ ಎಡ್ಡೆ ಪೊರ್ತುಡು ಬತ್ತ್ದ್ ಭಾರತೊಗು ಗೆಲ್ಮೆ ಕನತ್ ಕೊರ್ನ್ಡು. ಅಕೇರಿದ ಒಂಜಿ ರನ್ ಬೋಡಾನಗ ರಿಂಕು ಸಿಂಗ್ ಬತ್ತ್ದ್ ಬೌಂಡರಿ ಆಕ್ಯೆರ್.
ಏಷಿಯಾ ಕಪ್ ಗೆಂದಿನ ಭಾರತ, ಏಷಿಯನ್ ಕ್ರಿಕೆಟ್ ಕೌನ್ಸಿಲ್ ಮುಖ್ಯಸ್ಥೆ ಅಂಚೆನೇ ಪಾಕಿಸ್ತಾನ್ ಕ್ರಿಕೆಟ್ ಬೋರ್ಡ್ದ ಅಧ್ಯಕ್ಷೆ ಮೊಹ್ಸಿನ್ ನಖ್ವಿನ ಕೈರ್ದ್ ಟ್ರೋಫಿ ಬೊಕ್ಕ ಪದಕೊ ಗೆತೊನುಜ ಪನ್ಡೆರ್. ಅಂಚಾದ್ ಭಾರತ ಟ್ರೋಫಿದಾಂತೆ ಗೆಲ್ಮೆದ ಸಂಭ್ರಮಾಚರಣೆ ಮಲ್ತ್ಂಡ್.
ಅಭಿಷೇಕ್ ಶರ್ಮಾ ಸರಣಿ ಶ್ರೇಷ್ಠ ಪ್ರಶಸ್ತಿ ಗೆಂದಿಯೆರ್, ತಿಲಕ್ ವರ್ಮಾಗ್ ಪಂದ್ಯ ಶ್ರೇಷ್ಠ ಪ್ರಶಸ್ತಿ ತಿಕ್ಕ್ಂಡ್.