Last updated on October 6th, 2025 at 11:30 am
ಒಡಿಪು: ಸಾದಿ ಬರಿಟ್ ಉಂತಾದಿತ್ತಿನ ಕಾರ್ಗ್ ಕೆಂಗುಡೆರ್ ಏರಾ ಸೂ ಪಾಡ್ದಿನ ನಡಕೆ ಒಡಿಪು ಜಿಲ್ಲೆದ ಕುಂದಾಪುರ ತಾಲೂಕ್ಡ್ ನಡತ್ದ್ಂಡ್.
ಕುಂದಾಪುರದ ಕಾವ್ರಾಡಿದ ನೂರಾನಿ ಪಲ್ಲಿದ ಎದುರು ಉಂತಾದಿತ್ತಿನ ಮಾರುತಿ ಸ್ವಿಫ್ಟ್ ಕಾರ್ ಕೆಂಗುಡೆರೆ ಸೂಕ್ ಪೊತ್ತ್ದ್ ಸುಡುಸೂಕರಿ ಆತ್ಂಡ್. ಕಾವ್ರಾಡಿ ಗ್ರಾಮೊದ ಶೇಖ್ ಮೊಹಮ್ಮದ್ ಗೌಸ್ ರೆನ ಇಲ್ಲದಕುಲು ಅ.1ತಾನಿ ಹೈದರಾಬಾದ್ ಪ್ರವಾಸೊಗು ಪೋದಿತ್ತೆರ್. ಪ್ರವಾಸೊಗು ಪೋಪಿನ 10 ದಿನೊಕು ದುಂಬು 5 ಲಕ್ಷ ಮೌಲ್ಯೊದ ಸ್ವಿಫ್ಟ್ ಕಾರ್ ಗೆತೊಂದಿತ್ತೆರ್. ಆಂಡ ಕಾರ್ನ್ ಅಕ್ಲೆನ ಇಲ್ಲಡೆ ಕೊನೊಯೆರ ಇಂಚಿಪ ಸಾದಿದ ಸಮಸ್ಯೆ ಇತ್ತಿನೆರ್ದಾವರ ಕಾರ್ನ್ ಕಾವ್ರಾಡಿದ ನೂರಾನಿ ಪಲ್ಲಿದ ಎದುರುದ ಸಾದಿಡ್ ಉಂತಾದಿತ್ತೆರ್ಗೆ.
ಅ.4 ತಾನಿ ಕಾಂಡೆ ಸುಮಾರ್ 5 ಗಂಟೆದ ಅಂದಾಜಿಗ್ ಮೊಹಮ್ಮದ್ ಗೌಸ್ ರೆನ ಪಲಯೆ ಶೇಕ್ ಅನ್ಸಾರ್ ಸಾಹೇಬ್ ನಮಾಜ್ಗ್ ಲಕ್ಕ್ದ್ ಪೋನಗ ಕಾರ್ ಅಲಕ್ಕ ಪೊತ್ತುದು ಪೋತಿನ ತೋಜಿದ್ ಬೈದ್ಂಡ್. ದುಷ್ಕರ್ಮಿಲು ಶೇಖ್ ಮೊಹಮ್ಮದ್ ಗೌಸ್ರೆಗ್ ಆರ್ಥಿಕ ನಷ್ಟ ಮಲ್ಪುನ ಉದ್ದೇಶೊಡು ಕಾರ್ಗ್ ಸೂ ಪಾಡ್ದೆರ್ ಪನ್ದ್ ಒಯಿಲ್ ಬರೆಪಾದೆರ್. ಈ ಬಗೆಟ್ ಕುಂದಾಪುರ ಗ್ರಾಮಾಂತರ ಪೊಲೀಸ್ ಸ್ಟೇಶನ್ಡ್ ಪ್ರಕರಣ ದಾಕಲಾದಿತ್ತ್ದ್ ಪೊಲೀಸೆರ್ ಜಡ್ತೆ ಮಲ್ತೊಂದುಲ್ಲೆರ್.